每次要截的士過海，我都會先打開車門問一聲，以免阻人交更。
前些時，就是如此終於上了一架的士。
上了車後，司機說：「你好人品呀！好多人唔問㗎，我地唔過海又俾人閙！」
行咗三分鐘，我發現漏咗野，唔好意思地立即叫司機折返原地。
無咗支長途旗，司機卻唔介意，話我好人，上得車是緣分。
我想講，佢唔係基。
到了原地，我話：「我好快拎完野，不如你係度等我，我橫掂都係過海！」
司機話：「好，不過我兜定去對面街等你，果邊過海順路d，你可以平d！」
予人方便，人亦予你方便。
再過海。
我想講，我都唔係基。
旅程中，無所不談。原來他曾經風光過。
鍾意玩車，自己做車房老闆。揸三四層樓，夜夜笙歌，晚晩女人，酒池肉林，唔番屋企。
老婆頂佢唔順，離婚。
花無百日紅。
最潦倒時，無錢開飯，身無長物。
我問他衰咩，佢話一個字：「賭！」
「連最後一層樓，淘大呀，都賣埋。」他說。
跌過，所以大徹大悟。
從此戒掉全部陋習。
臨落車時，他說現在仍住在淘大。
我好奇，問：「你不是賣了嗎？」
他說：「我真係賣咗㗎！但你知唔知買家係邊個？
你估都估唔到呀！原來係我老婆！」
！！！
「我和她，又結番婚啦！原來她等我改過⋯⋯
佢話，這層樓是我倆的。佢永遠等我番屋企食飯。」
頂，攪到我落車眼濕濕，途人唔知仲以為一對基佬係的士中緣盡分手！
有時候，與萍水相逢的人傾計，會領受良多。
芸芸的士，萬千行人，卻給我聽到一個關於再續緣分的故事。
