2017-09-29 頭條日報
主動訪心光盲人院暨學校 #蘇永康 熱心幫助視障人士
蘇永康早前在家湊囝囝Jazz時，見到距離屋企不遠的「心光盲人院暨學校」掛上巨型籌款Banner，於是主動聯絡對方。除了慷慨解囊外，本周一更到該校作慈善探訪。他見到學員表演打鼓、彈琴和唱歌，他覺得既然他們有興趣，又用心學習，點解唔支持呢？今次他到訪給學員好大鼓勵，下月5日該院校在九展舉行的《尋找完美第5度》電影籌款，他雖未能出席，但他表示已邀請了組合Rubber Band和音樂人黃丹儀幫手教學，希望能盡綿力幫助視障人士。
當日蘇永康先與郁德芬院長和黃君保校長會面，了解該院校的學員狀況。談到在家見到那條巨型Banner時，他坦言：「究竟條Banner係畀邊個睇？因校外係高速公路，司機冇可能睇到，對面係巴士站，又賣到幾多飛呢？我咪打電話去問吓，點知冇人聽，留咗言又冇人覆我。」負責接洽他的方Sir續說：「後尾佢再打嚟，開頭我都唔知係蘇永康，佢問我啲飛賣成點？我話最平$100嘅飛賣到啲，跟住佢話可以包底，我哋真係好多謝佢。」
請老友幫手
由於今次籌款都是用嚟買樂器及作學員長遠的音樂培訓之用，蘇永康表示：「我爸爸係爵士樂手，佢傳畀我嘅係音樂天份，我好希望可以薪火相傳，記得上次參加過《暗中作樂》音樂會，聽到佢哋有位高足Michelle都係喺度畢業，O依家去咗中大讀書，所以唔好浪費喇，少少嘅綿力作為巿井音樂人必須要做，係對社會嘅一種責任。」之後蘇永康看到學員打鼓、彈琴和唱歌，不禁讚賞他們的努力。他續稱：「我已經搵咗Rubber Band教學員唱歌，或者表演畀學員睇吓，丹儀仲熱心，不過教樂器有難度，所以要逐步逐步嚟。」最後由學員代表送上紀念品，以答謝他的到訪。
