《「賺盡」都唔好去到太盡》
星期日一事令我耿耿於懷，是咁的...
星期日我BOOK左4點剪頭髮加電頭髮，salon係朋友介紹，冇指定髮型師。4點去到，情境如下：
● 髮型師A 同我講好價錢同款式，叫我等等。
● 此時，髮型師A同翠華伙計落單一樣，高速用圓櫈滑行，正剪緊男人B個頭，再跣去剪兩剪我左手邊長髮女人C個頭，長髮女人C 要染頭，佢睇緊色版揀緊色。
● 我右手邊女人D，佢頭頂出哂煙架機啱啱停左，女人D個頭用保鮮紙包住，等緊髮型師A。
● 教育電視mode：咁髮型師A到底同時剪緊幾多個人個頭呢？連埋我，4個！！！
----------------------------------------------------
5點，等左一個鐘...
● 男人B終於剪完，埋緊單。
● 長髮女人C坐到冇哂癮。
● 保鮮紙包頭女人D，頭已包一個鐘，我想像到，佢個頭同我去韓國學醃泡菜嘅感覺應該差唔多，依然等緊救星開封。
● 我揭左一個鐘salon 過期八婆雜誌，除左著左佢件黑色衫，一條毛都冇剪過。
於是，我起身話：「我想走唔剪啦，我想拎返個袋」。髮型師A 話：「我即刻剪你啦，好快，一個鐘搞掂」。個刻我呆左，因為長髮女人C同保鮮紙包頭女人D同時擰轉頭啤住我。最後我堅持話走，拎返個袋，好快就走左。
「賺盡」嘅做生意手段：
● 我BOOK4點，體諒你有客未剪完，等你半個鐘至一個鐘都OK，但我知男人B剪完都唔會輪到我。髮型師A想賺盡，明知有客BOOK左，照無上限接其他客。甚至為左避免客人不滿離場，洗濕左長髮女人C，同醃泡菜女人D個頭，「你都洗濕左個頭，走唔甩啦今鋪！」
● 我起身走，髮型師A 竟然話先剪我，完全當長髮女人C同醃泡菜女人D死嘅，何以平息「民忿」？
----------------------------------------------------
「係咁架啦，好出奇呀」thoery…
● 事後同朋友討論，朋友話：「間間都係咁架啦，BOOK左都喪等好正常，BOOK左唔係大哂，佢有客有錢賺唔通唔賺？」。BOOK 左都要等，BOOK來做乜？佢冇衡量接客能力，BOOK左都唔留個時間畀我。幾時開始，呢種「賺盡」嘅文化變成「正常」？
香港好怪，呢種「賺盡」嘅無品文化，已經變成「正常」遊戲規則。間間都係咁，所以大家妥協，大家麻木地接受不合理嘅對待，反而覺得唔妥協先唔正常。間間都係咁，等唔等於呢個「賺盡」嘅文化係啱呢？
又係「土地供應」嘅問題...
● 朋友話：「睇開Ｄ啦，而家Ｄ舖租好貴，佢唔接多Ｄ客，為唔到皮」，如果呢個先係個原因，我真係好傷心，香港地小本經營，為左個舖租，連做生意嘅道德都可以犧牲。
邊個發瀾渣，邊個先...
今次我自動離場，拎袋走人，髮型師A 竟然話先剪我，冇視同樣等緊嘅長髮女人C同醃泡菜女人D，恰當嗎公平嗎？大環境習慣左，只要邊個發惡就應付邊個，唔再理會事情合理性。咁我明大陸女人去迪迪尼發瀾渣唔排隊點解有用，邊個發瀾渣，邊個先。呢個根本係惡性循環，以後大家都知點玩，一開波仲唔發瀾渣。
----------------------------------------------------
呢種「賺盡」文化，點只一家...
呢件事同航空公司「超賣」機票係同理，CX因為好多客訂左機票no show，於是就「超賣」機票，唔夠位就叫D 客坐下班機再賠錢。CX一貫嘅回應係，呼籲你online check in 先，真係冇位都會賠足錢，每間公司都會「超賣」。歸根究底，冇位又賣飛根本係唔合理嘅經營手法，而公司損失嘅並唔係對客人嘅賠償，而係客人對公司嘅誠信同口碑。
一個做空少嘅朋友同我講，邊個惡邊個Get到Attention，下次試下超賣Offload你，你報警包你上到機。亦有人話，只要你堅持，CX會畀你上機。
問題係，幾時開始，我地進行買賣交易，原來領取貨物同服務，除左要付出金錢，仲要發瀾渣同「堅持」？
----------------------------------------------------
PS. 朋友同我講，香港地係咁架啦，我地再唔可以要求合理嘅對待，而係喺種種嘅唔合理當中，「適度有為」地妥協同適應，令自己冇咁難受。
朋友話可以做嘅只有罷去呢間salon，下星期日，搵間salon，佢一開舖你就入去。回想起上次去日本前，叫一個識日文嘅朋友BOOK 日本salon，去到日本，我一到可以即刻同我剪，明明呢件事係冇咩特別，但我覺得好難能可貴。
聽到朋友咁講，腦中loop 返吳浩康個首《洗剪吹》，「如果不可改變面型，就換個新髮型，臨場那適應力，叫做年輕」。好啦，我認命啦，我接受現實啦，全港九新界都係咁架啦，下星期我倒屎塔咁早去剪頭髮啦。
星期一到星期日的日文 在 星期一到星期日用日语怎么说呢？ - YouTube 的八卦
我是あかね！ 这次我介绍从 星期一到星期日 用日语怎么说。 跟我一起学习日语吧～。 こにんちは、あかねです。 今回は日本語の曜日の言い方を勉強しま ... ... <看更多>