深夜無人睇，靜靜雞講故仔......
《失蹤2》
今日係林頌明表哥嘅喪禮。
當我同父母到達靈堂後，現場愁雲慘霧，哭泣聲不絕。本身我今日情緒都唔係太好，遇上呢種氣氛就更加傷感。
「有客到，來賓請上前」
我同父母慢慢行到去表哥遺照前，見到遺照上面嘅表哥充滿自信，就好似世間上任何困難都難佢唔到咁，但千其唔好咁而覺得佢好高傲無禮貌，事實上表哥非常溫柔，對於我呢啲後輩非常照顧，不但教我學識易經占卦、仲同我講解香港好多古怪故事，所以由細到大我都好尊敬同好鍾意纏住佢講故事比我聽。
我會諗，究竟表哥遇到咩事而令到佢連命都賠上。
「一鞠躬，再鞠躬，三鞠躬，家屬謝禮」堂倌一路說，我亦跟隨地向表哥表示敬意，真誠地鞠躬，希望佢死後可以安息。
鞠躬完後，我同父母坐埋一邊靜候其他人，人場都唔少，有親戚亦有好多表哥朋友，亦因為表哥曾經做過社工幫過唔少人，唔少受佢恩惠嘅人都專程來見佢最後一面，顯然出表哥人緣真係唔錯。
同時間，見到林頌明媽媽已經一把年紀，白髮滿頭，佢一定估唔到如今白頭人送黑頭人，以後得佢一個人生活，失去唯一至親，究竟生活動力剩返幾多？一諗到咁我就心痛，於是忍唔住起身行去明媽到慰問。
但明媽雙眼已經喊到紅腫，神色哀傷，對身邊事物全無興趣，連我把聲都聽唔入耳。
「有心。」突然有把女人聲從明媽身旁出現。
我望一望佢，見到一個女人，令我一時之間唔知點叫佢。
佢似乎都留意，於是介紹自己：「我叫Karen，係阿明嘅舊同事。明媽我會繼續照顧，你可以放心。」
我點頭以示感謝，就返番座位坐，趁呢段最後時間好好回憶同表哥相處嘅日子。
喪禮結束後，對於表哥嘅死，我腦海充滿迷團。
「點解明表哥失咗蹤六年先搵到條屍？報紙仲話屍體發現嗰陣只係岩岩開始腐爛，姐係話佢只係死咗無幾耐，但無理由表哥一直喺山上面六年？六年都落唔到山？我地六年嚟都搵唔到佢？」我忍唔住將心中疑問講出嚟。
「你知唔知明媽每一日都打去報警，話個仔一直喺西貢山上面，仲試過親自上山搵佢而跌親，所以邊個話無人搵佢，係真係搵唔到。」我媽按佢所知嘅事講我知。
呢個時候，阿爸都參與埋討論，佢話:「六年前，你個明表哥同一班警察上山查緊一單失蹤案，但就喺西貢大枕蓋附近失去聯絡，嗰陣社會好轟動架，查失蹤案點知自己失蹤喎，之後過咗一星期先搵到佢地條屍，足足死咗一個高級督察，兩個沙展同一個軍裝警員。而你表哥就一直都搵唔到，要等成六年先搵得返。」
「所以你無咩事千其唔好上山呀！我唔想好似明媽咁淒涼孤伶伶一個人。」阿媽千叮萬囑，驚死我會出事咁。
「你仲有我呀嘛！」阿爸講完呢句，大家都笑了，算係今日哀痛之中唯一嘅笑聲。
而事實上，本身我對呢件事都無咩好奇，只係知道明表哥行山失蹤咁簡單，無諗到咁深入。但今日踏入靈堂望住表哥張遺照，佢嗰一副充滿自信嘅樣，點解會落得咁嘅下場，同時間佢識得易經占卦，佢應該知道自己會出事而避開吧？
夜晚，喺街度，我同身處台灣嘅女朋友傾電話，我將成件事分享比佢聽，諗住佢會比到啲獨特睇法我知，點知佢一句:「我聽日要行山呀，我唔想聽到有關行山失蹤嘅事呀！」
我講笑咁講：「香港就話西貢有結界，你地台灣都有嘅咩？」
「總之我就唔想聽同討論喇！」
當我行行下時候，突然隻左眼比樓上嘅水滴中，即時抬頭一望，只見一棟舊式唐樓，應該係冷氣機滴水。
「屌！真係好憎行舊區，係咁滴水！頭先滴中我隻眼。」
「鬼叫你夜晚晚講恐怖嘢嚟嚇我，個天都想教訓你，好喇，我仲有好多嘢要執架！有咩遲下再傾！」說罷，女友就收咗線。
返到屋企後，發現隻左眼好痕，我對住塊鏡望一望隻眼，又唔見有咩問題，但就聞到一陣惡臭由隻眼發出嚟，究竟頭先滴水有幾污糟呀？
雖然今日奔波咗成日，但對於明表哥嘅死仍然充滿好奇，於是上到床後，仍然用手機睇下西貢呢個地方究竟發生咗咩事。
我記得有次去明表哥屋企拜年，佢同我講過一段說話。
「山入面其實有好多結界。而所謂嘅結界可以分成三種，第一種係符印結界，結界範圍係透過符同埋印記去做出嚟。第二種係膜狀結界，係用泥所造成嘅結界，而邊界係可以清楚見到有塊膜存在，所以正常一般人見到都唔會行入去。而第三種就係無形結界，呢類結界係最危險，因為呢種結界冇辦法破壞，而且入咗去都唔知自己入咗。」明表哥細心地向我解釋。
「嘩！咁唔小心入咗結界點算呀？」我緊張地問。
「無架，走出結界得兩個方法，第一就係自殺死，等出面世界嘅人搵返你條屍。第二就係搵到結界嘅邊緣走返出去。」
「咁恐怖……點解西貢會有結界？」
「邊個話你知剩係西貢先有結界？結界根本係任何地方都會出現，就好似你擲骰子中邊個數字你都可以問點解會係呢個數字一樣。」
呢家諗返呢段對話，唔通明表哥真係入咗結界，而且喺結界入面掙扎咗六年先決定自殺出番嚟？但識咁多嘢嘅佢都走唔返出結界，結界真係好恐怖。
睇睇下手機，左眼除咗痕之外，亦慢慢感到痛楚，痛到將我彈起身。於是放低手機拿拿聲瞓覺算。
第二起身，我醒起琴晚隻左眼又痕又痛，於是去廁所對住塊鏡照一照隻眼。當我一照，我隱若見到我左眼入面隻眼珠好似有條嘢慢慢蠕動，仆街，唔係生蟲呀？
只見入面隻嘢好似見到我咁，慢慢從眼珠深入向我爬前，當我一直望住佢爬前時，我發現呢條好似唔係蟲嚟，而係一隻手嚟。
隻手愈爬前，我隻左眼就愈痛，痛得我閉上眼，眼淚水瘋狂滲出。
但突然間，我隻左眼仍然隱隱若若見到嘢，我向鏡中一照，驚見隻手掌慢慢將我眼皮撐開，然後伸出一隻手掌將我整個頭包住……
「啊！！！！！！！！！！！！！！！！！！！！！」我嚇得大叫。
……
電話聲一直響起，將我從睡夢中驚醒。張開雙眼，呆呆望住天花板，原來頭先係夢？未免太真實吧？
電話聲持續響起，我漫不經意地聽。原來係台灣嗰邊打嚟，我聽後臉色一沉。
女友喺山上失蹤。
（待續）
******************************************************************
1.
孔明古怪故事集處理當中，預計月中印刷完成，到時會通知大家開始會寄。
2.
賣斷五年嘅《失蹤》過幾日會有事宣布比大家聽，勿錯過最後機會。
3.
為慶祝盛事，繼續展開漫長創作《失蹤2》<- 暫名 哈哈
4.
其他孔明獨家故事，多多支持↓
https://www.patreon.com/Homing
5. 記得比like share 留言支持下 =]
感謝大家。
易經數字卦 在 數字起卦示範--文墨龍 - YouTube 的八卦
... <看更多>