讀者投稿：想轉行的Y小姐
＝＝＝＝＝＝
公司百幾二百人，我作為HR每日睇住有人辭職，有人入職，一日到黑都不斷in人同埋睇CV，基本上已經冇晒感覺，唯獨有位男同事較早前遞信離職，感受就特別深，為咗方便啲講，我將個男同事化名做Sam。
三年前我經一間獵頭公司介紹，引薦咗阿Sam嚟見工，收到CV嘅時候已經覺得佢好適合，唯一嘅障礙係有整整一年冇工作，我問過獵頭點解？對方話阿Sam屋企有事，係family reason，然後我就請獵頭安排佢嚟我公司面對面interview。
面試先由我呢位HR去見，過到我呢關就會叫埋佢所屬部門嘅阿head入嚟見第二round，有時我會陪住一齊進行第二round，有時唔會，主要睇各部門阿head想唔想我在場，原則上我哋希望同一日內搞掂晒，始終公司規模唔細，職員流動性亦高，唔夠人就嗱嗱聲請，盡量唔好拖。
當日親身同阿Sam進行第一輪interview已經覺得唔錯，所以我叫佢等等，搵埋部門主管入嚟再in，當我拎住阿Sam份CV去搵所屬部門主管嘅時候，對方十分介意阿Sam嗰一年嘅真空期，我解釋係family reason，獵頭嗰邊都問過㗎喇，主要係家人身體唔舒服，佢花咗啲時間留喺屋企照顧，點知呢位部門主管斥責我：「佢講你就信呀？一年冇返工喎！你有冇諗過佢係坐監，可能坐完一年出嚟呢！」
我：「咁佢有填到冇犯罪紀錄㗎嘛，更何況就算唔係真空期，每個candidate嚟見工，佢哋講任何嘢你一係選擇信，一係唔信就唔請㗎啦！約上嚟咪就係要睇反應同感覺囉。」
部門主管：「屋企人咩唔舒服要照顧全年呀？好誇張喎，定係之前畀人炒咗咋，古古怪怪咁，都唔慌好人。」
我：「咁ok啦！我叫個candidate返去等消息先，之後你想見再叫我安排。」
部門主管：「唔使，我去見，你一齊入嚟啦！」
然後我同部門主管一齊入房進行第二輪interview。
一早話阿Sam好適合，學歷、經驗、過往工作細節等等環節都過關之後，呢位部門主管開始問阿Sam點解有一年真空期，雖然佢係客氣咗，起碼冇兜口兜面質疑人哋坐過監，但仍然咄咄逼人：「一年喎Sam，我覺得有啲奇怪囉，就算係我爸爸媽媽病咗，我都唔會辭咗份工，再一年唔做嘢去照顧佢哋啦，唔係話唔孝順呀，咁都要食飯嘛，一年時間照顧屋企人呢part真係咩？呢個位我諗唔明。」
阿Sam絕對係一個有修養嘅人，佢選擇咗詳細回答：「一年前太太生BB，當時情況已經唔係咁好，要打強肺針幫BB出世，之後再送去深切治療，要駁呼吸機，我作為爸爸真係冇辦法專心工作，太太亦好需要我喺身邊，結果我辭咗上一份工，後來BB都係唔得，因為器官衰竭，我太太好傷心，產後抑鬱，我相信請人返嚟睇住佢唔係最好方法，我驚佢有事，所以一直照顧到佢情況穩定，至於錢方面，我用緊以前積蓄，而家安頓好，太太又ok，我就搵嘢做。」
我真係好想同阿Sam講，唔使講得咁仔細㗎！最後部門主管冇再講啲咩，亦吩咐我叫阿Sam返工，唔知佢有冇為隱瞞坐監嘅言論覺得羞愧呢？
三年後阿Sam辭職，我幫手搞離職手續，忍唔住問佢兩個問題：「搵到工未㗎你？市道唔好喎！」
Sam：「搵到喇，就係咁嘅市都搵到，人工同福利再好好多，另一間獵頭公司幫手㗎！」
我：「咁我都放心啲，其實你阿head唔易頂，你睇你個department啲人走馬燈咁轉就知啦，當年我以為你唔take offer㗎！」
Sam：「冇計啦！鬼叫要食飯咩！嗰陣時山窮水盡㗎喇，忍屎忍尿都係為咗我老婆咋。」
有時見到自己請返嚟嘅好員工離職，心裡面會百感交集，又想對方留低，又想佢哋有更好發展。當年個部門主管逼阿Sam覆述痛失愛兒嘅經歷係好殘忍，可能真係有傷害到阿Sam都唔奇，至於嗰一番「係咪坐過監」嘅言論，我當然冇同阿Sam提及，只希望個部門主管明白一個道理：未知全貌，不予置評，你唔了解別人，就唔好亂咁評價別人。
