呢兩日，好不安，腦海裡狂loop元朗恐襲畫面，我相信好多人都一樣。如果你問我驚唔驚？我驚。而家一般人出街，已經好難覺得自己絕對安全，落街食個飯要思前想後著咩色衫至唔會被人打，住新界連屋企都唔敢返，而那種恐慌正一直蔓延開去，無論住邊區都人心惶惶，好驚元朗恐襲隨時就在自己身處的地鐵重演。
今日，我竟然專登click入去睇一條格鬥武術教學片，睇得好專心，然後我發現自己竟然不知不覺淚流滿面。咩事？！烏干達呀？伊拉克呀？我喺香港出世長大，我突然完全認唔到呢個地方，點解連開個汽水樽蓋都唔夠力嘅我，竟然要睇格鬥武術教學片？！呢段影片唔係教人攻擊，而係保命。我不禁問點解，點解我一個平常人家，成世人連喺街亂拋垃圾都未試過，今日竟然折墮到出街要保命。
然後，我腦裡面突然有把聲問：咪住，點解我要咁驚？做錯嗰個又唔係我，點解我要驚？當權者之所以出動黑社會治港，之所以要無差別用武器襲擊所有人，故意打平民同孕婦（明報新聞已經證實被打的白衣女士懷孕），就係要你驚，驚就會需要警察，驚就唔敢再遊行，傳媒同文人驚就會收聲。但千算萬算，卻算漏了最重要的──我哋係香港人，唔係大陸人。Hong Kong is Hong Kong。價值觀是打不死的。本來以為恐襲上演之後，全香港就會滅聲，點知香港人比之前更憤怒，唔驚咩？驚，但恐懼是會習慣的，習慣咗就會識得保護自己，冇之前咁驚。而且，最驚嘅唔係我哋，而係林鄭。黑社會幫你做咗嘢，唔使還？從今以後，人哋叫佢做狗佢都要做，一家四口，真心驚。
事件發展至今，問題已經唔係反送中，而係──你仲係咪人？亦都無關學歷、職業、身家。由幼稚園開始學乜？見到有人跌親要扶起佢，係咁簡單。但今日，當權者同警察的所作所為，徹底推翻咗我由兩歲就開始學習的價值觀，警察眼見平民被打至血流披面會幸災樂禍，當權者挑釁人與人之間互相殘殺，用文宣鼓動孩子與父母作文革式互相批鬥，同伴出事閃電割蓆。點解由茶餐廳廚房佬到、醫生、教師都睇唔過眼，就係因為林鄭無人性。人格同身份學歷年齡無關，有班人見到黑社會打人歡呼打得好，仲覺得年輕人搞亂香港，唔好浪費時間去說服佢地，奴性可以凌駕人性，奴性重的人好享受被主子虐待，因為這樣才能顯出奴隸的存在價值。
作為平民百姓，元朗恐襲真係好恐怖，我哋應該點做？Keep calm and carry on，平常心，如常返工，食飯，多啲約朋友吹水，關心屋企人，唔好忘記生活要有趣味，睇戲，睇書，留點時間做自己喜歡的事。因為驚，日子要過。唔驚，日子都要過。我阻止唔到警黑一家親，但我可以控制自己的心態，我可以選擇用什麼態度去面對眼前的狀況。如果只係不停驚同嬲，對方未出手，我哋自己已經打亂自己。驚咗兩日，係時候平伏心情，企穩，唔好亂。呢個政府desperate到要搵黑社會治港，可見林鄭已經走投無路。佢亂，我哋偏要處之泰然。唔好絕望，我哋未輸，打持久戰嘅關鍵係意志，大家更加要好好保重，每個人都好重要，互相補位，喺自己嘅崗位上出一分力。
呢段日子，好多人都問點解，點解香港會搞成咁？我覺得香港生cancer，何妖、林鄭同類似嘅癌細胞其實存在已久，陰啲陰啲一路蠶食香港，只係我哋以前唔理，或心底知道但扮唔知。如今病發，痛不可擋，終要面對，要同癌細胞鬥過，好痛苦，不禁要問，呢場仗點解要我打？點解受苦嘅要係我？我想同大家講──因為香港揀咗我同你，We are the chosen ones，唔係我哋選擇做香港人，而係香港選擇咗我哋。有句說話──If not me, who？呃自己，冇病呀，唔使醫，繼續炒股搵錢食好西，然後將已病死的香港屍骸留俾下一代，做人點可以咁自私？
路途崎嶇，但我問過自己，如果有得揀，我會唔會揀做香港人？做呢個時代嘅香港人？答案係會。香港有我最美麗、最開心嘅日子，我喺呢度長大、追夢，既然香港揀咗我同你，就等我哋一齊展現香港人嘅質素。
明報新聞 在 呂爵安冇偶包形容自己百變未敢當「新一代笑匠 ... - YouTube 的八卦
... <看更多>