點解會揀移民台灣？點解會揀高雄？
呢兩日收到好多朋友PM 里奧叔叔，問里奧當初點解會揀台灣？好怕台灣遲早會變另一個香港到時又要走一次，揀好台灣後又點解會揀高雄？聽講高雄又熱 空氣又差 ，更有人問台灣人對香港人觀感如何？小朋友適應問題等等。
里奧都好明白大家近日既心情，移民始終係一生中其中一項大工程，今日就同大家分享一下里奧當初既諗法，希望唔會覺得里奧寫得太悶。
點解會揀台灣？
坦白講，以里奧叔叔既條件，除咗台灣唔知仲可以揀邊度
記得第一次踏足台灣係20年前，當時只係跟旅行團嚟玩咗7日，對於當時極年輕既里奧覺得台灣唔好玩，而且每個城市都感覺落後，所謂既夜市就只係擺地攤，簡單講就係唔鐘意去台灣，旅行就緊係去日本泰國啦。
之後隔左差唔多十幾年「移民前」，係里奧嫂既要求下終於再次踏足台灣，呢次既感覺就產生咗好大變化。
台灣雖然都係用中文，但文化就同香港及中國大陸，完全唔一樣，就算用新加坡做比較，台灣比到里奧既感覺好舒服，學秋生哥話齋呼吸既空氣都甜D (其實空氣質素有時候好差）
里奧讀書時期去咗美國幾年，之後係中國大陸工作又長駐咗幾年，就算當初對台灣既了解唔深，嗰種舒服既感覺就對里奧叔叔產生咗移民台灣既諗法。
咁對於當時里奧叔叔嚟講，台灣有咩好呢？
1, 近香港，里奧&里奧嫂雙親都係香港，香港屋企如果有需要我地返去都好快就到，里奧試過由高雄家出門口起計到香港家門口，只係用咗4.5小時
2, 生活及飲食文化接近，以前係美國除咗去唐人街外，好難可以食到中餐，就算係中國大陸嗰幾年，由於長駐係四川既關係，日日食野又油又辣，雖然台灣都唔會同香港完全一樣，但起碼有好多選擇，飲食係生活一大問題，唔慣會好辛苦。
3, 居住環境舒適，里奧家係香港都算蝸居一族，後期忍唔住搬去元朗租間大D既屋仔住咗幾年，但香港樓價不斷上升，買唔到樓既里奧就好希望有一個安安樂樂既家，台灣好似可能有D機會（不知那來的自信）。
聽落好似幾好喎，不過有兩大問題要解決
1, 小朋友既學業，當時里奧兩位千金年紀仲細，適應能力方面里奧完全沒有擔心過，不過台灣教育以中文為主，以里奧個人角度嚟睇，英文就算唔叻都最好唔會太差，咁係台灣可以點解決呢？
2, 搵食，香港始終係自己既地方，無論環境點變都好，一定搵到工作，但係台灣萬一做生意唔掂會有公司請嗎？手上既資金又夠我生活幾耐？做生意環境又陌生，萬一失敗又點算？
就係咁，嗰次旅行之後返到香港就日日諗可行方案，除咗解決到小朋友既英語學校之外「私校」，搵食呢方面都未有一個方向，甚至連做咩生意既idea 都未有。
里奧當時可能係香港壓力太大既關系，而且加上雨傘運動，里奧覺得無論去到世界各地，只要努力融入社會，了解到當地文化，就算夜市開檔賣雞扒都應該可以生活到，加上抱住要走就趁早既心態，最後就決定走咗先講。（里奧太衝動，這只是個人立場）
點解會揀高雄呢？天氣又熱空氣又差嗎？
當初里奧係打算到台中，咁點解又會變咗係高雄呢？
當時聽講好多香港人選擇台中，而當時移民公司都建議里奧去台中，亦係FB群無啦啦又有位居住台中多年既港人好熱心咁話幫我，又帶里奧家遊台中市，心態上會諗點解咁多人都話台中好既？
里奧家都覺得台中幾好，北上南下又方便，但可惜因為兩位千金教育係里奧嫂既考慮重點，係香港已經希望女兒就讀IB school 既里奧嫂都希望到台灣讀IB school，但在台中沒有IB小學，就係咁我地就再花時間去高雄考察一下。
到達高雄第一感覺係城市規劃好整齊，呢次係里奧第二次踏足高雄，之前落後既感覺完全冇曬，但太陽就真係好鬼曬，空氣既感覺又唔覺比台中差好多，可能當時只係短短既幾日考察，但感覺都唔錯，加上里奧嫂睇完學校非常滿意（學費除外），最後我地就決定以學校來決定居住地，落戶高雄。
台灣人歡迎香港人嗎？
里奧相信咩人都會有，不過如果以里奧家呢五年既生活體驗，就從來未遇過嚴重既歧視，但偶然都會遇到有D賴皮鬼扮曬野，通常呢D賴皮鬼會係做錯野既時候出現，例如銀行手續上會有不清楚，賴皮鬼會話你地香港人唔明，台灣人係咁做…blablabla .
但係生活上里奧就完全未有過不愉快經歷，里奧家在地台灣朋友占大多數，間中都會參加港人聚會，可能是接觸台灣人多的關係，慢慢都了解台灣文化，台灣人大部份都好容易相處，只要慢慢融入社會，生活上唔會有人覺得你「唔地道」，好快就好習慣。
貶眼間五年又過去，尋日晚餐時與大女分享最近香港大新聞，12歲既佢似乎已經唔多關心香港，香港對於佢地嚟講只係一個出生地，盡管每次有大新聞里奧都會分享之外，佢地兩姐妹已完全融入，認為自己係台妹，但作為父親既里奧叔叔，一直要佢地明白『台灣是你們的家，香港是你們的鄉』，一生不變。
🙏🏼🙏🏼🙏🏼🙏🏼🙏🏼🙏🏼請分享🙏🏼🙏🏼🙏🏼🙏🏼🙏🏼🙏🏼
#里奧叔叔
#移民台灣
#日希移民
日希移民 在 日希移民 的八卦
... <看更多>