【長文慎入！】
今日唔畫畫，想同大家講一件往事。
之前喺維珍飛，通常一班機飛到去澳洲只係逗留24個鐘就會飛返香港，所以飛到過去多數淨係喺酒店瞓，有時甚至淨係嗌個room service乜都冇做過，瞓醒就飛返香港。不過有一段時間，除咗呢啲得24個鐘嘅pattern，都會有啲超級長嘅pattern，最長係會留72個鐘，中間整整有3日完全free time喺澳洲。
話說有一次，我好難得地有一個72個鐘嘅Melbourne Flight，留咁耐緊係要諗啲嘢做。喺維珍我最friend嘅墨爾本同事就係一個傻大姐Jacky，我就問佢嚟緊有咩嘢做。佢話佢會去Sydney搵個friend，佢個friend阿Steve都係維珍嘅cabin crew，係揸熱氣球嘅，諗住去Sydney坐佢個熱氣球，呢個機會簡直千載難逢，我聽到已經勁興奮，我一口就答應咗！
由於我返工班機係飛Melbourne，所以飛完班凌晨機朝早到咗Melbourne之後，我喺酒店登記咗攞完張房卡，嘢都冇擺低就直接用員工飛飛去Sydney，拎完機票先喺機場啲廁所入面換衫！由前一晚喺香港飛去Melbourne飛咗9個鐘，成晚冇瞓我淨係喺Sydney飛去Melbourne呢兩個鐘內瞓咗陣覺。做得cabin crew，就好似用緊生命去旅行。
去到Sydney已經見到Jacky同埋熱氣球阿Steve揸埋車嚟接我，佢架車後面再接住一架專放行李嘅車，車上面就係個熱氣球籃同埋其他工具。我哋揸車揸咗差唔多三個鐘，去到一個叫Capertee嘅地方，聽聞佢係全世界第二大嘅峽谷。
當然第一次坐熱氣球成件事係好amazing，因為呢個揸開熱氣球嘅Steve平時係有參加全球嘅熱氣球比賽，有去過日本、台北比賽，所以我有機會睇埋佢哋由plan成個航行軌道、測風向，到set up個熱氣球、噴火為熱氣球吹氣，到真正升高嘅過程，吹氣嗰陣我仲可以成個人走咗入個熱氣球入面影相，超級過癮！升到空個風景靚到一個點就更加唔洗講。
不過其實呢篇主要唔係講坐熱氣球有幾amazing！
話說我哋去到呢個叫Capertee嘅小鎮，方圓百里都係人跡罕至，更加唔好奢望話會有啲好靚嘅酒店畀你住。我哋坐熱氣球呢兩日下塌嘅係鎮上應該係唯一一間連hotel都稱唔上嘅motel，成間motel只有三層，地下𠴱層係一間細餐廳加酒吧，仲有個有得睇電視嘅common area，第二層就係一間間房，再上一層已經係天台，成間motel都係白色嘅石起成，總之就係好家庭feel。
我同Jacky就係住喺第二層嘅某一間雙床房入面，講到呢度觀眾唔好誤會，Jacky不嬲都當我係細佬咁，成日話我係佢brother from another mother。
重點嚟喇。
話說第一晚，我同Jacky都係房入面，由於沖涼係要出去出面公眾浴室沖，Jacky就準備出去沖涼喇。咁由於呢間motel係相當之簡陋，佢個門係冇門卡，冇密碼，係好傳統用鎖匙開嗰種！呢個時候，Jacky就出咗去沖涼，喺房嘅我就喺度撳電話，玩玩下覺得收到好差，就諗住落common area用佢個wifi！當我出咗房門，落緊樓梯先醒起有樣嘢唔對路！我先驚覺我閂門嗰下唔記得帶埋條鎖匙出門！！！！！於是我就衝返去房門口，用盡方法都開唔到度門！
冇幾耐Jacky返到嚟，佢著住睡衣，沖完涼個頭仲係濕嘅，捧住一堆著過嘅衫問我發生咩事。我就勁內疚咁一五一十話佢聽發生咩事，然後say咗廿句sorry。話明呢間motel係家庭式經營，個老細一收工就會揸車返屋企，第一朝再揸車返嚟開工，加上我哋冇老細個電話，所以只可以等第二朝老細返嚟打救我哋。我哋發現我哋間房隔離有間冇人嘅雙床房，諗住喺嗰度瞓！但注意，我係未沖涼未擦牙未洗面！但都冇辦法啦！
喺間吉房攤攤下撳電話，神奇嘅事又發生了！話說我都叫經營咗個Facebook Page多年，呢個時間我就醒起，可以搵下呢間motel有冇Facebook Page，點知好死唔死又畀我搵到喎！估唔到呢間咁偏僻嘅鄉郊旅店都會有Facebook Page！我即刻inbox佢哋求救！但其實當時已經係夜晚12點，都唔奢望會有咩回應！點知佢哋服務咁好，秒覆我哋！！！！！原來間motel除咗老細，有員工係住咗喺motel入面，個員工就係Facebook page個admin！唔洗幾分鐘佢就拎咗條後備鎖匙上嚟幫我哋開咗度門！
呢個擺烏龍事件真係畢生難忘，好彩最後有驚無險！
點解無那那講起呢件事？冇㗎！我真係好掛住飛囉！而家日日喺屋企真係悶到抽筋！自從失業之後，我有apply全職平面設計嘅工，send咗好多份CV都冇回音，我諗，佢哋係見到我做咗五年空少，經驗完全唔相關，又或者覺得我唔夠定性掛？！
但你問我會唔會後悔做咗空少搞到而家如斯田地，我想講係－絕－對－冇！
我好感激當初嘅自己讀完大學，咁勇敢茂茂然轉行，做一份同自己讀書完全唔相關嘅工作。冇呢五年，可能我淨係日日坐喺辦公室入面，我唔會識到咁多amazing嘅人，唔會見到同感受到世界上發生緊咁amazing嘅事。遊歷令我到大開眼界之餘，令我嘅世界唔淨係停留喺世界上一個圈、一個點；而做cabin crew帶畀我嘅回憶，我諗足以我一世去回味！
疫症之後，我一定會踏上途程，去繼續睇呢個世界！因為我仲未睇夠！咪洗旨意我會定性！我仍然對世界充滿好奇！！！！！好想繼續去探索！！！！！
因為我相信，去旅行才是正經事！！！！！！！！！！
疲症後，我哋一齊再起飛，好嗎？！
我同事個熱氣球page：
Team Cambo Hot Air Balloon Team
#你累計了許多飛行
#你用心挑選紀念品
#你擁抱熱情的島嶼
#你埋葬記憶的土耳其
#你蒐集了地圖上每一次的風和日麗
#旅行的意義
