收市閒情的八卦，Yahoo名人娛樂都在討論

「呢篇文寫得好呀，做乜唔落名呀，諗個名啦，唔好嘥。」

想當日一時興起喺蘋果財經即時新聞寫咗一篇好唔財經，甚至我會稱之為離經叛道嘅「財經」文章，結果上司股榮一句鼓勵，先令「收市閒情」呢個壞過凱婷、咁唔正路嘅千頌C出現。

如果你問我「收市閒情」嘅初心，我會話，我真係希望令財經新聞、資訊更加易入口，入到屋。好多人都同我講，「財經好深」、「全部數字」、「好悶」，但當時做財經記者幾年，其實喺數字、生意、金錢中間，真係有好多好有趣得來又好膠嘅趣事，係值得同大家分享。

悶唔悶、深唔深，我相信一切都只係包裝。所以「收市閒情」一直會嘗試用唔同方法，去整財經新聞張「花紙」，用故仔、用唔同graphic圖片、角度去包裝呢堆銅臭味濃嘅數字，希望吸引到唔睇財經嘅朋友，都會想click入財經版睇我呢篇專欄。學唔學到財經知識？我估學唔到，但我希望你睇完嘻嘻哈哈後，會好唔覺意、好順手咁睇到財經版面其他內容，所以如果有人肯因為睇我個欄、click入財經版，我當我贏啦！

由2014到今日，希望大家都俾我呃過去睇財經新聞，而或睇完個欄，都曾經開心過，笑過。容我在此多謝兩位重要的人，

股榮：沒有股榮，就冇千頌C，多謝你呢九年來放任我試，去癲，令我知道原來我可以有屬於自己嘅小宇宙；

Nick：當日你同講，係因為我個專欄先睇財經專欄，嘿！證明我奸計得逞！多謝你重視呢個專欄，令佢可以曾經有動新聞版本，令我可以有更大發揮。多謝《蘋果》，令我可以喺財經世界度發癲；感謝各位《蘋果》讀者多年來支持。世界崩壞，but we will be fine。

By千頌C

#嬲得滯點都要寫文 #共享經濟 #SharingEconomy 今日財經界最大嘅新聞，係一間上市公司，竟揾咗個22歲、冇履歷嘅女仔去做舵手，擔起CEO重任。呢間公司，正正就係共享經濟集團（1178）。

有心水清嘅讀者，提起我寫過呢間公司。冇錯，當日文章內容大致係講，呢間公司收購咗ECrent，然後口𥚃打著「我要將Sharing economy發揚光大」啲旗幟，實際上係去做一間實實在在嘅殼（半年虧損2793萬元嘅公司，市值5億），旗幟仲鮮明到改埋公司名，四個大字「共享經濟」，慌死你唔知。

一間公司有冇心做，睇佢網頁都略知一二，呢間號稱「全球最大租賃平台」Ecrent，網頁可以話係肉酸到死。

不過好笑嘅係，一間幾乎只係得個名係「共享」，其實係殼股嘅公司，可以光明正大到，喺香港主板上市。相反，一間全球「共享經濟」先軀企業，明副其實係科技巨企嘅Uber，喺香港俾政府視為知法犯法嘅大盜。到底，香港出咗咩事？

Uber喺現行法例係犯法，但正如利世民 所講，家吓個問題係，政府有冇計劃對於現行「不合時宜嘅法例」進行諮詢？

令人喊都無謂嘅創科局，竟話「UberEat都合法啦，證明創新係可以合法進行」，楊大叔啊，這是什麼邏輯？我告訴你，#這是一個揀客嘅的士司機邏輯。

「司機，我想過海去尖沙咀」
「我唔去尖沙咀架」
「你有冇搞錯」
「呢度係中環呀，揀客好正常。我冇話尖沙咀一定唔去，如果我喺紅墈遇到你，我一定車你架」

冇錯，說穿了，所謂創新科技局，就係一個揀客嘅的士佬。你要創新？得！喺你唔會搞到既得利益集團嘅情況下，你咪可以創新囉！你要去尖咀？得！唔過海咪得囉！Uber想攞正牌做生意？冇問題，合法做咪得囉！而大家知，咁係冇可能，而講白啲，大家都知創科局潛台詞係，只要佢唔推冧的士牌價就得。

大家要知，創新科技嘅出現，就注定會衝擊、顛覆現有社會習慣、制度。今次政府怕得失牌主，失去政治籌碼，就向Uber開拖打壓；你覺得將來會有其他便民嘅Startup，因同樣原因被打嗎？

重申一次，Uber現行法規下係犯法，但問題係政府有冇計劃對於現行「不合時宜嘅法例」進行諮詢？

當政府選擇只係做一個揀客嘅的士司機，想搞創新嘅勇士被綁手綁腳，咁仲搞startup做咩啫？反正最終最賺錢嘅「科技公司」，就只係得個名係科技buzz word嘅上市殼股⋯「香港人工智能集團」、「環球區塊鏈集團」、「亞太第一大數據實業」、「宇宙VR國際集團」⋯⋯至於香港，最終窮得只剩下一堆名，同埋一個見過喬布斯嘅創新科技局局長。

利申：我少搭uber，因爲佢哋唔熟路

【Uber筆戰】創科局批「知法犯法」 Uber反擊：中國都立法啦
http://bit.ly/2re3FMj
【人頭有價】22歲「零履歷」少女　月薪6萬　做主板企新CEO
http://bit.ly/2r1RkLG
【收市閒情】改名轉運？得啖笑（千頌C）
http://bit.ly/2rdDnd0

By千頌C

冇理由唔係嘅😃😃😃 #香港係中國一部分🤘🏻 #淘寶應支持一個中國原則🤘🏻 #記住中國係有死刑架
👉🏻今日個欄【收市閒情】一地兩檢 同你計錢（千頌C）
http://bit.ly/2eKWcDP
By千頌C