有位婆婆喺幾個月內都逢星期一四嚟睇醫生，每次佢最尾嗰句都係『張單係咪放咗喺袋入面啦？』
我：「係呀～放咗㗎啦」
婆婆並唔係有咩長期病患需要定時睇醫生…
婆婆一入診所門就如常爽朗地舉起左手大叫：「姑娘呀，同我登記呀」
我：「好呀，你都好準時喎，我都估緊你今日係咪又係呢個時候嚟㗎啦～」
佢：「唔睇醫生有咩世藝～搵醫生傾下計日子易過啲呀」
我：「你今次又係邊度唔舒服呀？」
佢：「冇唔舒服！我不知幾壯健！我隻手指甩皮呀～想拎啲藥膏搽咋嘛」
我：「我有潤膚膏喎，你要唔要呀？俾枝你自己平時搽呀～」
佢：「唔駛唔駛，睇完俾張單我就得㗎啦！我個仔話拎張單返去就得㗎啦」
我：「咁睇法好重皮㗎喎」
佢：「佢都唔在意…」
睇完醫生，傾完一輪計，出埋藥，婆婆照舊：「張單係咪放咗喺袋入面啦？」
我：「係呀～」
婆婆開心的離開診所。
終於有日，一位先生嚟到診所…
佢拎住一疊收據嚟問我：「我阿媽究竟咩事成日嚟睇醫生呀？」
我望望收據…再望望先生：「點解你唔直接問婆婆呢？」
佢：「….我阿媽每個星期就嚟睇一兩次，係咪有咩事？」
我：「不如你直接問婆婆呀～因為我哋唔可以講病人私隱你知㗎～嗰個係你媽咪，你自己問咪仲好～」
佢：「如果我哋平時係有幾句嘅，我就唔駛過嚟問你啦」
我：「或者…你搵日嚟陪佢一齊睇醫生呀？」
佢：「佢係咪有咩大病呀？」
我：「大病呢就輪唔到我哋呢啲普通科診所嘅～」
佢：「咁究竟咩事呀？佢每個星期都睇，每次都就咁擺啲收據喺枱面，我想問佢咩事又唔知點開口，佢平時都唔講嘢嘅」
我：「有時老人家呢，就好似小朋友咁～悶嘅時候都想做一啲嘢引人注意，你覺得婆婆會唔會係想你開口關心吓佢？」
佢：「…..」
我：「下次一於陪佢嚟睇醫生啦～你陪佢一次，可能你會發現婆婆其實唔係冇嘢講～」
佢『嗯』一聲，拎住疊收據離開診所。
婆婆自此冇再嚟過診所搵我哋傾計…
反而我喺大街上見到佢哋兩母子，婆婆挽住佢仔手臂一齊行…
搵醫生 在 #zoom仔搵醫生- YouTube 的八卦
飯前同飯後食大有分別？睇成分比營養標籤更重要！營養師教你點揀維他命｜維他命是否人體必須單方與複方產品分別維他命保健品選擇要訣｜#Zoom仔搵醫生｜#8杯水. ... <看更多>