發達黨
為了遷就兩位在花園道和QRC返工的大哥，小弟由ifc身水身汗走到Citibank tower- 不，Champion tower底的simplylife happy hour。第一次過來，氣氛雖欠奉但勝在夠平，Chimay red只是惠康價卅幾蚊。
他們是我的中學同學，一位在長江中心的某投行做NDF trading，另一位在某prop做index arb；三條光棍細聲講大聲笑，吹水唔抹嘴。但突然之間大家都不自覺停了下來「豎起耳仔」聽旁邊兩個人的對話。
「你搞呢啲嘢咁忙，你條女冇詐型咩？」一個其貌不揚，29+n的女子問，其間不斷以「ABC飄逸式」手法撥動自己頭髮。
「實有啲𠲖𠲖俄俄，但係又想我發達又唔俾我搏殺係咩玩法？」有一點微胖的卅中full suit男一口乾了那杯Stella。
這些一切對話一點特別也沒有，十個有九個半在喝酒的人也是在傾訴生活上的不滿，我們仨完全沒有興趣聽直至到她的一問和他的一答：
「咁你幾時發達呀？」
「年半兩年啦！」
兩年可以發達!!!？唔好話多，在坐的平均計兩球一年，一蚊都唔使兩年都只得四球，宜家四球連華貴邨未補地價公屋都買唔起點叫發達？三條不敢自認金融才俊的契弟立刻「豎起耳仔」聽。
「呢排都係煲緊D廠佬，夾多幾個賣多幾隻殼差唔多架啦。」
這樣一句我以為他做IPO，我也有一些朋友在投行做IBD，也聽聞有不少實業廠商的以待非常渴求敲鐘，但我那些朋友一定沒時間happy hour之餘，也未有耐發達。
「都係融資raise嚿錢投D野...講你都唔明，總之大部份啲投行唔知投資啲錢去邊的話都係搵我嘅！」說罷又喝了啖Stella。
失敬失敬！原來是大人物...但小弟唔認得。立即鬼鼠地whatsapp眼前的兩位大哥問認唔認得這高人。只見他們也搖搖頭。他由始至終也沒有論述他投的是什麼，拋來拋去也是「併購」、「搞LBO」、「搵間PE喺後面」、「set up個fund」等等。
那個女的兩眼發光，繼續撥頭髮：「我最近都投左啲嘢，guarantee回報！」Guaranteed回報？正喎，定期呀？「十幾萬放左九個月，啱啱攞返八十幾萬。」
嘩靠！1000% p.a.! 仲勁過今年發左顛既bitcoin!?
正想聽多少少那是什麼必勝投資可以比小弟學下野之際，誰知那個男的冷笑一聲：「我投嗰啲一年百二倍嫁。」
成支Chimay Red噴返晒出嚟。
投胎呀？120倍？！
難怪這個男的認為可以在兩年內發達！如果我找到一樣東西一年可以翻百二倍，我們一定傾家蕩產，當賣底褲，押埋條命去問地球上所有人去借all in！那些什麼Sir在Facebook也只是宣傳按揭財技做十厘回報，他在說的不是十厘百厘，不是十倍而是百倍！
我們三個對望了一下哭笑不得。
「120倍？我之前10萬變80萬...你等我諗下先..」阿姐，妳真傻定假懵啊？
「10萬變80萬係8倍，我叻D：1蚊變120蚊，10萬變1200萬，10億變1200億！」
大衛高柏飛竟然識排比句，果真叻過DD！
那一刻我真的不知道我究竟應該打電話給誰。證監會，因為有人失實陳述？警察叔叔，因為有人詐騙？抑或青山醫院，因為有人失心瘋？
那個女的竟然真心膠問可不可以投資那剛賺到的八十萬去大衛高柏飛的公司。出乎意料地，誰知道那男的一本正經拒絕了：「我哋玩得呢個遊戲個單位係「億」。早排XX市政府(內地某城市)背景嗰間XX創投先俾咗二千億我哋幫佢投，XXX銀行國際借錢添嘅！」
琴晚成支Corona都噴埋出嚟。二千億條精蟲呀？120倍回報咁咪...你等我諗下先..廿四萬億(2.4e13)？仲多過中央政府一帶一路計劃投資？真的要放長雙眼睇下下年邊個地方政府突然之間變得好疊水。
那男的電話響起，一句「有位喇」；他們雙雙乾掉第二杯Stella後一起如神雕俠侶仙然離去。
這究竟是騙財還是騙色，我看不透。他大大聲一臉正經的表述他的發達之路時我不覺得可笑而是覺得恐怖。又或者我的世界太低級，真的從未見過如此可觀的利潤和紫醉金迷的金融世界。
我們三個六目交投，這一刻我們知道應該應該要打電話給誰了：習大大！
按揭財技 在 按揭財技｜擺脫扣減機制揸兩層樓照套現借足6成｜子非魚| 樓市 的相關結果
轉按套現的按揭成數，一般最高為六成；而有按揭在身者，需再扣減一成。換言之，若有兩層未供完的物業，理論上每層只可套現五成，不過只要靈活運用財技 ... ... <看更多>