《有時都唔明 究竟努力係咪錯？》
政府，好似好鍾意懲罰一類人。
咩人呢？
佢哋冇父幹，白手興家中，
中產未到，小康未望到，
但努力工作，終於叫「唔太窮」。
但努力帶嚟嘅，諗諗下好似係陷阱…
呢班人，有個特點，就係入息上限過咗，
公屋冇份、居屋都唔使諗
（或者介乎於仲可以抽居屋，不過唔會中，但再加人工就過上限）
好，呢班人，我叫佢哋做「十八層人士」。
因為佢哋真係面對緊一個「十八層地獄」。
佢要真正「興家」，得返嘅選擇只有「私樓」。
於是佢就要同一班 「小康人」、「有錢佬」同「大陸暴發戶」爭個死去活來，
如果佢係單身人士，儲咗N年錢，可能都只係買到一個400萬嘅單位。
想層樓新啲，就分分鐘200呎都冇；
想大啲，就要搵返啲35年舊樓。
之後，開始「供一世」嘅遊戲。
不過咁都算好彩，
更多「十八層人士」，
佢用自己budget online一search，
出嚟嘅result只有「村屋」，或者……
「車位」。
「十八層人士」最大鑊係「唔上唔落」，
但好正常，如果你唔係行咩運，
多數喺香港，你冇父蔭，又唔小心努力咗，就會「唔上唔落」
每次派糖，你唔使諗。
助貧？唔使諗；
有錢佬利益輸送？你有排都未到。
不過，稅，還是要交的。
係呀，因為你真係好努力，所以你有一定收入。
仲交得唔少。
當你驚覺自己有種概念－「每個月儲筆錢for交稅」，
就有少少懷疑人生。
因為對「十八層人士」來說，稅是很甘的。
當然，稅相對都叫Fair，
但對有錢人來說，係一種財技玩法；
對收入唔高嘅人，負擔相對較細。
『接近零福利』、『高稅』、『失去公屋居屋權利』，
增增加加減減扣扣，你又回望……
「點解我咁努力，但同啲冇咩出力嘅人，好似差唔多嘅。」
嗱……呢種只係你嘅錯覺。
點會差唔多呢？？
因為你分分鐘，係差過佢哋。
有朋友講過：
「抽到公屋，餐搵餐洗，之後咬綜援，舒服過你做到隻狗咁啦…」
我笑了，因為我反駁唔到。
當然，人應該有大志，應該努力。
唯一自豪係，呢班「十八層人士」係不斷推動緊香港經濟發展。
奈何政府點對佢哋？
「十八層人士」就好似辦公室中，一班最實務，但又唔會辭職嘅人，
永遠被老闆榨乾利用。
甜頭唔會畀，因為佢知你唔會走（或者走唔到啦，唔係個個都有移民嘅資金同能力），會靠自己死做爛做。
今日傳出月入唔過~15K會派錢，
有個朋友唔算讀好多書，但努力做嘢，
上個月好開心地加到16K人工。
我都唔知可以點安慰佢……
有時好無力，真係有努力，你真係想生活環境好啲，
等伴侶舒服啲、等阿爸阿媽過得好啲。
你想有啲人幫你，你想政府可以睇到你掙扎，
出少少手扶你。
可惜，所有嘢一係冇你份，
一係做下樣，拍下你膊頭當幫咗。
當然，要衝上「中產」／「小康」，
「十八層人士」係必經之路。
但條路好似太無助，亦太長太遠。
你點追都好……都贏唔到樓下茶記加價嘅幅度…
都係想生活得似返個人啫…
估唔到，啱啱去嚟做嘢，會唔捨得買一杯Starbuck；
到今日，依然唔捨得買一杯Starbuck。
或者是我不夠努力吧？對嗎？
*小弟唔係經濟學家，純粹個人感受，睇法有誤嘅話還望學習
==========================
有時間可以加埋IG!(冇咩嘢睇，但多私人感受)
https://www.instagram.com/cheungson88/
(ID: cheungson88)
