睇下而家嘅香港，百感交集。
點解個政府死都要搞到香港咁？
即使九七前有所擔憂，
好多冇選擇移民嘅香港人依然(被迫)願意抱觀望態度且看且走。
點知零三年政府硬係要嚟個廿三條立法，搞到人心惶惶。
有好多香港人好似我咁就係喺當年第一次上街遊行爭取撤回方案。
就係咁又過咗幾年，零八年奧運前後幾年，
有好多好似我咁嘅天真香港人，眼見政府冇重推廿三條，
都放低咗戒心，唔覺意咁接受咗大陸。
我哋心諗你唔大力搞我，肯維持一國兩制咁都ok啦。
但都唔知算唔算好彩，政府冇見好就收，
喺一二年前後硬推國民教育科，迫醒香港人再一次出聲反對。
之後一四年雨傘一六年魚蛋，政府開始完全露出真面目，
仲有接落嚟嘅一系列打壓，迫到市民忍聲吞聲咗幾年。
然後今年，佢哋又再得寸進尺…
曾經嘅無力感，最終化成加倍民憤反噬。
其實唔使分析報告，一般人都睇得好清楚，
呢廿二年，越係要用政策加速中港融合，民憤就越大；
反而政府唔好搞咁多嘢嘅時候，好多香港人係ok的。
明明只要呢廿二年肯好好咁落實返最初承諾嘅一國兩制，
有好多香港人都已經收貨，已經唔得閒同你個個禮拜上街，
已經唔會甘願放棄自己前途抗爭，已經唔會犧牲身體甚至性命。
香港人都算易呃的。
但特區政府同中央政府偏偏冇咁做到，
係都要不斷用政策破壞一國兩制。
公司有病，我哋都可以辭職揀過另一間。
政府有病，普通市民可以點？
從來都係官迫民反。
個個禮拜遊行，政府唔理。
有幾個人以死明志，政府唔理。
有個阿伯絕食咗十幾日，政府唔理。
呢排好多人都會慨嘆互相問件事可以點收場，
唔係覺得對方會有咩真知灼見，
而係大家都深深明白，
如果呢件事有最圓滿嘅終極解困方法，
同過去22年一樣，個方法只會係掌握喺政府手上。
不過最令人無語嘅係，似乎政府呢次真係打算死撐到底，
兼且而家嘅香港人，好似完全唔同一四年嗰時咁，
完全唔會話同你灰心，完全唔會話咩無力感。
更大嘅打壓，怕且只會換嚟更大嘅向心力同反撲。
政府唔帶頭回應訴求，接落嚟嘅日子，
實在冇人可以預計到，仲會有幾多不忍睹嘅悲劇發生。
