我同我阿媽嘅感情，大概可以用一張相嚟概括。
呢張相，拍攝於2019年5月。我同我阿媽好少去旅遊，因為我地兩個都唔係旅遊控。反之，我阿媽好鍾意飲茶，所以一到週末，我地一定會撐枱腳。果一次，我地去左台北度玩幾日，又嚟到十分放天燈。我阿媽係一個虔誠嘅女人，佢會裝香、拜神。每年年頭、年尾，佢都會幫我地作福、還神。
首次接觸天燈嘅佢，起初表現得相對冷靜。佢個心諗緊乜，做仔嘅我知道得一清二楚：佢係想搞清楚自己求緊邊個，同衡量求完之後係咪要嚟還神。後來我地放咗兩個天燈：第一個係我同獅帽、牛仔熊仔一家人；第二個係我哥哥一家同我阿媽。搞掂無耐，我地準備走喇，包車司機已經等緊我地。
忽然，佢話想放多個燈。起初我反對，甚至有少少感到不耐煩。但係佢堅持，直到佢喺新嘅燈上面寫出願望嘅時候，我個心溶喇，仲差點掉下淚來。「順利成功，6月23日講座，賓客滿座」呢個本來只係將自己嘅願望搭單寫埋喺大仔個燈度嘅人，卻再開一個燈，想必呢個願望對佢嚟講好重要。
我阿媽會嚟我每一次講座，佢會送花俾我，粉絲都應該見過。佢會睇我每一個節目，like我每一個po。佢會擔心我嘅工作，仲會每年幫我打小人。就是這樣，滿滿的愛，無微不至。就算我已經咁大個，每次同阿媽出街，我都會拖住佢嘅手。願天下兒女，每一日孝順；願天下母親，每一日快樂！
#母親節快樂
