【完屆感言】 #Farewell Tanya CHAN 陳淑莊
今日係今屆立法會期嘅最後一日，4年前嘅我真係無諗過會咁漫長、咁曲折。如果大家願意，好希望趁呢個機會同大家分享我其中一項或者唔太起眼，但係我好自豪嘅政績。
記得2017年10月，我認識到一班媽媽，佢地係一班不幸流產嘅媽媽，佢地係—班被迫要將BB當成「醫療廢物」送去堆填區嘅媽媽，只係因為佢地懷孕不足24周，政府唔願意當佢地嘅BB係一個完整嘅生命，所以唔能夠批出文件俾佢地安葬。
我仲好記得第一次聽住佢地講自己嘅故事，講到哽咽，講到流眼淚。果一刻嘅心噏，作為一個爸爸、作為一個議員係好想好想即刻做到一啲事幫到佢地。我同同事立即研究法例、約食衛局見面、去各個政府墳場實地視察、去搜尋胎兒火化爐價錢，甚至約醫護社工傾哀傷輔導等等……但係政府都要用足足一年，直到2018年10月我地第N次同食衛局開會嘅時候，佢地終於確認將會運用「行政安排」，喺各華人永遠墳場將會設立「寧馨園」作為嘅小BB安息之處，亦會喺和合石覓地做火化措施。
終於，我可以對呢班媽媽有一個交待。
正如我啱啱睇翻我當時幫呢班媽媽拍嘅一段短片時，見到一位爸爸喺今年2月留言俾我，佢話：「多謝你哋嘅爭取，可以令我22周嘅兒子有個安息之所，數日前，已把兒子落葬，他從此不再寂寞了」。呢類「小政策」從來都唔受傳媒青睞，亦未必個個留意、關心，但只係爭一個人指出嚟，迫政府做啲小改動，就有好多人嘅人生得到改變同慰藉。或者，呢個就係我堅持想繼續做議員，繼續服香港嘅原因。
#好希望香港人唔止記得企喺前線嘅我
#我都做好多政策
