銀牌！！！香港運動員好野！
何詩蓓多謝你，香港運動員，多謝你哋。
題外話，開電視嘅旁述真係好好，尤其是搵咗珊珊同森哥做主持，佢地又Humble又大方得體。頭先何詩蓓攞牌，森哥講咗兩番話說令我好感動 (大約記得係咁)：
「何詩蓓一場比賽游咗160手，贏咗奬牌；但係一個運動員訓練一年，聽乒乓球教練講，乒乓球手一年要打約百幾萬手，風帆運動員要拉帆拉約70-80萬次，你話何思蓓一年游咗幾多百萬手水先可以游出呢160手嘅成績？ 每個運動員唔係講緊一年嘅訓練，係講緊10年以上。所以奬牌背後，運動員真係付出咗好多。」
「其實依家證明咗香港嘅年輕人係得嘅，以前我哋成日講獅子山精神，依家香港運動員佢哋係為獅子山精神賦予新定義，就係堅持永不放棄，香港人係得嘅。」
睇到我眼濕濕呀，痴線！
當年某八婆話體育係無經濟效益，先唔好講呢個POINT係幾咁廢，單係運動員嘅團結大家、體現體育精神同振奮人心，花幾多銀彈都未必做到。激動人心，團結世界嘅體育精神，對於排除異己，自己大晒，見高就拜弱勢就踩嘅人，係永遠唔會明白呢種高尚情操。
恭喜香港運動員，再次感謝你哋為香港人做嘅事。
以森哥嘅說話作結：「珊珊係香港最差嘅時間，攞咗一面金牌；依家又係最差嘅時間，張家朗攞第二面金牌。」的確係香港最差嘅時間，香港人堅持不放棄，為自己創造新氣象。
香港人加油，香港運動員加油！
#我要送飛吻呀
