我要問埋小米先的八卦，Yahoo名人娛樂都在討論

Fitbit 話我條粟米有心跳
Garmin 又話我條粟米無心跳
大家話，我究竟食唔食佢好？

Garmin Hong Kong
Fitbit
#我要問埋小米先

小米10 Lite 5G 開箱！貴為香港5G最平行貨手機，究竟喺上網速度、夜拍同埋操作上追唔追到旗艦機？同Galaxy S20 Ultra 5G比較又係點？今集Z世代達人同大家詳細分析！xiaomi 10 lite 5g

之前同大家介紹過嘅5G性價王小米 Mi 10 Lite 5G，大大降低咗5G嘅入場門檻。好多朋友都問可唔可以試下呢部機，咁今日就同大家倣個開箱！

小米10 Lite 5G 用咗高通 Snapdragon 765G 處理器，雖然唔係旗艦級嘅處理器，不過呢粒優化嘅7系高通U亦完全唔輸蝕，首先試吓用5G開網頁同埋睇串流影片，完全無問題！試埋下面有走馬燈嘅複雜串流先！效果一樣流暢！分屏多功使用下，Mi 10 Lite 5G 亦唔見有Lag嘅情況，對於呢粒 SnapDragon 765G 嘅處理器效能同埋小米喺軟件上面嘅優化都相當滿意。

根住我就嚟到旺角，用 Mi 10 Lite 5G 加 csl. 5G 做個測速 5G speedtest！雖然去唔到5G嘅理論峰值，不過睇到時延唔算高，放埋Samsung Galaxy S20 Ultra 比較，速度都差唔多，Mi 10 Lite 5G 絕對無將貨就價！

試埋相機先！小米10 Lite 5G 配置咗4800萬像素嘅主鏡頭、同埋8百萬像素嘅超廣角、2百萬像素嘅景深同埋2百萬像素嘅微距共4個鏡頭，一般生活上嘅景物絕對難唔到佢，微距亦做得好細緻！近年好多朋友都會留意嘅夜拍，我就揀咗影青馬橋嘅夜景，Mi 10 Lite 5G 都Handle倒，放大張相睇下，雜訊唔算高，亦相當細緻，呢個價錢嘅機嚟講，收貨有餘啦！

小米10 Lite 5G 支援兩張Sim卡，不過就無外置記憶卡插位，對於呢方面有需求嘅朋友就會有啲失望喇。另外，如果要用到5G服務，暫時部機就只可以開一張Sim卡，即係要用雙卡雙待就唔可以用5G，不過官方表示，未來將會以更新推送形式，令手機支援5G+4G 雙卡雙待，現階段就唯有等等喇！

比較特別嘅係，呢部機保留咗3.5mm耳機插頭。雖然無線耳機已經相當流行，不過我個人覺得，總有機會要用到呢個插頭，好似我要錄音Clip咪咁，所以都有一定嘅保留價值㗎！

呢部機亦都支援NFC功能。雖然用唔到八達通拍卡買嘢，但係就可以用Google Pay加入信用卡喺各大商戶消費，亦都可以安裝八達通App查餘額或者幫八達通增值。

另外，好多時我買機都會睇下部機支唔支援Wi-Fi分享。唔好同熱點分享搞亂，Wi-Fi分享係可以將你手機收到嘅Wi-Fi分享俾其他機用，有部份機係唔支援㗎！睇下！ 開咗熱點分享之後，Wi-Fi亦無斷！最啱就係出Trip遇到酒店Wi-Fi有連接限制，咁就唔怕有機無Wi-Fi用啦！

以HK$2499嘅價錢來講，呢部機算物有所值，想上5G但又唔想買貴機，呢部小米10 Lite 5G相信都會係你嘅選擇！

Mi 10T Pro 小米10T Pro - 小米喺 2020 年 9 月 30 日發佈咗三款 Mi 10T 系列手機，分別係旗艦級 10T Pro、 10T 同中階款 10T Lite，我哋今日同大家介紹10T Pro同10T先！

Mi 10T 系列主打頂尖效能，對螢幕同影相上都有針對性嘅功能。兩款手機都配置高通旗艦級 Snapdragon 865處理器，亦配置 LPDDR5 RAM 同 UFS 3.1 內存，全系支援 5G，可見今次小米誠意十足！10T Pro 外型有黑色，銀色 同 藍色 三隻色，而 10T 亦有 黑色 同 銀色 兩隻色。指紋辨識同電源鍵就二合一放喺機身側面。兩者都支援 NFC， 同時都內置紅外線收發器，不過就無 3.5mm 耳機插。Mi 10T Pro 同 Mi 10T 支援 Wi-Fi6，亦比上一代支援更多 5G 頻段，不過仍然唔支援部份台於結界使用嘅 n79 頻段。不過隨住 n1 頻段嘅推出同普及，覆蓋嘅問題相信唔會太嚴重。

屏幕方面，小米 10T 同 10T Pro 都採用咗 6.67 吋 FHD+ IPS LCD 螢幕，螢幕比例為 20：9。兩者都支援 144Hz 螢幕刷新率，同支援 Adaptive Sync 技術。螢幕動態刷新率範圍好廣，由 30Hz 到最高 144Hz，屏幕會根據唔同嘅場景去調整刷新率，確保 Mon 靚嘅同時，亦唔會嘥電，根據官網所講，6 個鐘頭重度使用可以省到 8% 電！部機仲內置咗 MEMC 功能，令畫面更清晰同流暢。唔只咁喎，呢個 mon 亦支援 DCI-P3 色域， HDR 10 認證同最高亮度 650 nit、同德國萊因低藍光認證，螢幕質素相當高㗎！

攝影方面，10T 系列採用三鏡頭設計。10T Pro 主鏡頭用咗 1 億 800 萬像素 Samsung HMX 鏡頭，支援 30 倍混合變焦。而10T 用咗 6,400 萬像素 Sony IMX682 主鏡頭，兩部機另外配置咗 1,300 萬像素 嘅 123度超廣角鏡頭，同埋 500 萬像素微距鏡頭，質素絕對有保證！前置鏡頭方面，就用咗 2,000 萬像素打孔式鏡頭。

攝影效果方面，10T 系列今次提供咗 6 種唔同嘅長曝光模式，例如Photo Clones，將自己分成幾個分身放喺同張一相入面，Star trails 創造星軌效果，甚至有 Neon Trail 車軌模式添！夜拍方面，內置咗 4 種Filter 包括 Cyberpunk 同 Blackice，令到你嘅夜晚更加有味道！ 拍片方面，今次 Mi 10T pro 支援 8K 30FPS，隨手一拍，都做到電影級細緻嘅效果！

Mi 10T 系列 內置 5000mAh 電力，亦支援 33W 有線快充，唔洗一個鐘可以充滿電，隨機送埋快充插頭，而且加入咗 MMT 充電技術，以雙電流主導，減低電阻影響充電嘅速度，無論喺低電量定高電量嘅情況下，都可以保持穩定嘅充電速度。

Mi 10T系列內置 6GB 或 8GB 記憶體，配合 128GB 嘅儲存空間，定價為 499 歐元起。而 Mi 10T Pro 8GB記憶體配合128GB或 256GB嘅版本，定價為 599 歐元起。港版官方暫未公佈售價，大家要留意吓啦!

#mi10tpro #mi10t #xiaomi10t

redmi9 紅米9 以超高性價比HK$999開賣，呢部有四鏡頭、NFC同真三卡嘅人門機性能又係點呢？今日就同大家睇下！2020新機 redmi9 開箱評測 萬能遙控 xiaomi redmi9 紅米2020新機 redmi 9 review 開箱文 Google Pay

打開機盒之後，除咗手機本身之外，盒入面亦包咗手機軟膠殻、Sim卡針、2A充電插頭同埋一條大USB頭去TypeC頭嘅充電傳輸線。搣開手機保護貼，睇睇個真身先。我就揀咗「晚霞紫」色，睇落外觀唔錯，手機頂部係紅外線收發位，手機嘅右側就係音量同開關掣，底部就有3.5mm耳機插頭同埋USB-C插頭。以入門機嚟講，規格算係OK有突。

redmi9 紅米9 手機正面嘅6.53寸水滴全屏幕效果可以接受，機背亦都用上咗4攝AI鏡頭技術，分別係1300萬像素嘅主攝廣角、800萬像素嘅超廣角、500萬像素嘅微距同埋200萬像素嘅景深鏡頭，陣間再同大家測試拍攝出嚟嘅效果。

Sim卡位喺手機嘅左面，Redmi9 採用咗真3卡設計，同時支擾2張Nano-SIM卡同埋1張MicroSD記憶卡，補番得32GB內存空間嘅不足。支援雙4G同雙VOLTE功能，收發電話唔需要跌番來3G。不過以手上嘅版本來睇，暫時就唔支援VoWiFi功能。

等我爆咗部機試下先！爆完，試下用瀏覽器上一般嘅網頁。可能係啱啱爆完機，又或者背景有嘢做緊，開瀏覽器嘅時候唔太順，反應慢咗少少。不過呢個情況過咗一陣就冇喇，Click落Link以至睇網頁入面嘅片都算順暢。

試埋要求資源較大、有走馬燈嘅新聞直播先！之前試入門機，呢個位都唔太順，不過Redmi 9 紅米9 嘅表現就無問題，睇咗2分鐘有多，中間無疾或者停過，收貨！

小米亦都喺紅米9 Redmi9 加入分屏功能，咁就試下啦！只要喺開咗嘅程式介面長撳住其中一個App，就會出現多個選項，揀番分屏，呢個App就會去咗畫面嘅上面。再喺下面開另一個App，就可以同時操作兩個程式，唔洗撳來撳去！上面一路播緊Video，下面睇Email，Redmi 9 嘅表現一樣流暢，抵讚啦！

頭先講過，Xiaomi Redmi 9 配置四攝鏡頭模組，影相出來嘅效果又係點呢？ 首先睇吓幾張日常嘅風景相，問題絕對唔大，色準同對焦都無問題，放大睇下啲細節位！雖然細節位唔算Sharp，不過唔洗1000蚊嘅四攝入門機，都應該唔會有太高要求！俾大家睇埋微距同景深嘅表現！ 好喇，再睇埋夜景！

總括來講，四個鏡頭表現中規中矩，但係加埋價錢呢個因素，三個字，無得輸！

呢部入門機亦罕有支援NFC、即係可以用到八達通App查數加增值，亦都支援Google Pay。 試下加張TapNGO 落Google Pay去便利店買嘢先！ （出 Approved Screen就去下個畫面）

小米系列嘅手機近年都有部份配置咗紅外線傳輸功能，Redmi 9 就係其中一部。手機內置咗呢個「萬用遙控」嘅功能，入面收藏咗多款唔同電器嘅資料，可以幫你配對，將電話當遙控用。你亦可以去Play Store下載其他有學習功能嘅遙控App，以後搵唔到遙控都唔緊要啦！

呢部機內置咗5020mAh嘅電量，唔只夠自己用，用USB-C線仲可以幫其他裝置充電，當埋後備電用都唔錯呀！

#redmi9 #紅米9 #Z世代達人