上一篇講完溝女/仔，今日我地講下點樣keep住條仔。你問我如何能夠駕馭一個男人？很簡單：下廚就行了。
唔好咁快咁反感，話我物化女性先，我唔係叫你日日都煮變做黃臉婆，一星期煮兩三次，其餘時間出街食又得、叫佢煮都得，簡單20-30分鐘的菜式，避免煎炸，盡量挑快捷的食譜不佔太多時間也不需要太多功夫。
如果你對於下廚的意義是：要綁著男人的心，就要綁著他的胃。方向是正確的，但你還是沒搞清楚下廚的真正戰略意義和價值，所以還是會出現明明綁住了男人的胃，卻不敵隔離飯香的尷尬情況。
只要是人類，心底裡總是少不了一顆炫耀的虛榮心。你是女人，你同人講「我男友高大威猛英俊多金，胸肌仲好結實」全世界都會為你感到高興。你是男人，你同人講「我女友玲瓏浮突靚女富豪，胸部仲好柔軟」全世界都會當你係變態。女人碌男人的附屬卡叫萬千寵愛在一身，男人碌女人的附屬卡會被叫吃軟飯。
男人，能夠炫耀自己女人的方式，其實很少。但是，正如上文所言，每一個人都有一丁點的虛榮心，會想要告訴全世界「我女人真係好好」，這時候，就是展現你廚藝的好機會。弄一頓無論味道和賣相都見得到人的晚餐，就能一次過滿足男人兩個願望。你下廚不止是要綁著他的胃，還要讓他自己打從心裡，覺得自己是可以向全世界曬命幸福的男人，這餐飯已經成功了一半。
黎到呢度你可能會問：下？搞咁多野就係為左俾條死佬曬命？！
車～情人節你在辦公室收99枝玫瑰，之後捧住紮花周圍巡，唔係曬命，唔通你係提早拜山，預早祭奠那班即將OT過勞死的同事咩？
拍拖就係咁架啦，我俾你威下，你俾我威下，有來有往就係咁簡單。
當然，這樣是不夠你去駕馭一個男人的。人妻先生作為一個digital marketing specialist，我會強烈建議你：一定要擺上網。
擺上網唔止係炫耀咁簡單。十個男人九個滾，剩低一個仲諗緊，出得去玩，個個都話自己single，單手在褲袋裡一秒除結婚戒指是天賦技能。但各位姊妹也不是吃素的，通常問完名傾幾句後，都會問下拎facebook做個「盡職調查」，或是私底下掘佢個facebook睇一睇。如果一開佢facebook就每星期兩三張張擺明係煮家菜的相，我諗各位姊妹都會停一停、諗一諗。
當然，搶人條仔最開心，我唔否認有啲人係有鋪搶野癮。如果你煮出黎個賣相係都見得下人，對方淨係睇張相，隱約都感到呢個男人背後的女人道行不淺，大概都不會優先攻略你男友。扒手往往取易不取難，佢要搶都搶第二個先。
最後，你當我上面講的全屬廢話，唔緊要，煮食本來就是一門生活技能，不論男女本來都要識，就算有沒有男朋友，你也應該去學。最糟的情況，不能取悅別人，起碼還能安慰自己。
#賣相係重點
#如果唔係佢post完俾老友恥笑會引起反效果
#我很醜但我很美味係唔work架
#攻胃為下攻心為上
#記得你煮完佢要負責洗碗
#搶我老公冇問題
#你餐餐都煮到呢個水準咪黎搶囉
#你搶得走我送三個月狗糧都仲得
#就算我老公肯食你都唔代表佢敢吞
#𡁻完兩下吐返出黎我替你難過之嘛
#氣定神閒
#好老公育成計劃
#順手問下有冇人知道倫敦邊度有金華火腿賣呀
