有日一位太太嚟到診所。
佢行埋嚟問我：「有冇醫學癖臭香香嘢買呀？」
我：「我哋冇呢啲嘢買」
佢：「冇㗎咩？咁你哋平時用咩去癖味呀？」
我：「你指清潔方面呀？拖地抹嘢我哋有清潔姨姨做，我都唔係好清楚佢用咩抹呀，不過我諗都應該係超級市場買到嗰啲清潔用品嚟啫」
佢：「超級市場買到嗰啲啱人飲㗎？我做咁耐人都冇聽過可以飲喎」
我：「…清潔用品唔可以飲㗎，我講緊嘅係拖地抹嘢咋，你係咪覺得有邊度唔舒服呀？一係同你登記同醫生傾傾呀」
佢：「唔係我呀，我幫人問咋」
你就是你朋友系列嗎？
我：「你朋友唔舒服嘅話嚟睇醫生啦，始終我哋都唔知你朋友咩事嘛，就咁講冇用嘅」
佢好大反應：「我好清楚佢㗎！」
知啦知啦，唔駛咁大聲，你朋友即係你呀嘛。
我：「嗯…明嘅明嘅，不過睇醫生都係佢本人睇好啲，因為有啲檢查要做嘅時候都需要係佢自己本人嚟㗎嘛」
佢靜一靜諗一諗。
佢：「我而家係佢啦，佢上咗我身啦」
…醫生，我唔撈啦，搵潘紹聰嚟主持大局好嗎？我返去睇<晚吹>得啦。
我：「嗯…咁呀…你俾身分證我啦，要登記睇醫生啦」
佢：「我入去係咪唔駛俾錢？」
我：「入去睇醫生就要俾診金啊，就算到時你唔需要藥都要俾診金」
佢：「咁唔睇啦，佢啱啱走咗啦」
醫生呀，不如我晏啲去買對紅筷子貼喺登記處？
