感謝讚賞🙏🏾
#我仲做到學生嫁
*嚴禁劇透*
*粗口自行過濾*
*可瘋狂話戲屎但免人身攻擊*
**立即重溫**
http://viu.tv/encore/vr-exorcist
[1230隔夜超短劇評][ViuTV][VR驅魔人 EP05]
[讚] 點~解~咁~感~動~嘅？ 吳浩康 Deep Ng演孝哥上一集單挑已經將呢個單元嘅感覺建立咗出嚟，今集加埋飾演Calvin嘅林耀聲、少年孝哥嘅陳健朗，仲有飾演孝嫂嘅陳逸寧，個個演員都做得好好，角色出場短少嘅都有血有肉。王貽興將故事同電影《半支煙》掛勾，就算你冇睇過套戲，你都應該有聽過謝霆鋒首歌，唔使從頭build up成個感覺，借力打力，而內容都夾得非常好。
《半支煙》裡面嘅豹哥（曾志偉 飾）（咦，孝哥同豹哥係咪拎咗個音係影射？）希望搵返當年只係留低半支煙嘅阿南（舒淇 飾），嗰種漫長嘅等候同孝哥係一樣嘅。豹哥就靠煙仔（謝霆鋒 飾）搵阿南，孝哥就靠VR二人組去搵Calvin。首《愛後餘生》一起，已經好正，食埋嗰半支煙，仲要講「支煙熄咗，以後你就要忘記我」，嘩，入心呀，我立即交咗兩行眼淚。
講返演Calvin嘅 Lam yiu sing 林耀聲，做呢啲鵪鶉角色真係駕輕就熟。今次無論係喺班房同K房挑逗少年孝哥、畀社工跌、自殺一幕都好入肉。少年孝哥 陳健朗 Kinlong Chan都係好勁，短短時間已經感覺到外剛內柔，非常準繩。兩個人喺課室畀人起哄然後少年孝哥打Calvin嘅段真係好出色，演得非常咁好，兩位嘅眼神真係好有愛呀，所以睇到人好心痛。（林耀聲真心正，嚟緊佢會去馬拉拍套香港電影，希望快啲有得睇，亦都希望佢多啲發揮機會）
當然 Isabel Chan 陳逸寧演嘅孝嫂亦好精準，嗰滴眼淚係畫龍點晴嚟。王貽興話下次有機會要寫多啲戲畀Isabel，好在係下次咋，因為我覺得今次真係短得嚟非常準，有餘韻嘅。孝哥等嗰半支煙、半首歌好慘。孝嫂等嚟等去都等唔到孝哥個心，都好慘呀。
btw，《家有囍事》個眼屎係用得幾好喎，嗰個時代嘅中學生應該受到周星馳嘅嚴重薰陶，日常生活用嚟溝仔溝女講笑真係合情合理。《國產零零漆》嘅《李香蘭》就feel到當bonus，feel唔到冇影響。其實李香琴同埋阿漆都係相愛而不能愛嘅一對。
楊天命都幾有喜感，不過畀人搶晒fo。
[彈] 成集都真係唔錯呀，要挑剔嘅係訓導miss把聲成日走音我覺得好影響…同埋皮蛋王 Sunny 係天台燒嘢畀Calvin嗰度啲口水多咗。其實都唔使講話孝哥畀人踢出校入黑社會，直接講話孝哥點解上位咁快就係因為佢想行先死先去見Calvin，畀多啲空間時間去營造感覺我會再感動啲。
[伸延閱讀]
(1) 王貽興講返今集 >>>
https://www.facebook.com/yihingong/posts/1982480971794255
(2) 想睇多啲Isabel嘅演出，有呢套港台《 獅子山下》嘅《斷線》，Isabel做主角，一樣係正。立即重溫 >>> http://www.rthk.hk/…/pr…/belowthelionrock2017/episode/468463
(3) 電影《半支煙》主題曲《愛後餘生》 謝霆鋒 >>>
https://www.youtube.com/watch?v=lGoVn9uxF2E
(4) 電影《國產零零漆》插曲《李香蘭》周星馳 >>>
https://www.youtube.com/watch?v=x_h1lnFOv0M
(5) 睇完套劇個腦仲響起埋呢首：「為何戀愛可以當做吸過半支煙」
《我的天》張敬軒 >>>
https://www.youtube.com/watch?v=-cDq9maci4w
[演員表]
王貽興 飾 皮蛋王 / 劉翁 飾 Sunny / 林耀聲 飾 Calvin / 陳健朗 飾 少年孝哥 / 吳浩康 飾 孝哥 / 陳逸寧 飾 孝嫂 / 彭浩翔 飾 警察A / 楊天命 飾 朱朱朱朱朱孝天
#1230隔夜超短劇評 #ViuTV #VR驅魔人 #王貽興 #劉翁 #吳浩康 #林耀聲 #陳健朗 #吳浩康 #陳逸寧 #彭浩翔 #楊天命
