精神病加戀愛，
香港有《幻愛》，
外國有《失戀自作業》。
—
兩套戲都圍繞住同一個命題，
為了被愛，
人需要是完美嗎?
—
喺《失戀自作業》入面，好強調"Excelsior"呢個英文字，意思係精益求精，盡善盡美。電影嘅第一幕戲，係男主角PAT喺屋企自言自語，佢好希望做到完美，包括讀多啲書，減肥，控制好情緒，因為佢相信一旦自己變好咗，佢嘅前妻就會返番去自己嘅擁抱，所以佢同佢老豆講"I am remaking myself."
—
可惜，PAT並唔完美，而且仲有好多缺陷。而最大嘅[缺陷]，在於佢有躁鬱症，大部份鄰居都怕咗佢，佢講嘢直接，不斷得罪人，喺社區入面生活經歷好多唔同嘅困難，例如有禁制令，阻止佢再騷擾前妻，有人當佢係動物咁訪問，同事避之則吉。然後，佢遇上咗女主角TIFFANY。
—
喺PAT同TIFFANY相遇嘅第一晚，普通幾句傾精神病藥物嘅對話，已經將兩個人連接喺同一個頻道上面。TIFFANY好快就愛上咗PAT，佢講嘢直接，但偏偏，正正係因為兩個人都直腸直肚，兩個人嘅相處啱啱好就無違和。PAT失去咗佢最愛嘅老婆，而原來TIFFANY都係死咗老公，兩個人都有隱忍不言嘅傷痛。
—
而面對傷痛，PAT選擇逃避，所以佢一聽到自己以前婚禮嘅果首歌，就會發癲；但TIFFANY選擇面對，因為佢嘅性冷感令佢老公車禍身亡，但之後佢選擇瘋狂搭上唔同嘅同事，直視自己嘅陰影。兩個人相遇嘅第一晚，TIFFANY話自己已經唔係蕩婦，但佢仍然求愛，因為佢真心鍾意PAT。
—
喺電影入面，除咗兩位主角同佢啲院友，其實其他角色唔多唔少都有啲自己嘅缺憾，例如西裝友朋友因為壓力而有焦慮，PAT爸爸有強迫症仲好迷信。就算呢班喺社會上SO CALLED無病嘅人，其實佢哋都唔係完美。好多人都因為自己嘅一啲缺陷或者唔好嘅地方，而驚去愛，但《失戀自作業》話比觀眾聽，感情關係，甚至係做人，唔係需要Excelsior，而係需要彼此配合，互補長短。
—
兩個人喺萬聖節第一次約會，呢場戲我好鍾意。節日夜晚出街，唔係去浪漫嘅燭光晚餐，竟然係去類似快餐店嘅地方開飯。兩個人，男嘅著得好隨便，而女嘅就著得好隆重，其實兩邊都著錯衫。比著係普通人，可能係因為咁而尷尬，但佢哋兩個人都有情緒問題，兩個都不熟人情，但反而就可以互相配合，男嗰個食麥皮，女方就求其叫杯茶。
—
PAT喺電影嘅最後，同TIFFANY講"The only way you can beat my crazy was by doing something even crazier." 無最好最完美嘅人，只有最適合自己嘅人。
-
呢個世界可能唔完美，自己同對方可能都唔係完美嘅人，但有了你，誰還需要完美。
戀愛冷感症 在 thread:[俳句] 戀愛冷感症- haiku - 批踢踢實業坊 的八卦
‹ 看板
精華區
最舊
‹ 上頁
下頁 ›
最新
[俳句] 戀愛冷感症
... <看更多>