甚麼是良好管治？見微知著，其實好簡單。收到QCOBA來信，諮詢對校園移除一棵健康欠佳、但學生很有感情的70年歷史老樹的意見，明言老師同學家長舊生都是stakeholders，也提出樹木移除後如何保留部份作展品。記得幾年前，另一些老樹無聲無息被移走，引起強烈反彈，新校長明顯有做功課，也汲取了經驗教訓。假如政府可以這樣，怎會淪落至今日那樣？
//以下內容來自皇仁書院環保教育組
唔知大家有冇留意到皇仁嘅校舍入面種咗唔少樹呢? 其實無論係LAWN, NORTH COURT 隔離 定係曉陽角我哋都可以見到不同種類嘅樹木。而喺學校門口就有一棵高11米，樹冠寬7米嘅石粟。唔講唔知，呢棵樹由我哋 1950 年遷入宜家嘅高士威道校舍開始已經屹立喺門口，有成70年歷史。
-
然而近幾個月嚟，佢嘅健康狀況開始出現咗問題，例如葉片呈萎黃色，樹幹更出現輕度嚴重嘅懸吊樹枝情況。而由學校喺九月頭委托公司做嘅報告亦提出樹整體上嘅茁壯程度屬於「差」嘅級別，又呈現菌類子實體。報告同時指嗰棵樹有整棵倒塌嘅風險，有機會危及皇仁書院同學、停車場、建築物結構、高士威道行人及行車道嘅安全。
-
有見及此，校方喺諮詢舊生會、家長教師會、老師及本校環保教育組嘅意見後，考慮到校內師生及校外行人嘅生命同財產安全，決定移除該樹木。由於移除工程需要一定時間完成，而且對鄰近人士及固定結構構成安全風險，校方現將樹木移除工程定於2019.11.15，亦即係本校水運會初賽當日進行，務求以 將同學及其他持分者嘅影響減至最低嘅前提底下，安全咁進行工程。有關樹木移除後並不會全部直接丟棄，現時校方仍積極研究緊唔同嘅方案，例如將部分狀態良好嘅樹木留作展品等等。如果同學對於以上移除樹木或其他後繼處理方式有意見，亦歡迎大家同我哋講下。
-
我哋環保教育組希望透過呢次嘅事件提提大家樹木保育同規劃嘅重要性，更重要嘅係要提下大家善用紙製品，喺日常生活中改變習慣以減少源頭伐木。所以嚟緊幾日我哋將會推出一連串嘅樹木專題，除咗會講解下菌類對樹木生長嘅影響，亦會分享一啲日常減少用紙嘅TIPS俾大家。同學如果有興趣亦可以睇下禮堂外嘅展板了解更多㗎！//
