【有冇人同我女朋友一樣，每次搭地鐵經過美孚站都會收到神秘短訊？】（一）
我諗，有緣見到呢個 post 嘅朋友，當中應該有唔少人每日都會搭地鐵經過美孚站。今日，我想喺度同大家講一個秘密……若果，你哋有人試過喺美孚站收到過神秘短訊嘅話，千祈唔好無視咗佢。因為，你嘅無視，隨時會害死好多人，包括你自己……
睇到呢度你哋可能會不以為然。放心，我會慢慢將自己嘅經歷講出嚟，或者講到咁上下你哋就會相信。但點解我偏偏選擇今日先講呢件事？因為只有喺愚人節，成個網絡充斥住假消息嘅時候，先有可能逃避「佢哋」嘅追查……
但就算逃避唔到都冇所謂，我早就已經抱住必死嘅決心……呢件事已經徹底改變咗我同女朋友嘅命運，我唔想再有更多受害者出現。
你哋仲記唔記得上年七月廿八日夜晚荃灣線出現過信號故障？當時，我同女朋友正正就喺某架列車裡面……因為慢駛嘅緣故，所以已經逗留咗喺美孚同荔景之間隧道一段時間。
「阿宗，你發唔發現呢期好似好多人失蹤？」
我女朋友Molly本身係一個好鍾意研究怪談同都市傳說嘅人。但其實我本人係麻麻地呢啲嘢嘅，但為咗同佢有共同語言，所以間唔中都會上網學習下，睇下啲較熱門嘅案例。
「好似成日見到新聞有報，差唔多幾日就有一單。」
「係呀，十幾歲到八十幾歲都有……」
「但其實會唔會係已經搵返，但啲媒體覺得冇意思先唔報？」
「Nonono，」Molly搖搖頭，「我同班朋友問過其中幾個失蹤者嘅家屬，可以肯定到而家都未搵返。我哋仲整咗張地圖，標哂班失蹤者最後出現嘅位置，我俾你睇下……咦？」
「咩事？」見佢一臉疑惑咁望住螢幕，我即刻問。
「我收到一封短訊……個標題寫住To Molly。」
「乜呢個年代仲有人會send短訊㗎咩？係咪信用卡廣告咋？」
「阿宗……」Molly望完封短訊後，神色變得凝重起嚟，「你望下。」
我接過手機，只係望咗眼，一陣寒意就即刻充斥全身。
短訊嘅內容最先係一幅相，明顯由車廂外面影入嚟，可以見到我同Molly都喺相中，再對比埋我哋周圍嘅人後，可以斷定張相只係幾十秒之前影落。
問題係，呢段期間我哋明明仲喺隧道裡面，咁究竟傳短訊嘅人係點影呢張相？
諗到呢度，我忍唔住擰轉身望向車門外面。但就同慣常一樣，外面依然係漆黑嘅隧道同冷冰嘅牆身，冇其他異樣。
就喺下一瞬間，Molly部手機又再震咗下，原來又係新一封短訊……
我戰戰兢兢咁撳入去，封短訊寫住──
－－－－－
愚者：281
人禍：01
節哀：172
快衰：465.12
樂園：41
－－－－－
第二日朝早，我收到Molly失蹤嘅消息。
（無待續）
＝＝＝＝＝＝＝＝＝＝＝＝＝＝＝＝＝＝＝＝＝＝
有心無默
IG: echoofheart
（本故事純屬虛構，如有雷同一定係巧合）
【呃嬲廣告】《西營盤》《絕命上映》《絕望走廊》《絕無轉機》《成為外星少女的導遊》已經登錄各大書局。
愚者 樂園 ig 在 Kobe Bryant IG在PTT/Dcard完整相關資訊 - 健康急診室 的八卦
提供Kobe Bryant IG相關PTT/Dcard文章，想要了解更多Gigi Kobe、Kobe Bryant ... 向傳奇球星Kobe Bryant ” 致敬” 愚者樂園Fools Paradise 今天發佈一對1/6 比例的人物 ... ... <看更多>