琴日年初二，由於見到有唔少老友無節目，於是係Whatsapp攪左個Group，睇下邊個屋企方便比我地玩，最後得達仔一個出聲話OK! 所以我地決定成班人去達仔屋企賭返兩手，順便拜下年逗下利是! 對於我地後生仔組團學人拜年，其實幾好笑，至少我地咩都唔識。
兩點幾約左班FD係達仔樓下商埸門口集合，等左一陣，大家都見大家兩手FingFing。
阿峰就忍唔住笑說:『喂!大佬! 依家拜年呀! 唔係兩手FingFing上去呀? 禮貌上都買返兩梳蕉上去呀!』
『買蕉? 你見過人地拜年送蕉咩? 求其去惠康百佳買返幾盒餅上去啦!』
雖然達仔係咁話唔洗，但最後都係成班人柴娃娃走入去惠康，見到一堆堆成座山既禮盒呀餅乾呀，多到喊出黎。有人提議話送禮要送藍罐曲奇，都唔知係曲線定直曲線，最後都買左幾盒金莎穩穩陣陣上去拜年。
上到達仔屋企門口，牆邊掛左好多揮春飾物，大門又掛左個倒轉左既福字，睇得出達仔一家人為新年花左唔少心思。入屋後，兩老勁開心咁係咁講:『恭喜發財!恭喜發財!』
我地都好開心狂講:『恭喜發財!新年進步!身體健康!』
『入黎坐入黎坐!唔洗除鞋!』兩老見我地成班人企係門口除鞋，為左方便我地，係咁笑住叫我地唔洗除鞋，但我地入到屋後先發現入面勁乾淨，個個即刻除鞋唔想整污糟個地方。坐低之後，兩老即刻幫我地沖茶，又拎個糖果盤出黎比我地食，仲問我地肚唔肚餓，可以煎D蘿蔔糕同年糕比我地食。
兩老既客氣，令到我地成班人勁唔好意思，係咁話唔洗，我地自便就得。後來達仔爸爸係櫃到拎左幾袋瓜子出黎，笑笑口問我地鐘意食紅瓜子定係黑瓜子，仲同我地解釋紅黑有咩分別，之後又勁緊張叫達仔媽媽快D比利是我地。我地個個都企哂起身，好開心咁收利是，但我地都睇得出，兩老仲開心過我地。
達仔爸爸仲即刻播D新年賀年歌，攪到成屋都好有氣氛。我地成班人都坐到直一直咁，互望大家，唔知點解覺得好好笑。後來達仔出聲話我地上黎想賭返幾手，達仔爸爸即刻好驚訝:『我地得副麻雀咋! 洗唔洗我落街買返幾副啤同魚蝦蟹上黎?』
我地即刻表示我地已經準備好哂!唔洗勞煩你地! 同時都係咁重覆話" 唔洗客氣啦!"
後來我地一邊打麻雀，另一邊就玩三公，其實都幾熱鬧，大家都玩到樂哂形，不自覺玩到爆哂粗咁。唔知係咪新年效應，平時唔賭錢既阿清，都賭埋一份，班友仔成日罵我賭波，依家佢地就幾百幾百上落，全部上哂身。平時出名孤寒既阿軒，比多幾蚊加凍飲都要諗黎諗去，依家即使輸左幾百蚊都好盡興。最後班死仔搶住要打麻雀，逼走左我，唯有坐埋一邊飲下茶食瓜子。
達仔既爸爸媽媽就坐埋黎同我傾計，佢話好多謝我地成班人上黎拜年，見到達仔新年咁開心都係第一次。我就即刻話:『傻啦! 我地上黎拜年有利是收又有野食!我地多謝你地先岩!』 同時我又好奇咁問:『咩平時達仔新年唔開心咩?』
『我地大陸落黎，無咩朋友同親戚，所以唔洗出去拜年，都無人黎拜年。我地就無咩所謂既，但達仔細細過就係到怨我地，佢話 "明知無人黎拜年，每年都要花咁多心機，攪咁多野去佈置屋企同門口，又買哂糖果盒! 最後又辛辛苦苦拆返哂落黎" " 又話我地年紀唔細，仲要捱到夜晚十二點係到拜神。"』達仔爸爸仲笑住口扮達仔把聲黎演繹，講完之後又細細講話唔好比達仔聽到。
『我地咁重視新年，都係鄉下傳統，我地做女人既，依D節日一D都唔可以放鬆! 不過你地學生哥最開心就係收到利是，但係達仔就無咩利是逗，每年都係得個二百蚊，都係我地比既。』
『達仔都大過啦，唔會介意利是有幾多既。』我說。
『咁又係! 不過我地以前見到佢好開心咁坐係屋企，每年都會問同一條問題 "一陣有冇人黎拜年呀?"最後又好失望咁睇住我地拆d揮春，攪到我地都覺得對達仔唔係幾好意思。』
個一刻我見到兩老邊講邊望住玩得好開心既達仔，個樣有D似老懷安慰咁，我唔知講咩好，唯有講左一句:『我地每年都會黎同你地拜年!放心!』
以前覺得拜年都係大人既節目，我地做細路哥好多時都係陪笑同收利是，或者同班表哥表姐玩，無表哥表姐就坐埋一邊睇電視，等班大人盡興完之後就走。年紀大左，對利是既欲望無以前咁著緊，有時侯都想宅係屋企唔想出去拜年，留返兩老出去拜年，反正都係得佢地開心既姐。又會諗佢地拜年點解咁開心既? 好似D例行公事，又要出錢派利是，唔係應該唔鐘意咩? 但次次見佢地都好開心傾計，又賭錢又飲酒，好似開緊大人既Party咁，我都未好耐未見過阿爸阿媽咁開心。
依個疑問，達仔爸爸最後係我地走之前解答左。
佢話 :『將來十幾年後，你地可能都會鐘意左拜年，會搵下朋友聚舊同拜年，感覺就好似今日咁，大家開開心心圍埋賭錢傾計!』
聽完之後，我地成班人互望大家，都幻想緊我地依班人將來係點，會唔會十幾廿年後大家都拖住班仔女互相拜年，又或者正如達仔爸爸所講，愛上左拜年呢?
諗深一層，如果拜年係必做既傳統習俗，咁我地依個時侯就唔洗成日煩Whatsapp，facebook做攪手約人，隨時攪完一大輪都係唔齊人，什至活動取消! 但拜年就唔同!能夠從拜年當中成功同朋友/親戚見到面既成功率高達99%， 真真正正比機會大家聚舊，真真正正比機會大家坐埋一齊傾下，關心一下大家既近況同埋喪玩喪賭。
不過最後可能又苦左班仔女黎同我地陪笑! 哈哈!
