廖太，你要加油！我對「Just alone, not lonely」呢句都有好深體會❤️
＝＝＝＝＝＝＝＝
讀者投稿：我永遠都係廖太
＝＝＝＝＝＝＝＝
失業接近一年，我一月終於返新工，只係返咗一個星期就放農曆年假，然後公司宣布因為武漢肺炎情況嚴重，又撲唔到口罩畀員工，所以畀大家home office。
我同老細講，自己新年前只係返得幾日，連email都係新開，根本冇一個客識我，亦冇任何工作上嘅電郵要覆，work from home完全冇嘢做，不如唔好出糧畀我，直至可以返office先開始計啦，但係老細話唔得，請咗就係請咗，糧一定要出，仲要出到足，叫我將來畀心機就可以。
噚日老細講完呢句，然後見到海皇粥店強迫員工8折出糧嘅新聞，心情更加複雜。
我老細係一位五十幾歲嘅女人，佢亦係我先生嘅舊老細，我先生喺上年2月14日因為癌症而離開咗。
我同我先生係做同一行，當年都係因為咁樣而認識，由同事變情侶，再由情侶變夫妻，後來大家各自去咗唔同公司發展。
拍咗兩年拖，過咗五年婚姻生活，當知道佢有癌症之後，我用咗好長時間叫自己冷靜，如果連我都表現得好傍偟，我先生就會更加不安。
之後我辭咗職專心照顧佢，期間病情好反覆，佢由好樂觀咁安慰返我轉頭，變到冇晒精神，連普通進食都好辛苦，到後來佢意識到淨低嘅日子唔多，我先生就每日都講多謝我，話照顧佢一定好攰，又叫我如果將來遇到好男人要把握，對方有冇錢唔重要，最緊要係對我好。
大概，呢啲就係我先生最後同我講嘅說話。其實佢走嘅時候只係得34歲，對身邊嘅人一直都好好，所以當時好多朋友同埋同事都有嚟探佢，包括佢個老細，亦即係我而家個老細。
我唔明白點解上天要咁快拎走我先生條命，我仲未同佢生小朋友，仲未睇到佢變老嘅樣，試問我點樣可以釋懷？
走唔出傷痛，曾經諗過陪埋我先生一齊去，意志消沉咗一大段日子，多謝身邊嘅朋友，仲有屋企人不斷支持我，鼓勵我。呢個老細知道我同我先生係同行，所以不斷勸我去佢公司返工，始終生活仍要繼續，有好多現實因素要顧及，最初未回復心情，先後推咗兩次，直至上年12月，佢第三次叫我，今次我答應咗，因為呢個時勢生意咁難做，佢都仲肯關照一個舊下屬嘅家人，所以你明白我點解唔好意思收人工住啦。
想借位多謝呢個咁重情義嘅老細，糧我照收，之後加倍努力奉還。
另外想同我先生講，雖然上年今日係你離開嘅日子，不過我仍然覺得，今年情人節有你陪我一齊過，所以唔使擔心，亦唔好催我搵第二個，Just Alone, Not Lonely.
希望大家愛要及時，香港唔徹底封關，更加有種今日唔知聽日事嘅感覺，把握時間，愛你身邊嘅人，多啲錫你嘅另一半。
情侶變夫妻 在 結婚默契問答Q&A＿從情侶變夫妻的快問快答。婚禮二進影片 的八卦
20220102 屬於我們的完美小婚禮❤️感謝事前幫我們一起想題目的朋友們＆當天一起錄製跟主持的綿羊＆Ｗei還有同步線上連線的我的真-Music: Caballero ... ... <看更多>