［訪問］古巨基與太太Lorraine相識於1994年，兩人在這七千多個日子裏可謂形影不離，終在2014年7月到美國拉斯維加斯簽字結婚。剛踏入結婚周年，基仔便推出專輯兼同名新歌《找到你是我最偉大的成功》高調晒愛，但他否認肉麻掟閃光彈：「我鍾意用歌記錄心情。」又自爆愛偷拍抗拒上鏡的嬌妻，為對方留倩影！
基仔愛偷拍
基仔的新國語歌《找到你是我最偉大的成功》再顯淺不過，擺明是賀結婚周年冧老婆Lorraine的情歌，歌詞肉麻到震，基仔笑言大家一聽就明！沒有最肉麻，只有更肉麻，基仔搞笑地自爆愛偷拍太太：「佢唔只驚鏡頭，連我拍佢都驚，我會拍低佢咬手指、無啦啦唱我啲歌，當私人珍藏。」Lorraine多年來每次見到鏡頭都猶如「鬼見愁」，訪問當日安頓基仔受訪後，她便坐在一旁與工作人員密斟，但不忘時刻留意鏡頭，以防被整蠱入鏡，基仔笑說：「我都有調校吓佢，我話我哋再唔留倩影就皺皮老㗎喇，嗰次喺美國影婚紗相，我諗影晒佢一生人要影嘅相。」
Lorraine的性格，基仔當然瞭如指掌，事關二人多年來除了感情關係，還有工作關係，基仔心痛地說：「我有嗌佢少啲出嚟跟通告，唔使咁辛苦。」共同走過那麼多年，問基仔可會生厭？他睩大眼反問：「日見夜見驚悶？咁多年喇喎，應該咁講，我哋已經係不可分割嘅夥伴。」所謂七年之癢，兩人已經歷三個「癢」，他笑說：「你叫一個男人對住鏡頭講有冇七年之癢，我梗係答你冇啦，已經咁長日子，樣樣都好穩定。」至於如何維繫這段馬拉松式愛情長跑？「講真我哋都係走吓走落去，呢啲冇話去邊度上堂，都係靠大家去體驗、實踐行出嚟嘅路，唔覺唔覺，睇吓又一年，日子就係咁過咗。」
嗌霎點會冇？盡量唔出聲
作為朋友、拍檔甚至夫妻難免會生拗撬，基仔與太太亦不例外：「嗌霎點會冇？幾廿歲人梗有自己意見，老土啲講句，冇乜隔夜仇，唔經唔覺就累積到今日，大家並肩向同一個所謂嘅夢想追逐、實踐，亦係一種緊扣嘅力量。」可有吵過大鑊？基仔說：「除咗吵鬧走唔甩外，我哋仲有一種唔出聲，偶然有啲無謂爭拗應該停一停口，唔係所有道理都要講得咁白咁清，嘈交都係一時間氣上心頭，等情緒平靜番先可以理智去傾。」問到可會先開口氹老婆？基仔說：「我盡量唔出聲。假設兩個都唔出聲唔氹大家，我哋有樣好，我哋有工作，譬如會大叫『聽日嗰個着咩衫呀？』咁就開番聲㗎喇！冇乜讓唔讓步，好自然地又講番嘢。」
深明夫妻相處之道的基仔當然識氹老婆，他自爆為Lorraine做過最浪漫的事，是今年一月親手整蛋糕慶祝太太生日：「佢知嘅，但唔知我會整成點，因為我第一次整蛋糕，係堅嘅三層高士多啤梨蛋糕，雖然醜啲但好浪漫，喺雪櫃攞出嚟時切唔落，可能溫度唔啱，但味道又OK。」
以往提到Lorraine，基仔總會顧左右而言他，惟婚後卻流露出甜絲絲的笑意，目光亦總不自覺地追隨太太的身影。訪問期間，他多次高呼「古太」：「以前叫Lorraine，依家喺大家面前嗌佢古太，喺屋企嗌老婆，仲有啲暱稱就無謂講啦！」Lorraine平日在記者面前直呼「基仔」，私下當然喚他「老公」，基仔亦即席用普通話模仿Lorraine說：「姥（老）公！哈哈！」
Lorraine多年來一直為基仔的演藝事業打拚，行內人均指她為基仔「仆心仆命」，問到太太最令他感動的事？基仔說：「我諗唔係講一件事令我幾感動，我哋呢行工作真係辛苦，捱更抵夜，拍戲捐窿捐罅爬山、落水，咁多年佢都好辛苦咁去陪我經歷，所謂嘅感動未必係做邊件事，係我哋相處落嘅感受。」基仔最欣賞太太個性善良及易被打動：「佢個心好柔軟，仲有我哋定咗一啲夢想，哪怕有咩困難阻滯，當佢下咗決定就會話『得㗎啦，我哋點都趕到』，好似之前喺上海搞時裝騷，成個過程好緊張，最後我哋令不可能嘅事發生咗，佢會咬實牙關達到目標，係講到做到嘅人。」
夢想執行者 籌拍愛情片
基仔與Lorraine喜好相近，個性卻一快一慢，他直指太太步伐太急：「作為佢丈夫，我經常提佢放慢步伐，尤其依家我哋幾廿歲，應該唔好咁緊張，有我成日喺隔籬提佢，佢都唔同咗。」他坦言太太對他徹底了解，可能一般情侶工作環境不同，感受冇咁直接，但作為基仔經理人，他的事業亦是太太的事業，她完全了解兩人一齊行的路。
基仔繼自創時裝品牌後，又為太太開甜品餅店，下個目標則是導演工作：「我哋算係夢想執行者，我鍾意時裝，甜品店係佢嘅，下個夢想就係執導電影，我一直有進行前期準備，預計明年可以郁動，劇本會同編劇、監製一齊傾，應該係愛情片，我耍家啲，而且之前演愛情片多，會將個故事豐富啲，諗咗一個穿越時空嘅愛情片。」不過基仔坦言無意上陣，怕拍攝時要分身做演員感到吃力：「客串吓就無妨！」
既要兼顧演藝事業，又忙於打理自家品牌的時裝生意，基仔謙稱不覺得自己有生意頭腦：「應該咁講，我唔係計數嘅人才，我嘅生意頭腦係喺創作方面，一盤生意分好多範疇，我負責品牌形象，宣傳工作都可以，但計數方面必須有呢方面好叻嘅人幫我，Lorraine負責睇住啲數字，例如成本、銷售回報個比例，當然佢鍾意甜品，試食走唔甩，所以我哋除咗娛樂圈工作，所有生意都花好多時間。（做企業家？）冇諗咁遠，我係夢想家。」
今時今日基仔已為人夫，問到在老婆面前跟女演員談情說愛、咀嘴會否有所忌諱？他笑說：「佢都慣啦！新專輯封面都有個女主角，工作嘛，企喺鏡頭前我就要係嗰個角色，如果顧慮咁多，冇辦法喺嗰個崗位工作，不過，當然要兩個人好明白雙方啦！（叫太太唔去現場？）點會？更加要（目及）住啦！起碼喺佢雙眼下進行，有冇多有冇少佢會知。」
後記：推Job造人等仔養
基仔跟老婆Lorraine同樣喜歡小朋友，每次問到「造人」計劃，基仔總是說：「呢樣真係要睇天意！有啲事自然行到會發生就會發生，包括我哋每一步好似結婚、開舖頭，生BB我諗都係睇天意，會發生嘅一定會出現。」問到可有想過採取其他非自然方法？他表示將來再算，還是自然吧！為配合記者多番「催生」，基仔打趣說：「推晒啲工作，淨係生仔，湊大個仔，推個仔出嚟做嘢！」
on.cc報導
情侶暱稱搞笑 在 情侶間最特別的暱稱- 有趣板 的八卦
不想跟一般人一樣不是叫寶貝就是北鼻之類⋯ 過去跟閃我們都隨便叫～ 他叫我白癡我說她白目他叫我笨球我説她蠢珮他叫我木頭我回她竹子如果她叫我寶貝我 ... ... <看更多>