都話我係個死宅男嚟架啦……
終於畀我抽到我最想抽到嘅超級悟吉達！
yeah yeah yeah！你老鼠開心過拎到文學獎！
之前課咗好多（點煙…唉唔好問幾多）都抽唔到，
已經死心，點知儲返嚟嘅石仔剛好夠數是但鳩抽，
都畀我抽鳩到！
我抽嚟只係為咗果2隻升呢用嘅附贈老界王架咋……
講真，一年前你話我打機課金我一定話你戇膠，
但原來呢家嘢同愛情一樣，
你只係未遇到一個令你盲目投入嘅人啫，
當你終於遇到一隻令你無法抽身嘅game，
莫講話底線，你連底褲都除唔切，
拎去賣埋嚟課金呀～
當然世界已經唔同晒，
以前幾舊水買隻game返嚟玩一世，
依家就先免費畀你玩吓，
但想要好嘢想玩得勁就唔該科水，
而且唔想玩到半桶水，
就肯定唔止幾舊水，
一投入沉迷仲係無底深潭不歸路……
傻嘅都知道呢個世上邊嚟咁多免費餐吖，
但有時心諗自己免費享用咗咁耐，
畀返少少都好應該啫，
我尋你開心你尋我開心，
我們還有什麼可以恨呢？
總之畀嘅係有限錢，
唔好傾家蕩產就ok囉~
啲女仔成日怪條仔掛住玩手機game，
但沉迷手機game點都好過沉迷手機app啦吓話？
佢畀幾舊水玩game大鑊啲定係拎住手機四圍flirt女，
幾舊水幾舊水咁請啲女食飯睇戲驚啲？
講真我限時打緊關儲緊升呢徽章果陣，
莫講女神嗌我都唔想理佢，
連屎尿都儲埋一次過痾慳返時間，
仲有咩衰嘢做得出？
所以啲囡囡見條仔打機不知應該幾安心！
關於課金我覺得每個人其實係要幫自己set返個指數，
始終網上按個掣就畀咗錢蝕在太唔真實，
有時抽咗幾千蚊之後收到張單先知原來幾大鑊，
我就習慣會用自己鍾意嘅，買開嘅嘢做指數，
譬如我買開一隻12吋figure千五蚊，
我每次課金，就同自己講，
拿拿拿你再課就等同掉咗半隻figure落海架啦！
當堂個人會醒一醒，咦係喎，
唔覺唔覺一百幾十，
抽唔到唔忿氣又課又抽，
咁又一隻figure架啦喎，
頂不如慳返買figure好過啦……
你將figure指數換做波鞋指數或者手袋指數都得，
總之就幫自己留條救命繩，
或者《Inception》分清虛擬同現實嘅識別陀螺，
咁就係你玩game，唔係game玩你……
過來人話嘅，
千祈唔好將課金抽嘢當做賭博嘅替代品！
總之一句！
課硬！衰嘢take硬！
畀完錢十連抽卅連抽都係垃圾真係慘過死！
祝大家神手無敵，要咩有咩啦吓！
#以前抽閃卡都有得照吓部卡機 #依家真係憑我切啫的勇氣 #話明切啫斬手指唔再課金抽嘢一見到新角色又忍唔住手賤 #哈咩吓咩吓
悟吉達 在 [閒聊] 討論貝吉特&悟吉塔誰最強會引發世界大戰- 看板C_Chat 的八卦