有一日，我去內科巡房嘅時候嚇左一跳，事關見到登登醫院個外科醫生貌似係到幫某位病人伯伯打飛機。第一時間當然埋去睇咩事。
印度地大，醫生永遠唔夠。有啲時候，一啲跟過醫生睇症嘅人就會自立門戶自稱醫生，叫做 Quack。話說病人伯伯因為幾日去唔到廁所，搵左個 Quack，於是阿 Quack 幫佢插尿喉。呢樣嘢其實係一個好正確嘅做法，但係佢做漏左一樣大家考試都聽過過嘅步驟。
想當年考插尿喚，我地輪流插個個膠製模型，急口令咁樣背加讀哂啲步驟，醫生就會逐分剔。去到最後一步有個步驟大家成日都會唔記得左 Rap，就係「I will reduce the prepuce」，亦即係將包皮拉返好，冚返住龜頭。阿 Quack 就係做漏左呢個步驟。你可能覺得無咩大不了，但係病人伯伯嘅包皮就係因為拉低左太耐，箍實左陰莖拉唔返前，龜頭就漲大左幾倍，呢個情況叫做 Paraphimosis。外科醫生係到「打飛機」，其實就係嘗試將包皮拉返出黎，因為如果拉唔返，病人伯伯就要幾廿歲人無啦啦做手術割包皮。
今次除左痛同割包皮，好似都係笑話一則，但無醫德嘅例子當然仲有。
上回提到私家醫生會搵盡方法賺錢。
有一個孕婦係乙肝帶菌者。好多本地媽媽都知道，小朋友只要出世後打針免疫球蛋白，就有 95% 機會唔會受感染。呢位印度媽媽唔同。產科醫生警告完佢乙肝嘅危險，話打針唔會百份百安全，無啦啦就幫佢落左個仔，大概係因為要賺一筆手術錢。有一個孕婦，因為年過三十比醫生警告話小朋友有機會有染色體問題，比人落左個仔。有一個孕婦開刀生仔，有醫生會「順便」切埋子宮卵巢膽囊，收多一筆。貧窮地區嘅女士就係因為咁接受好多無謂嘅程序，好多甚至因為咁樣就死埋。
生命無價？印度有，大概幾千盧比。
#DrWhoHK
#DrWho去旅行
#DrWho印度神遊記
🔻🔺🔻🔺🔻🔺🔻
IG: DrWho.HK (instagram.com/DrWho.HK)
FB: DrWho.HK (Dr Who)
🔻🔺🔻🔺🔻🔺🔻
