【黑腳】
黑腳，即係指呢個人所到之處寸草不生，康仔都係另類黑腳，買飛睇X JAPAN YOSHIKI，但因牌照問題取消，補做免費騷當日佢又唔得閒，另外曼聯連續17場不敗佢都冇買，第18場爆冷輸俾侯城佢就啱啱買咗，不過呢啲都只係碎料，將來慢慢同大家講，因為今日VIP係我嘅candidate --- Edward，佢係職場上嘅黑腳，所任職過嘅公司全部血流成河。
客: 「喂，聶生，老闆見完今朝個求職者Edward，佢話 Ok呀，你幫Edward做個reference check啦，搞掂就可以簽約返工。」
我: 「多謝你俾機會佢，不過reference check可唔可以搵佢合作開嘅舊同事填，因為……」
客: 「梗係唔得啦，例牌搵佢前上司或者人事部填囉，做咩呀？佢有問題呀？」
我: 「唔係，因為佢以前公司執咗啫。」
客:「哦，老闆話ok就唔使做哂全部reference check啦，做一兩間囉，head office正常程序嚟，你明啦。 」
我:「……一間都做唔到，執哂，你冇留意佢cv？」
客:「執哂？亞視我知執咗，咁做新報囉！」
我:「執咗架喇，你唔覺冇咗呢份報紙咩？」
客:「我一直以嚟都唔知道有呢份報紙，咁樣樣，加州紅我知冇咗……係咁易做個歡樂天地reference check 啦，part time都殺，叫佢個HR填返資料就ok，幫到你盡喇。」
我:「歡樂天地執咗十世喇喎。」
客:「咩呀？我上星期先同囝囝去玩完。」
我:「……你係咪講緊冒險樂園呀？」
客:「……咁唔掂喎，佢做親啲公司都執笠，會唔會連我哋間公司都頂唔住㗎？」
我哋雙方喺電話中沉默咗5秒，我終於諗到點樣打破悶局。
我:「你換個角度睇，佢一走，啲公司就執，反映佢幾咁重要，你第日唔好炒佢咪得囉，哈哈……」
客:「xzy%@₩＃」
