早排同大家講過我朋友娶日本人，而其實佢哋結婚嘅過程一啲都唔輕鬆，因為女方已經失業咗6年。
用失業呢個字眼可能有少少嚴重，你哋第一時間應該會諗：「吓！6年？咁點生活呀？」 呢個日本女仔的確唔使愁生活，因為媽媽留咗一筆錢畀佢，可以慢慢搣，但呢筆錢又未至於可以用過世。
驚唔驚坐食山崩？屋企人仲留咗一間屋，聽講市值約700萬港元，不過要同兩個家姐分，暫時未有共識賣出去，因為佢哋而家就住緊，若然真係套現，三姐妹每人應該分到200幾萬，正正係咁，佢覺得咩都冇所謂，生活畀乜嘢佢就照單全收，過住我夢寐以求嘅生活，日日自然醒，醒咗煲Netflix，閒時學下嘢，每星期一堂韓文，一堂西班牙文，加上唔迷戀任何名牌，所以冇乜壓力。
問題嚟喇，佢識咗我朋友，兩個人步入談婚論嫁階段，跟住先發覺註冊冇問題，但係幫佢老公申請Visa係一個大問題，原因係女方失業6年，而佢媽媽留低嘅錢又未多到可以通過政府門檻，簡單一句講晒，日本當局驚你哋假結婚，個女仔冇正職係唔會幫到老公搞Visa，變相結婚都要分隔兩地。（編按：兩個家姐唔鍾意佢嫁香港人，所有文件拒絕簽名，不過重點都係佢本人冇工作。）
我朋友試過提議佢嫁嚟香港生活，可惜遭到拒絕，因為個女仔只想留喺日本，正確啲講應該係只想留喺東京。換言之，如果要結婚，又要男方獲得永住權，路就得返一條，就係女方要有份正職。
個女仔以前係做開「臨床検査技師」，再搵工都係朝住呢個方向，但係6年冇做嘢真係唔容易捲土重來，所以有一段長時間係用「眼神搵工」，上求職網睇咗當send咗CV，雖然佢兩個家姐成日都單單打打串佢唔返工，不過之前真係太耐冇做嘢喇，縱然聽到啲說話係會嬲，身體仍然好懶惰，何況仲有固定生活費back up呢。
搵咗半年（其實係hea咗半年）仍然冇著落，佢有朋友主動介紹工作，仲要係肯做就一定請嗰隻，但佢全部拒絕，因為一心想入返「臨床検査技師」呢行，其他行業免問。
雖然我對醫護界唔熟悉，但係佢假假地都叫做「臨床検査技師」，闊別6年之後再做返照計有一定難度，所以一如所料，經日本當地headhunt公司介紹見咗幾份診所工都冇回音（原來日本診所請人都用headhunt公司）。如是者又過多3個月，終於都揾到而又被取錄喇，不過就有少少偏差，事關係一間化驗所，主力係收集病人嘅糞便同尿液樣本，登記下呢樣嗰樣。
有兩種人搵到工係好容易放棄嘅，一種係對上一份工做咗好多好多年嘅人，呢樣之後再解釋；另一種係失業咗太耐嘅人，最大原因係身心一時間適應唔切，由本來唔使做嘢去到要同人迫車返工已經係一個心理關口，體力亦都係一個問題，喺屋企連續12個鐘煲劇當然輕鬆好多啦，突然要重投社會做8至9個鐘絕對係慘過擔泥，加上仲要再面對唔同嘅人，包括老闆、同事、客，要克服真心唔容易。
所以大家如果見到身邊人失業咗一段時間，千辛萬苦搵到份工之後又放棄，唔好一棍就打死佢，又或者冷言冷語嘲諷，因為呢種過程係好正常，亦相當常見，想佢哋好，想佢哋慢慢適應返社會步伐，應該要多啲關心，同佢哋傾下，協助對方搵返職場嘅節奏。
我將同一番說話向我朋友講咗，幫佢女友（而家係老婆）打定底先，結果亦一如所料，女方返咗工半日已經想辭職，嫌棄份工嘅原因亦都好搞笑，不過呢個故事有啲長，原諒我留返下半part慢慢打埋佢，好多page都鍾意講「過XXXX個like就出下集」，比我試玩一次啦，最多有100likes我就寫埋佢喇好冇？
下半part我會寫埋個女方嫌份工啲咩？最後係點樣克服？仲有一個我自己嘅親身經歷，約定你，在線等。
床編故事本人 在 身兼動畫師的創作者—床編故事 - LINE 原創貼圖誌 的相關結果
其實，比起人物角色，床編故事更喜歡動物創作，所以貼圖角色主要是以小雞、穿山甲、菇兔君所組成。這點也反映在喜歡的貼圖創作者上；床編故事特別喜歡的 ... ... <看更多>