【東京港人物語 1】
Working Holiday看盡職場百態@中目黑
做咗成年，終於儲到少少錢買張廉航機票去日本，不過我喺玩樂之餘，仲搵咗6個喺東京生活嘅香港人，傾下女仔、湊仔、居住、文化差異，同埋喺職場上遇到嘅問題，第一炮先同【東京港人物語】系列唯一嘅男性受訪者丫仁傾計。
2015年以Working Holiday身份嚟到東京工作嘅丫仁，任職Graphic Designer，其實諗落都幾堅架，係人都知日本啲Design出名靚，加上佢而家份工係自己上當地求職網站搵，有時我哋喺香港搵工都難啦，何況人在異鄉嘰哩咕嚕。
『中目黑租屋180呎80,000円』
丫仁屋企(如圖)喺中目黑區，日本用開平方米，佢間屋有18平方米左右，即係180呎咁上下，仲有個花園畀三戶共用，至於租金方面呢，每個月就盛惠80,000円，折合港紙約$5,560，唔包水電寬頻，好合理吖，我朋友喺紅磡住劏房，120呎租金都要4,800，又係咩都唔包，而其實中目黑區已經係偏貴架喇，你估丫仁唔想住平DD咩。
由於日本租屋需要擔保人，丫仁算好好彩，因為佢以前社長肯幫佢簽名，但就畀咗好多意見，例如話中野區治安唔好、新宿好雜、上野多醉酒佬，原來日本人係咁樣睇東京個別地區，最後社長用自己嘅角度，揀剩好繁華嘅有錢人區中目黑，咁佢先肯幫丫仁簽擔保。
『後期與社長關係變差』
美中不足嘅係,丫仁同前社長嘅賓主關係未能夠好頭好尾，導火線先係丫仁喺工作上駁過一次咀，自此惡夢就嚟喇，你知以下犯上喺日本係大忌嚟啦，所以社長亦開始針對佢，曾經試過當眾訓斥丫仁嚟咗日本成年，日文都冇進步。
後來丫仁自己搵到新工，轉去而家呢間公司繼續做Design，遞埋辭職信就更加冇好日子過，社長叫佢做嘢唔會再直視佢，有時近在咫尺，都要隔山打牛同另一個同事講，實情係叫丫仁做。不過話說回頭，香港好多老細都係咁，一辭職就當你係叛徒，呢啲嘢就無分國籍嘅。
『準時收工嚇親同事』
仲有一樣嘢係無分種族界限，就係「扮工」，高層未執袋，丫仁嘅同事係唔敢走，試過準時收工，班同事個個目瞪口呆，大部分人留到8點至11點，但手上嘅工作只係為一張相退地(除背景)，丫仁形容得好生鬼:「你信我啦，做開Design退地一張相，幾個字至半個鐘乜都搞掂，佢哋會為咗留耐啲而退足成晚架。」
『工餘時間發掘新奇玩意』
丫仁性格好開朗，好肯同人分享，雖然職場上有唔少勞氣嘢，但佢同班同事都玩得埋，所以Working Holiday嘅經歷十分豐富，而丫仁亦好識得把握工餘時間，一放假就去發掘東京嘅新奇玩意，因為佢都有個page叫做 大丈夫。東瀛工作遊記！ 介紹當地資訊，咩期間限定乜乜乜、新口味紫菜Wasabi薯片、咖啡味可樂...佢都會買嚟試下，再同網友開心分享，難怪丫仁笑笑口話:「嚟咗東京真係儲唔到錢。」
後記:
丫仁話自己好好彩，可以搭到尾班車嚟日本Working Holiday，因為呢度嘅年齡限制係30歲以下，唉，我超咗齡好耐喇，尾班車個車尾燈都見唔到呀。
Any肥，丫仁意見不等於丫仁立場，如有得罪，就入我數啦！
Working Holiday各國年齡限制:
※18-30歲
日本、韓國、澳洲、英國、德國、愛爾蘭、波蘭、奧地利、法國
比利時(*需接受英、法、荷、德其中一種語言面試)
※18-35歲
加拿大、匈牙利、斯洛伐克
※18-26歲
捷克
==================
聽日出場嘅香港人，都同「尾班車」3個字好有緣，我哋喺惠比壽見啦！
平方米轉呎 在 平方毫米平方呎在PTT/Dcard完整相關資訊 - 數位感 的八卦
平方毫米到平方米轉換器- Metric Conversion2020年2月18日· 平方毫米到平方米(mm² 到m²)轉換計算器面積有額外附加轉換表和公式的轉換器.转换平方毫米自平方英尺(mm² → ft²) ... ... <看更多>