Boris Johnson選舉大勝後最大難題：舔，舐，定係瀨華為？
（好耐無寫嘅廢國政治分享，無水晶球嘅長文唔慎入。）
對於Boris Johnson黎講，聽日（1月28號）開始會係佢大勝後上任首相，要面對國內政治、外交、民生、奶共、舐美同瀨歐嘅最大決擇，因為由佢聽日要決定貫穿英國南北嘅高鐵（HS2），5G用唔用華為，公有化玩爛咗嘅北部鐵路（Northern Railway），仲有開始脫歐Trade Deal談判，Point Based工作簽證政策。如果用華文傳媒嘅醬缸視角，緊係來來去去討論廢國係咪「華為」，著眼點好二元，用華為廢國就係奶共，唔用就好波，問題係咪就係得一個，而又係咪咁簡單呢？如果係嘅話是但揾個香港KOL、我或者你做廢國首相都得啦...
講過好多次，成熟嘅民主國家，什麼政治甚至外交，講到尾都係關乎民生利益經濟，簡單啲講就係爭取選票或者還選票債，上面嗰堆嘢當然唔例外。民主自由嘅最終目的，咪係選民社會利益囉，阿爺個阿爺個阿爺嗰代已經爭取咗民主自由啦，仲講呢啲咁第三世界？所以英國本土最大嘅議題係HS2同Northern Railway，其次先係5G華為，因為必定還英國北部Red Wall工黨轉投保守黨嘅票債，一條線穿晒London、Birmingham、Manchester、Leeds再到Scotland，鬼唔知好咩？不過英國唔係香港政府水炮車咁，國民庫房嘅錢可以亂L咁射，射完係要人民用幾負責㗎。
至於華文傳媒好鐘意討論嘅5G華為，首先大家要知道英國現時網絡嘅背景。香港人（包括以前我）習慣咗電話邊度都收到，上網老奉一定係好L快嘅（慢過100mb/s好似要死咁）。但係呢樣嘢莫講係廢國（全國7成最快唔過80mb/s），就算美帝本土都面對一樣嘅問題，原因係地方大之餘仲要考慮平均分配資源，即係情願全國一齊慢啲都要覆蓋率高。5G科技嘅出現，正正就係會解決廢國、歐美澳紐呢個平均但係慢嘅上網問題。現存擁有5G技術嘅國家得4、5個（廢國自己無份），最高核心技術嘅未必係華為，正所謂low tech撈嘢，偏偏關乎覆蓋嘅天線之類嘅嘢華為就係頂爛市咁平（仲要覆蓋能力最強）。
Boris Johnson面對嘅係咩問題呢？國民利益方面，最簡單緊係脫歐後盡快全國5G，做佢所講嘅"Global Britain"同世界競爭啦。外交上問題並唔係奶共貪錢嘅問題，因為太多香港財經演員用大中華本位思考，其實肯做下工課都知，英國貿易同投資大客數到香港人都未到中國，佔6-7%。同時間國內議員，去到內政大臣同國防大臣去反對華為「小」到開花。如果Boris Johnson要貪錢揾嘢奶歸邊，大可以令大家高興揀奶美，實際上美帝本人到Rubio都已經用Trade Deal同五眼去要脅，又話全力幫手5G去迫Boris Johnson放棄華為。睇到呢度，點解Boris Johnson仲有懸念，要諗到聽日先公布呢？
返轉頭又係國民利益嘅問題，因為MI5嗰班科技佬話自己控制華為啲天線，同時美帝甚至南韓北歐都未做到華為個價，更大嘅考慮就係佢地嘅5G邊周技術要多一兩年先到華為有得比（核心反而勁過，人家要研發無得偷吖嗎），咁即係要國民比多啲錢之餘，仲要等多一兩年。依家已經係比人話係落後廢國，又等？如果仲要還票債起高鐵HS2，英國唔識印銀紙㗎喎，仲話考慮減VAT（銷售稅）？
Photo Source：The Times
#希望無悶死大家
