已經有一段很長的時間未有去筲箕灣遊蕩！昨日行完山頂之後心思思想去食碗片頭河。於是驅車落去筲箕灣安利。
泊好車之後，順便在筲箕灣走了一圈，才行去安利。沿途已發覺很多店舖已經不存在，例如那間吃咖喱的恆河等等，但仍彷彿見到安利的招牌。
去到門口，咦，怎麼會靜嚶嚶的呢。然後斜對面又有另一間安利，於是急忙上網搜尋一下究竟安利又發生了什麼事。才知道又是叔伯兄弟分家的故事。
與其靠網上資料去邊間食，不如數人頭啦。似乎對面街那間新舖的顧客比較多，於是登門一試。
我的魚片頭，味道還可以，但魚片實在太薄了，毫無𡁻頭。朋友的切腩他說很好味，我相信他。
最精彩的是鮮油多，看似細細件，但牛油厚切並雪得堅硬，當他一上枱，我立即灑上砂糖並揚走多餘的份量，即刻一口咬落去，真是牛油有牛油香，加上烘得脆口的麵包和淡淡的砂糖甜味，真是人間極品。
朋友叫了西多士。這個從前被稱為頭痛餅的項目，製作需時，所以當我地食完晒嘢之後，佢仲未駕到。我剛巧抬高頭看見鏡子的反影，只見侍應站在吧頭，一邊用左手在鼻孔開礦，一邊用右手去攞碟西多士，我心諗呢碟希望唔好係我哋嘅！點知六合彩都無咁準，真係我哋嘅。
不過算啦，印度人都係用左手㗎啦，冇用錯就得啦。有陣時出街食嘢唔諗得咁多架啦。西多士炸得幾香，問題咪就係唔應該係炸嘅囉，係煎㗎嘛！不過美味嘅糖漿補返數。
總括來講，價錢不算便宜，魚蛋也不及從前啲惹味，但在現今世代，算係好食。
#何嘉麗CallMeGaGa #何嘉麗 #為食路上 #安利魚蛋 #鮮油多係真心好好食 #左手開礦右手遞食物好合理呀茶餐廳唔通你想我雙手奉上咩
