對一個女人最大嘅傷害，就係揭發丈夫偷食，一刀插入心，傷口永遠不會痊愈。那種傷害在於震驚，震驚到無法接受：我哋兩個人明明好好，點解我哋好到咁樣你都仲唔滿足？點解？！傷害在於對人性嘅信任徹底崩潰：你係我最信任嘅人，最愛嘅人，點解連你都背叛我？
曾經，我真的以為唯獨我是不可取替。
後來才知道，原來隨手都可以搵個人代替我。
我哋作為旁觀者都覺得難過，覺得心碎，係因為眼見忠誠嘅人反而受到傷害。人就係咁，永遠唔會滿足。明明已經有個好老婆，有個全城羨慕嘅筍盤男朋友，明明已經將幸福握喺手中，依然不滿足。行錯一步，就一無所有。可惜，有啲錯，永遠返唔到轉頭。
誘惑，周圍都有，做每一行都有，更何況娛樂圈？俾人揭發就喊曬口認錯，話好後悔。但講真，如果唔係俾人揭發，咪又係繼續偷食落去？正室永遠都唔會知。「後悔」係後悔做得唔小心，多過後悔做咗呢件事。
或者我都有錯，錯在太信任你。如果我監控你，下下管住你，或者你就唔會出去滾？傻啦，個心要出去，用鐵鏈鎖住佢都冇用，嘗試控制佢嘅過程中只會令自己更難過，何必呢？就算用GPS跟蹤佢，就算請埋私家偵探，難道你可以監控佢個心？
我們無法控制別人，唯一能控制的就是自己，所以千萬要記住好好愛自己，把生命的重心重新回歸到自己身上。令你幸福的不是丈夫，不是女朋友，而是你自己。
女人，不要讓婚姻阻礙你尋找幸福。
#王迪詩
