（以下內容可能會引起不安，小朋友及食緊飯慎入）
成世人去過兩次四川，兩次都係做野。第一次係2008年，那一年，維園六四燭光晚會仍然有「不反對通知書」；香港人面對大陸嘅天災人禍，仍然會感同身受，慷慨解囊，有錢出錢，有力出力！512汶川大地震，我513已經喺四川，514已經深入重災區都江堰。公司冇特別買保險、冇時間打咩疫苗、亦冇特別嘅裝備，頭盔都冇個，我就咁孭個背囊，喺香港帶住幾個麵包、幾支蒸餾水就飛左過去拍片。（當年真係好勇，呢個job係死籌，全公司冇人肯去，我諗都唔諗就話ok。🙄）
呢次行程，有幾個見聞：
1.災區literally屍横遍野，成個區一股腐臭味。
2.生還者見到我地呢啲外來人，捉住我隻手唔放，一邊喊一邊求我幫手搵人救佢地嘅屋企人。
3.見識到內地嘅救災工作流程。
4.香港人鑊鑊捐唔知幾多億上去，最後啲錢點用。
5.返香港前喺機場有餘震，全機場嘅人嚇到一邊尖叫一邊衝出建築物外面。
嗱，我飲食Page呢啲死人冧樓就唔講咁詳細喇！後黎又去過一次四川拍野，同幾個同事去食過一啲街邊平民小店，又喺對口單位安排下食過一啲酒店內高規格嘅川菜。但印象最深刻，係喺一間醫院入面，用幾蚊買左一個紙盒嘅飯盒。好記得係喺一間手術室外面等緊，跟住有架手推車推過黎叫賣飯盒，有幾款口味，我揀左青椒肉絲，成盒都係青椒，有幾條好似粉絲咁幼嘅肉絲，好油，但味道唔錯。嗰頭食完飯，嗰頭喺手術室有人用一個透明膠袋裝住一個血淋淋嘅肢體行出黎畀我見到，我差啲成盒飯嘔返出黎。（喂，又話飲食page唔講咁詳細！）
其實我今個post本來係想講尖沙咀川菜映水芙蓉，喺海港城，維港view，日頭去食有陽光好舒服。小米椒牛舌 $148，小米椒味道明顯，牛舌好腍，而且好有牛舌本身獨特嘅香味，但份量少到離奇，訂價完全不合理。燒椒鳳尾蝦 $278，啲蝦其實冇乜特別，主要係食個汁，味道層次感豐富，有藤椒、青辣椒、指天椒混合嘅香氣。大刀回鍋肉 $168 ，喺四川食小炒嘅味道係咁上下，大同小異，我諗起醫院個飯盒。口味豬蹄$198，份量比預期中大，豬手好腍，走過油嘅豬皮好香。老媽蹄花湯 $88，料好足，味道濃郁，但鹹左啲啲。以上所有菜式，如果同我印象中嘅川菜比較，係好溫和，即係有啲本地化。全部都冇咁油、冇咁辣、冇咁鹹、冇咁麻。好定唔好就見仁見智，冇咁地道同正宗就一定架喇，不過再辣啲同油啲其實我個胃又頂唔順。重慶小麵 $88，更加係當中最溫和嘅一隻，有啲BB班川菜嘅感覺，太「冇料到」。但隻麵條幾好食，滑得黎有少少咬口，好過唔少麵館。全餐飯做得最差係碗白飯，又冇飯味、又唔香、又濕又黏。btw，服務好好。我估唔到佢個豬手咁大，叫多左野，兩個人食左$1172。
—————————————-
映水芙蓉
地址：尖沙咀廣東道3-27號海港城海運大廈2樓OTE 201號舖
電話：23882008
小米電蚊拍 在 小米電蚊-PTT/DCARD討論與高評價網拍商品-2021年11月 的八卦
小米電蚊在-PTT/DCARD討論與高評價商品，提供小米電蚊拍、小米電視棒、小米電動滑板車PRO在露天、蝦皮優惠價格，找小米電蚊相關商品就來飛比. ... <看更多>