呢位，係堅渣哥。
表面上霸氣十足，底嗰浸係大細路。
襯落我哋呢班負面王，就顯得佢特別樂觀特別cute..
Day 1我哋羅友痕想話今年搞搞新意思玩熟食檔，即時就諗起搵渣哥小環佢哋一齊夾份，一來佢哋做開小食店嘛，咁我哋就可以煩少好多嘢，二來如果蝕本咪可以蝕少一半囉我心諗...當然，我諗到嘅嘢，渣哥都知，但佢話，得啦，大家盡力搞好佢就得。
真正做落先知，原來搞一檔熟食檔，真係要用好多錢，先係個檔租，已經要五十幾萬…仲有裝潢，架生，人手，材料…仲有仲有，就係我哋貪靚底下而要求要整嘅TVMost Buddy兜、竹籤、紙巾…計下計下先發現，原來要成百幾萬…當我哋流晒冷汗時，渣哥次次開會都就晒我哋由得我哋話整乜就整乜，同埋…掛住講爛gag…
當時粗略估計，如果要封蝕本門，要六日年宵每日賣過萬兜。咁即係咩，即係冇可能，即係鐵定會蝕幾十萬。
由其頭兩日，人流少到我可以喺維園大字型瞓喺度係咁碌係咁碌都冇事，嗰下衝擊真係嚇到我哋對人歡笑背人呆滯，而渣哥，卻依然係天真無邪樂觀仔咁不斷為我哋發送正能量（講爛gag...）
咁都不特止，第二日仲畀我發現佢條友自備咗一堆口號嚟嗌咪（如圖..），kai到一個點，係我已經分唔出佢係拉緊客，定係自娛緊...（因為佢真係嗌嗌下自己喺度笑...）
好彩尾兩日人流多咗，大家多多幫趁，生意好咗。今日同事最後埋單計數，成績表終於出爐。
尋晚樂觀渣樂觀得濟，同記者講話可能會有賺，係估錯咗嘅，經羅碧咸精算過後，真相係……登登登凳，只係每邊蝕咗幾萬蚊咋。距離原先打定輸數嘅蝕幾十萬，確係一個非常好嘅成績。
再次大力感激渣哥、小環同埋佢哋所有同事，冇你哋，首先我哋冇可能玩到熟食檔，即使玩到，都欣賞唔到咁精彩嘅口號..
有機會嘅下次再合作，最多下次計好數預會賺錢先搵你..
大家得閒都要去多多幫趁樂觀渣同小環喺銅鑼灣n尖沙咀開嘅非劣食小食店喇。
嗌個口號先：去小食店食燒賣，食咗冇渣哥咁kai。（唉，都係唔夠佢嚟...等佢自己作返啦都係..）
