《鍾意食蛋料理，並唔係等於Cheap！》
我基本上，係無蛋不歡嘅人。
煎蛋、炒蛋、大陽蛋、溫泉蛋、皮蛋、鹹蛋、蛋卷、蛋撻、玉子燒、蒸水蛋、雞蛋布甸....
只要佢係用蛋整，我就會食得異常感動，略帶激動。
但係，我發現咗一個問題，
就係某啲時候，大家會誤解咗我食蛋，係因為平。
試過好多年前，約一個女仔去食日本野。
當時小弟都尚算青春，
單獨同女仔食飯自然經驗不足，
但我都醒水，扮晒嘢咁問：「你有冇咩想食呀？」
而佢都好配合，扮晒嘢咁答：「冇所謂呀，你話事呀！」
既然係咁，我唔客氣啦！
打開Menu，映入眼簾嘅係 玉子壽司！
唔使講，我雙眼發光，
口中唸唸有詞：「咁點兩客玉子壽司先啦緊係！」
一聲「吓？」非常刺耳，打斷咗我嘅說話。
抬頭一望，
明明溫柔無限嘅小姑娘，
正用厭惡到好似食咗屎咁嘅表情望住我。
即使遲鈍，
我都大約Sense到佢心嗰句係
「點玉子壽司？你冇嘢呀？」
「有咩問題？」我心入面真係十萬個為甚麼。
之後我明啦，
因為喺份Menu上面，玉子壽司係最平嘅，
好似只係8蚊件。
睇嚟呢個女仔係誤會咗我，
覺得我為咗慳，所以特登嗌平嘢！
真係冤枉呀法官大人，作為一個「蛋迷」，
玉子嗰種甘甜、鬆鬆散散又融二為一嘅觸感、
即使滑落大腸嘅過程，蛋味依然向五臟六腑慢慢滲透。
我係可以為玉子壽司摧毀一個行星嘅男子漢。
我食唔係因為佢平呀！
大佬佢平我都唔想架，咁一粒蛋真係唔太貴吖嘛。
「哈哈，你呢排要慳錢咩。」
個女仔仲要加多一句補刀。
個「哈哈」好懶講笑但其實心存不屑，
覺得你嗌得咁孤寒，就咪約人食飯啦。
我知道所有解釋都係冇用。
就算去到呢家，
如果晚飯我自己整兩隻鹹蛋或煎隻蛋，
再爬啖飯就搞掂。
畀老媽子見到，
佢都會輕輕問我一句：「仔...呢排係咪環境唔好呀？」
我真係呆晒，
咁香港環境係麻麻嘅，但空氣質素應該都好過北京囉。
有時真係唔知點答...
鹹蛋，5蚊兩隻，食埋啲蛋白，
如果下面整個肉餅更加不得之了，
送飯簡直係人生一大美事。
我只能夠講，蛋料理普遍唔貴，只係佢性價比高。
而我成日都食，唔係Cheap，而係真心鍾意。
好多嘢嘅喜好，並唔係由價錢去決定！
Egg Forever!!!
Ig:cheungson88
*會慢慢Up嘢上去
PS. 呢排寫咗叫《不存在的職業》嘅小系列故事，冇嘢做時可以望下：https://goo.gl/xh4bbt
