安德魯貼地旅行團的八卦，YOUTUBE和Yahoo名人娛樂都在討論

#安德魯貼地旅行團 #日本東京富士山溫泉旅館推介

新一年，寫個大post俾大家睇，
喜歡既不妨share俾你啲情人、朋友仔睇下！

講個秘密俾大家知，其實我好鐘意富士山，
所以今次我去東京既行程，主打都係富士山呢一part。

拿，我見大家對我(?)，住個間見到富士山既酒店咁有興趣，
我即管寫下間酒店啦。
出發前其實係度諗究竟我要去箱根既溫泉定係去富士山既溫泉，
因為要講溫泉靚同懷石料理好食既話，
好多人都話去箱根好啲，
而且我身邊既朋友好多都話富士山個邊啲溫泉旅館野食唔好食，啲旅館又唔係特別靚，
衡量過後，自己真係好想去睇富士山，
於是就揀左富士山下既溫泉旅館。

我平時對酒店既要求唔高，
係市中心只要住乾淨燈光夠光既飯店，
其實都已經好夠，而每次book溫泉旅館，
就會book啲貴啲靚啲，既然都去得溫泉旅館，
何必要揀間唔靚既，然後講句「好dump心」之類既說話？

今次睇富士山，就試下book間可以睇哂富士山全景同埋「逆富士」既溫泉旅館吧！
要睇富士山，河口湖算係數一數二可以觀賞到富士山較佳角度既地方，
而數到河口湖睇到全個富士山既溫泉旅館，
其實都唔算好多，而我今次選擇既就係河口湖一段無山block住既部份，
大約係河口湖木之花美術館(Kawaguchikokonohana Museum)附近，
溫泉旅館叫秀峰閣 湖月 (Shuhoukaku Kogetsu)。

溫泉旅館係下午三點可以開始check in，
Check in個時職員會俾一份英語指南俾你有關入住者需知既資料俾你，
然後會有位酒店職員帶你上房間，
就好似一般既溫泉旅館一樣，職員會介紹房間內以及旅館既設施，
秀峰閣 湖月為一泊二食既溫泉旅館，
意思係價錢包一晚房價、懷石料理晚餐以及早餐，
客房大致分為和式（日式）和洋式（西式）兩種，
和式係訓榻榻米，而洋式係訓床，
而且房間仲有分有私人露天風呂（溫泉）、足湯（溫泉）和標準客房，
懷石料理晚餐方面，秀峰閣 湖月設有包箱以及係房內進餐兩種，
不過包箱就需要有六人以上先得！
而安德魯今次選擇既係和式足湯客房，而且正面對住富士山，
大家係book既時候記得要睇翻房間介紹。

有關價錢以及房間資料，大家可以睇以下網址：
https://www.kogetu.com.t.eg.hp.transer.com/room/

講翻帶你上房個位職員，其實就應該係負責你房懷石料理個位職員，
Welcome drinks有綠茶、小糕點以及蘋果餅乾，
不過呢啲應該期期唔同，有就應該擺左係你枱面，
然後就係你自由活動既時間，
旅館室內以及露天溫泉都係設係地下個層，
並分為男湯同女湯，係冇混合溫泉，呢一點大家要注意，
另外如果大家有紋身既話，我建議大家都係book翻有私人風呂既房間，
因為日本既溫泉暫時都唔太歡迎有紋身既人士，
呢個係日本一直以來既傳統，都係個句，去得人地既國家，都係尊重下當地文化好，
否則柒出宇宙就唔好啦！

另外同事會問你想幾點開始用餐，
我就揀左六點用餐，聽落去好早，不過如果你三點check in既話，
然後係旅館外既小路影下日落既富士山，
再享受下溫泉，傍晚六點開始用餐就差不多了。
旅館附近影富士山毫無阻擋，所以係外面走走簡直係人生一大樂事！

六點前我已翻到房間，今次我住二樓，
入到房間我已見到職員為我地擺好枱同食物，
每一間旅館既懷石料理都有佢地既一個料理長（大廚），
而高級既旅館依家基本都會放左菜單上網，
秀峰閣 湖月每月都會轉菜單，佢地會upload當月既菜單上網站，
大家可以係以下網址睇到：

https://www.kogetu.com.t.eg.hp.transer.com/meal/

今個月菜單主菜係有豬肉shabu shabu火鍋，
用高級甲洲葡萄酒豬肉，
超級鮮嫩可口，
而最令我具印象既係佢地杯開胃酒(appetizer) ，
士多啤梨酒，完全唔係平時我地去街食個啲假士多啤梨味，
可惜佢地無出可以買翻屋企既士多啤梨酒。
至於食懷石料理既詳細介紹，我有機會再係另一篇文章講。

食飽後時間尚早，又係時間去浸多次溫泉，
溫泉正正面向富士山，
你試諗下一路浸溫泉一路望富士山係一件何其賞心悅目既事，
不同季節溫泉旁仲有唔同既花，好似夏天有薰衣草，三四月左右有櫻花，
今次我冬天去，就可以睇下雪啦！

另外，旅館設有記念品商店，
而紀念品商店旁邊酒店擺放左complimentary beer同water，
記念品商店內亦有用日本提子釀製既白酒俾大家試飲，
假如大家想買有關富士山既精品、零食禮盒、酒等手信既話，
不妨入去睇下，價錢都好合理！

每年河口湖二月都會係星期六、日係湖上舉行煙火表演，
秀峰閣 湖月會正正面向煙火，
我去時係星期五，所以睇唔到，
當然啦，你要睇得煙火，自然個兩晚既房價都會比平時貴啲，
不過可以跟情人、朋友、家人一齊睇咁浪漫既景色，
俾貴啲都值得既！

另外，旅館內亦設有遊戲機中心，
一家大細有小朋友既話，可以帶佢地去玩下，
包佢地開心，小朋友又有幾多識欣賞富士山既美景呢？

如果你係book左和式房間既話，
食完晚餐後，職員會入房幫你舖榻榻米，
其實我覺得訓榻榻米會比較有日本既氣氛，
而話明係一泊二食，早餐就唔少得，
而秀峰閣 湖月既早餐係以自助餐形式進行，
有和食同洋食俾大家揀，
包保岩哂大家既口味！
食完早餐後，早上十一點前就需要check out，
如果大家要翻東京市中心既話，酒店提供左shuttle到河口湖車站，
需時大約十分鐘左右，大家就可以按自己高速巴士既時間，
選擇乘搭邊班shuttle到河口湖車站！

題外話，
不過如果唔係因爲個富士山，我諗我唔會選擇住係河口湖附近，
因為呢度周圍俾我既感覺好似翻左大陸咁，
到處都係香港人、台灣人、大陸人，
我自己都係度懷疑呢度仲有無日本人住，
就好似上巴士咁，有個台灣媽咪完全唔理個小朋友坐落地下，
巴士又迫又無位，日本伯伯最後忍唔住抽起左個小朋友，
我諗日本人住係河口湖附近真係好攰，
要知道日日都勁多唔守規舉既遊客走來走去。

-----------

#秀峰閣湖月

🚎交通方法🚌

地址：401-0304山梨県南都留郡富士河口湖町河口2312
電話：0555-76-8888

交通方式：
地鐵方面
新宿站 → [JR中央線特快60分] → 大月站 → [富士急行線約40分] → 河口湖站
從河口湖站，可以使用巴士或者旅館的接送班車，接送班車由下午2時30分到下午7時運作。

高速巴士方面
新宿站 → [約75分] → 大月JCT → [約30分] → 河口湖站 → [約15分] → 湖月

東京站 → [約90分] → 大月JCT → [約30分] → 河口湖站 → [約15分] → 湖月

#究竟一年我要去幾多次日本
#次次去到東京都玩唔哂
#我有舖富士山癮

這是我見過其中一個最美的夜景，
雖然Budapest在歐洲國家來講，
並不多姿多彩，可以說是超級沉悶，
不過這裡有寧靜美，有音樂美，
而這裡的人，很有禮貌，我很喜歡。

而這個就是 Budapest Parliament🇭🇺

#安德魯貼地旅行團 #日本東京成田賞楓攻略

東京成田山賞楓🍁攻略

賞楓識賞始終都係日本好，
安德魯試過美國賞，都無日本個種和諧感，
其實日本賞楓唔單止望下啲楓樹咁簡單，
仲要望埋佢地全個園林景色，
有古廟池林配合楓葉，簡直一絕！

講到東京，其實有唔少地方都可以賞楓，
不過通常賞楓熱點都係旅遊熱點，基本上都勁多旅客，
左又撞到個香港人，右又撞到個台灣人，
總之就係周圍都係人，而且日本人自己都會去賞楓。
本來今次都打算去遠啲啲睇，不過東京下午4點半到就日落，
所以結果我都係打消呢個去市區既念頭，
諗下諗下，自己住成田機場附近，
就不如去附近成田山公園睇下楓葉就算，
不過原來有驚喜！不過如果我可以早啲到東京既話，我相信我可以見到更加靚既楓葉🍁，
因為今年東京早凍左，賞楓葉期又推早左！

唔好睇少成田山，成田山新勝寺據講每年正月黎新年參拜既遊客人數僅次於東京都既明治神宮，
係日本第二大寺廟有千年歷史，由於位置比較偏僻，所以比較少香港人去參觀，
岩唒我呢啲好怕多人既人，
據說寺內既石龜祈福好靈驗，不過我就無試啦，
而今次我最主要唔係介紹成田山新勝寺，
而係介紹成田山新勝寺大本堂後面既成田山公園。

成田山公園總面積有16萬5000平方公尺，
係東京人其中一個賞楓景點，咁岩我今次去到係佢地秋季既紅葉節，
公園內有3個池塘，不同季節可以係美景中一邊觀賞櫻花、楓葉、紫楊花等等，
簡直大家好似置身於楓葉林當中！

係公園內漫步後，大家仲可以係寺外既表參道行下，
聽講最出名食鰻魚飯，不過哥我就唔食鰻魚既，
所以就話唔到俾大家知有幾好味，
但係外面啲舖頭都賣緊千葉縣名產和料理，米菓及醃漬品之類，
大家不妨去睇下包你好happy！

不過提提大家，商店五點鐘左右就開收舖，
所以要去襯早，另外如果去完成田山仲想去行下街，
成田站附近仲有架巴士去aeon mall，
日本既aeon mall真係好好行，
唔單止有平價supermarket，又有啲local日本牌子時裝店，
又有激安、GU、藥妝店，
包你銀包一定失守，好行過你去行outlet！

-----------

🚎成田山公園交通方法🚌

地址：千葉県成田市成田1
交通方式：JR「成田站」、京成電鐵「京成成田站」徒步約10分

#總之日本乜都好
#賞楓識賞一定去日本
#去過世界咁多地方始終都係日本好
#今次有chok樣