擘大眼𥄫實
下星期放假，𠵱家講清講楚，我𥄫實民主黨，有乜唔妥，一定睇你班友唔起，正正式式同你哋切割，保證將來票債票償。
下星期三，2014版權(修訂)條例草案二讀三讀，如果民主黨或者泛民又chicken棄權，甚至贊成通過，幫政府擺把刀喺網民頭上，明嘅暗嘅限制自由創作，連我呢啲業餘blogger，都唔知幾時會踩正地雷，無端端誤墮法網。試問一聲，一個成熟開明自信有水準嘅社會，點會怕網民市民普通人諷刺謾罵，真正得人驚嘅係，萬籟無聲一言堂。
今年七月十一日已經寫咗篇《民主黨決定不參與創科局審議》，當時咁講：
有人要同你泥漿摔角，你就嫌人哋烏糟無禮夾硬嚟，唔玩；
有人設咗個陽謀陷阱陰你，你就話人哋奸茅不道德，唔玩；
你話反對撥款，又唔敢拉布抗議，驚得罪中產選民，唔玩；
你笑人蝦碌唔投票，人恥笑你chicken臨陣退縮，點解唔得。
政治唔係請客食飯哈哈哈，明嘅深謀遠慮你唔識，暗嘅笑裡藏刀奸詐你唔敢，講理論唔及陳雲，講勇武唔及本土派，講著數唔及建制派，試問一路支持你嘅，點跟呀？
從政係要take side講手段，呢樣驚，嗰樣又害怕，於是中間落墨最安全，十足十企係路中心安全島，以為穩陣安全無有怕，試問安全島係咪真係安全㗎？可以企得幾耐呀，企得幾多人㗎？你究竟知唔知好多人已經走咗啦。
你take side，我未必贊成，你玩手段，我未必欣賞，但你堅決唔take side，唔落場玩策略，唔識用理論帶領市民，仲要力竭聲嘶、青筋暴現話自己無錯，我一定鄙視你。
後記：
唔想玩，可以唔玩，讓畀班後生仔女玩，但霸住毛坑不拉屎，淨係識棄權逃避責任，我大大聲講多次，一定鄙視你。立此存照。
安全島法例 在 安全島作用2023-精選在Instagram/IG照片/Dcard上的焦點新聞 ... 的八卦
安全島 作用2023-精選在Instagram/IG照片/Dcard上的焦點新聞和熱門話題資訊，找安全島作用,安全島意思,安全島英文,安全島作用在Instagram上2023年該 ... ... <看更多>