認唔認到邊個係我？呢份剪報，係我當年打全港學界籃球馬拉松嘅報道。
好記得，嗰場同對手由頭咬到尾，三、兩分上落嗰隻；而嗰場波最尾嘅一分鐘，我到而家，依然記得清清楚楚。
當時打和，對方進攻；我守波腳步慢咗，畀人一個單擋阻一阻，就眼白白睇住由我Mark嘅嗰個球員，係我面前入咗球三分波 – 仲淨番十幾秒。
當刻真係面都青埋：死喇，唔通輸我？冇晒暫停、又冇得諗咁多，硬住頭皮焗攻；嗰陣中學仔心態，要面、唔衰得(主要因為好多女同學睇住啦ok)，心諗就算輸，都唔可以因為我做錯嘢而輸嘅！自己犯錯，就要自己搞番惦佢；最後一個攻勢，個波交到我手，諗都唔諗，三分線外起手 – 入咗！入完，已經差唔多完場。
終於追和！法定時間兩隊平手。全港學界籃球馬拉松嘅賽制，係上、下半場各十分鐘，打和嘅話就黃金入球定勝負(即係邊隊入一球先就為之贏)，最後，我哋贏咗。超級戲劇性嘅一場波，個心情好似坐過山車咁，贏咗之後同隊友攬埋一舊大叫 – 就係大家見到嘅呢張相嘞。
之前喺專欄寫過、去學校講Talk亦都提過：同學仔，應該好好珍惜打學界比賽嘅日子。因為，喺學界賽場上嘅片段，無論係贏定輸，係笑定係眼淚，都會係你一生嘅回憶；大個之後你就發覺，能夠最無憂無慮咁打波嘅日子，其實就係得中學嗰幾年。老嘢如我，同班老同學聚舊，就幾乎次次都會將呢幾場波再提一次。嗰時學界賽事冇而家咁多，除咗分區學界賽同精英賽，就得番暑假嘅全港學界籃球馬拉松；雖則話後比賽時間短，但一日要打幾場，又雲集港九新界嘅校隊，所以真係好大挑戰。
我知有人會問，其實呢份剪報咩年份呢？係1999年，我中七嘅暑假；嗰次係我最後一屆代表學校打學界，份外難忘啦。嗰陣時，#全港學界籃球馬拉松 係由Pocari Sweat HK (Official)贊助嘅；早幾日見到朋友Post今屆賽事嘅相，原來佢哋而家仲贊助緊 - 由1994年開始，足足23年！好開心有機構會一直支持中學籃球；今日就係決賽日喇，大家都去港灣道室內運動場支持下啦！ #為夢想流汗 #SWEATforDREAM
