聽過一句說話，一個人真正成長唔係喊得最慘嗰個夜晚，而係忍住冇喊嗰個夜晚。
＝＝＝＝＝＝＝
投稿讀者：欣
我讀書唔叻，冇學歷，畢業後一直搵唔到工，結果去咗便利店做，人工13,000左右，有個小小嘅目標同埋理想，就係開一間美甲店，因為呢樣係自己嘅興趣。
阿爸阿媽一直都重男輕女，對屋企個爛賭阿哥好容忍，對我就完全唔同，最直接一個例子就係阿哥幾年嚟都冇返工，係完全唔搵工嗰隻，試過有親戚朋友介紹工作畀佢都唔做，起碼7年冇做嘢，主要職責就係賭錢，賭波賭馬樣樣齊。
唔返工邊有錢賭？佢嘅賭本咪就係我畀屋企嘅家用囉！
一萬三千幾人工，佢哋規定我要畀7,000家用，剩低6千幾除咗用嚟搭車同埋食飯，仲有上堂學一啲美甲同修眉嘅課程，化妝班都有上，我仲可以剩低啲錢儲嚟開舖，有時覺得自己算係咁，當然，好多時去到20幾號已經係三餐捱麵包，阿爸阿媽亦從來唔煮飯。
爛賭阿哥每個月攤大手板問屋企攞錢，有時佢輸好多仲會額外再問，我自己點都唔會再畀，但係阿爸阿媽畀完佢之後，就會用其他理由問我拎更多家用，所以好多時唔止畀7,000，搞到儲錢儲得好慢。
我足足用咗4年時間先儲到134,400，雖然唔多，不過盡晒力喇，睇好舖位，搵咗一啲必需嘅器材，我打算辭咗便利店份工，全心全意發展自己嘅事業，正當我同阿爸阿媽講咗意向之後，阿哥就話自己賭外圍輸大錢，欠債十幾萬，後來亦真係有人上嚟屋企淋紅油，日日塞鎖匙窿同埋電話滋擾。
阿媽話既然我有錢開舖，即係有多餘錢，叫我拎出嚟幫阿哥還債，我唔肯，呢啲係死慳死抵儲返嚟嘅血汗錢，入面有自己嘅人生方向，多次拒絕之後，竟然冇人怪責阿哥賭錢，反而怪我唔拎錢出嚟幫手還債。
受盡冷言冷語，我喺屋企好大壓力，有一晚阿爸趁我瞓緊覺走入房扯我頭髮，迫我一定要拎晒啲錢出嚟幫阿哥，我有反抗但唔夠佢大力，仲食咗佢幾巴掌，阿爸話女仔人家學咩人講理想？學咩人講事業？阿媽袖手旁觀喺側邊一路附和，永遠記得我阿爸講咗一句：「生錯咗呢個仆街女！」
我知道當時得兩條路行，一係畀佢打死，就算今晚唔死，聽晚後晚大後晚都隨時喺睡夢中畀人扯頭髮，另一條路就係拎晒13萬出嚟畀我阿哥還債。
雖然阿爸阿媽由細到大都冇負過任何責任，我小學時期已經一個人返學放學，不過呢13萬我想當做最後一次為呢個家付出，拎晒開舖嘅錢出嚟畀佢哋還債，我個身得返4,400蚊，好老實講，真係諗過自殺，聽到「生錯咗呢個仆街女！」嗰晚，曾經想衝上大廈天台就咁跳落去，但我知道唔值得，要死好容易，要生存先至最難，我唔甘心，結果喺一件衫都冇拎嘅情況下，我離開咗呢個家，亦都唔再留戀呢個家。
好多謝當時有朋友收留咗我大半個月，拎住身上僅餘嘅4,400蚊，再加一個月嘅便利店人工，喺土瓜灣租咗間劏房住，可能我仲未知道前路應該點行，重新再儲一嚿錢亦係好漫長嘅事，不過我起碼得到解脫，人生唔再需要為他人作嫁衣裳。
有親戚打過嚟話我不孝，丟低屋企就咁走咗去，換轉係以前我一定會喊住解釋，但係經過呢一次，我冇再喊喇，只係覆返一句：「問心無愧！」然後索性換埋電話號碼。
我係一個人辦，唔夠聰明，唔夠決心，愚孝。
送上一個遲嚟嘅領悟－－－生活本身已經唔容易，要趁早擺脫同埋遠離嗰啲垃圾人，否則將來條路會更加難行。
