讀者投稿《又要威又要戴頭盔奶奶篇》
我同老公拍拖十幾年，奶奶極品事情，三日三夜都講唔完。以下係最近期嘅精采事情。
1) 英國環球遊
我同老公希望喺英國舉辦一個好小型嘅城堡婚禮。 主要淨係想喺英國註冊。 賓客淨係諗住雙方父母兄弟姊妹出席。 我老爺奶奶喺美國，老公個妹喺紐西蘭，而我爸爸媽媽喺香港。
我爸爸媽媽聽到好開心即刻話自費去英國。 我同老公都諗住出機票錢。 點知我奶奶發脾氣， 佢話好唔滿意我哋淨係出由美國去英國嘅機票錢 。 佢話一家人一定要齊齊整整出發。。。佢要求我同老公出老爺/奶奶/老公細佬由美國飛返香港嘅機票錢，等佢可以同老公妹妹喺香港會合。之後再由我同老公出錢請佢哋由香港飛去英國。 本來我哋都無奈接受要出機票錢，點知奶奶老爺再加多個要求--- 我同我老公要包佢哋成家(4個人)兩個星期英國嘅食宿兼洗費。
我老公梗係唔肯啦。 之後奶奶係咁講佢覺得好遺憾冇得睇個仔註冊。 老公覺得自己個婚禮，但係得我爸爸媽媽去好遺憾。 結論我爸爸媽媽費事令老公難受佢哋放棄去英國，而我就放棄喺英國註冊， 淨係搞小型古堡婚禮。
2)奶奶係新娘
我同媽媽奶奶去揀掛。 佢一入到鋪頭 好大支嘢 嘅語氣 同職員講:" 我淨係會著绣咗金線銀線完全冇布顔色既褂。 普通嘢我唔著， 太醜。"
咁我媽咪好快揀咗件啱價錢又靚，就落訂啦。而我奶奶就不停喺度睇下邊條最多金線銀線。 之後仲話我媽咪嗰件太寒酸，因為見到棗紅色布。
因為我老公知佢一定揀啲好貴嘅嘢，所以一早同佢講唔會畀錢佢租褂。點知道要畀錢落訂嘅時候發覺佢揀嗰件要成八千幾蚊。 死啦，奶奶又要威但係又唔捨得畀個八千幾蚊喎。 咁佢就望住媽媽嗰件問人哋幾多錢。 人哋話只需三四千。 奶奶又即刻話佢好鍾意我媽媽嗰件。 職員話淨係得一件咋喎， 奶奶即刻好想我媽媽讓畀佢。
平時奶奶點樣蝦我我唔介意， 我係後輩我可以忍佢。 但係我媽媽同佢係平輩我唔會畀佢蝦我媽媽。 本來我媽媽真係準備約佢嗰件俾佢， 我即刻撳住阿媽同我 奶奶講 我媽媽已經畀咗訂， 唔會改㗎啦。
最後我奶奶唯有死死地氣落訂定番嗰件啦。
好戲在後頭 1: 個老字號職員走過嚟同我講話你奶奶好煩, 我一毫子折頭都唔會畀佢。 將來你有排辛苦呀。 我平500蚊畀你 媽媽。
好戲在後頭2: 擺完酒之後有一日老爺都笑我奶奶。 原來奶奶著嗰件掛同楊怡和雪雪bb 一模一樣。 老爺問奶奶係咪當自己係新娘。 奶奶瀨落職員度話佢自己淨係話要奶奶褂，係職員畀錯佢，唔關佢事。 大佬呀! 邊有奶奶著到咁閃 咁金咁銀。 人哋梗係攞新娘啲褂畀佢啦。好戲在後頭3: 之後嗰一個月 啲人見親我都話我奶奶係咪以為自己再嫁。連daddy啲朋友都話我呢個奶奶唔嘢少應該好難服侍。。。
多得奶奶當晚有好多其他 嘅精湛表現, 而家 所有人都同情我, 對我特別好.
3)斟茶夾硬來
擺酒前兩星期我已經不停同奶奶跟進斟茶 名單。 佢不停同我講番唔會有野改. 我仲畀個rundown佢 話呢個係斟茶既次序， 同佢講嗰日時間十分緊逼不能突然添加或者更改。 佢話絕對唔會改。 仲串我話有幾多親戚，咁緊張，點會唔記得呀。
到結婚嗰日，我哋順利準時完成斟茶儀式。 突然之間奶奶跳出嚟話未斟曬。 佢叫我即場跪低斟茶俾佢個寶貝細女。我話佢係後輩我唔使斟茶唔使跪低。奶奶好堅持。現場所有人都話唔需要㗎喎， 除非一早溝通好。奶奶話所有傳統都係咁。 好彩我啲好姊妹即刻話冇曬乾淨杯，啲茶又倒曬，洗緊個茶壺。。。
原來我奶奶個寶貝女即係我嘅姑仔，好想人跪低斟茶俾佢， 所以同佢阿媽講要我跪。佢阿媽知道於理不合所以諗住用群眾壓力叫我跪低。點知我唔肯，仲有其他人幫我。最離譜係姑仔知道佢奸計唔得逞，竟然即刻跑去同我阿媽投訴我唔跪低斟茶畀佢。
其實 佢根本就之於禮不合所以先一直隱瞞我， 諗住我唔敢喺當眾反抗。 以為事件不了了之? 擺酒之後嗰兩日，我奶奶喺老公面前話我唔跟傳統跪低斟茶俾佢個寶貝女。。。最後我做咗好多資料搜習畀我老公畀奶奶睇，等佢知道跪低斟茶畀姑仔係好少數嘅傳統，亦都通常要喺事前同新娘溝通清楚，而並不是好似奶奶口中個個都做嘅傳統。
因為我本身工作係做資料搜習所以太詳盡，所以奶奶入唔到我 。 於是佢唯有喺雞蛋裏挑骨頭 。擺酒結婚後嗰幾日不停了結婚當日嘅嘢嚟話我。我老公知今次係奶奶野蠻無理所以都有教訓返佢媽，叫佢唔好再搞事。
所以一定要嫁個好老公。
#退一步海闊天高
#我的極品四大長老
#第一次聽要跪低斟茶俾後輩
👇設計圖片
