(非傻豬事)
一個伯伯緩緩推門，隔住隻門只伸個頭入診所問:妹妹，呢度睇醫生幾錢呀？
我: 200啊～
伯伯點點頭，慢慢閂門離開～
隔咗一陣，伯伯又回來問:妹妹呀，長者有冇優惠啊？
我:有啊，平啲㗎，係咪睇醫生呢？同你登記先啊～身份證有冇帶啊？
伯伯:有有有～
伯伯喺單薄衣服下掏出一個小小的破爛保鮮密實袋，我大概見到入面大多是沉甸甸嘅硬幣…
伯伯:身份證啊～
我:嗯，伯伯啊，住邊度啊？電話幾多號啊？
伯伯眼珠碌一碌:呀…唔記得啊，老人家唔好記性呀，你求其填呀，附近咁啦～
我:哦～冇問題啊，你記得嘅時候就話我知啦～
伯伯:好呀，我係咪有長者優惠㗎？唔會好貴㗎？
我:伯伯，你放心啦，一定俾個至抵至醒精明價格你呀！絕不取巧！
等咗陣，伯伯入醫生房了。
醫生:今日見邊度唔舒服呀？
伯伯:我肚痛呀～
醫生:有冇肚屙呀？
伯伯:有啊，屙咗好多次啦
醫生:幾多次呢？
伯伯:唔記得啦，噚晚都冇好好瞓過，唔記得啦！
醫生:記唔記得噚日食過啲乜呀？
伯伯:……係咪一定要講㗎？
醫生:你講咗，我先知道你有冇食到啲唔乾淨嘢嘛～
伯伯:我…執咗個飯盒食…入面有幾啖飯同少少油雞肉…我平時都咁食開㗎！冇事㗎！
醫生:噚日全日淨係食咗呢樣？有冇飲過啲乜呀？
伯伯:好大杯嘅奶茶，入面有好多黑色一粒粒嘅粒粒…我見個後生飲剩咁多就掉，咪唔好嘥…平時我去裝水飲㗎！
醫生:咁你呢啲腸胃炎嚟啫，呢幾日就唔好亂食嘢啦，啲咖啡奶茶油膩嘢都唔好食唔好飲，食得清淡啲，知唔知啊？
伯伯:知知知，醫生呀，我可唔可以要一兩次藥先呀？
醫生:要咁少唔夠㗎喎～你食住兩日藥先，搞返好個腸胃先！
伯伯:我怕唔夠錢俾醫生你…
醫生:得啦，你出去坐坐先，一陣姑娘就俾藥你，你喺度食一次藥先走啦～
伯伯行返出嚟，坐低等拎藥。
醫生召喚我:寶豬，你去買兩枝水同一啲乾糧，唔好買有夾心嗰啲，唔好買你平時食嗰啲，要啱老人家食嘅。明唔明？
你都講到咁白，我點會唔明…
我買完水同乾糧:醫生，得啦～
醫生:嗰個阿伯一陣你俾藥佢就俾埋袋嘢佢，仲有唔駛收佢錢啦，識唔識？
我:OKOK！
我:伯伯，可以攞藥啦！
我講解完藥點食之後，拎出乾糧:伯伯啊，你喺度食一次藥先走啊，唔可以空肚食㗎！所以你要食啲嘢先可以食藥，醫生同你準備好㗎啦～(細細聲)醫生會喺閉路電視睇住你有冇食㗎～
伯伯:唔好唔好，啲嘢食你留返俾自己食啦！
一早有準備嘅我拎出一筒麥維他古力:我淨係食呢隻，其他我睇唔上眼㗎～我好專一㗎！你食啦，你唔食嘅話，我又唔食，都係擺喺度咋，嘥哂啲嘢啊～
伯伯:哦，好啦好啦，多謝你啊，我呢度啲藥幾錢啊？
我:醫生話見你靚仔，唔收你錢呀～係有個條件，要你食一次藥先走得。(我指指cctv)
伯伯笑到咔咔聲，露出崩了缺了嘅牙:多謝醫生多謝醫生，多謝！
伯伯一邊拎住藥坐低，一邊向cctv笑住揮手，乖乖咁喺cctv面前食嘢食藥。
伯伯:我食咗啦！多謝你多謝醫生呀～同我多謝醫生呀！
我:乖啦，記得有唔舒服要返嚟呀，唔好立亂食嘢呀～
伯伯不停回頭向cctv揮手行出診所。
事件係有小後續的，醫生之後遇見伯伯喺街邊垃圾桶「尋寶」，佢聯絡咗相關組織，希望專業人士幫到佢～
喺香港，我哋平時都有機會見到公公婆婆或者後生一輩喺街邊或快餐店食二手飯，甚至露宿街頭。佢哋唔係精神病唔係傻，只係為生存…或者我哋都只可以喺遇上時，及時給予少少幫助。「如果你願意，你就係佢哋嘅及時雨。」，醫生曾經咁講過。我相信呢個香港好多人願意，感謝社會上有一群默默付出而不為人知嘅好人～
(醫生，我知你唔想我講呢件陳年事的，所以我冇開你名，只係暗自陳述啊～)
夾心 在 夾心餅,餅乾,休閒零食,食品飲料 - momo購物網 的相關結果
夾心 餅,餅乾,休閒零食,食品飲料,洋芋片,仙貝/米果,蛋捲各式規格種類,與華元,福義軒,Kenji 健司熱門品牌,優惠便宜好價格,值得推薦！ ... <看更多>