【粗疏？邊度粗呀？睇過～】
咁大個政府一年幾千億budget，市民要求做棕土普查咁多年都未做好，仲夠膽衝出嚟話棕土零碎唔用得。好嘞，我哋民間研究社花咗一年時間做好《隔世追棕 - 新界棕土擴張軌跡與現況》調查，唔止睇到最新嘅2017年棕土數據，仲睇埋2003、1993年，比對棕土25年擴散情況。結果揭破政府喺土地供應諮詢中報細數，講少咗221公頃棕土（即係十個太古城咁大～），仲有大拿拿1,023公頃係未有發展計劃添！足足相等於1,200公頃土地短缺嘅85%。加埋高球場172公頃同我哋早前搵到嘅300公頃未善用官地，仲有咩理據去填海呢？
可能政府都答唔到，琴日我哋發佈完《隔世追棕》報告後，發展局就只能夠回應話「棕地面積數字在任何估算時亦無可避免出現差異」，個頭盔真係大過太平洋。然後仲話我哋嘅調查方法粗疏，「單靠解讀航攝照片及地圖，難以準確判斷土地實際用途」。
喺政府土地資訊極度唔透明嘅情況下，Google Earth同Google Map有齊唔同年份嘅衛星圖，固然係我哋辨識棕土場嘅第一步，有上過去睇、或者睇過我哋份report cap圖嘅朋友大概都會同意，哩啲圖其實好清晰，基本上「露天停車場」裡面泊緊嘅係私家車、巴士、貨車定貨櫃車都分得清楚；政府成日話棕土場有重型機器好難重置入工廈，我哋仲特登統計咗露天「重型作業」類棕土，發現全部加埋都係得嗰63公頃添（只佔棕土總數4.1%）！因為衛星圖都可以清晰見到有無吊臂同吊雞車運作緊。但係初步辨認到外貌之後，我哋重會用其他方式多番查證，例如對照街景圖、實地考察、用航拍機影相、睇城規會網站有無棕土相關的規劃申請，甚至喺一啲關鍵個案查埋冊睇埋業權誰屬。花咁多時間金錢、人力物力，都係唔甘心俾政府用啲唔知點嚟嘅數據矇混過關。
成場「土地大辯論」中，棕土明明係一個極重要選項，但發展局俾出嚟既，就只有土供組會議文件裡面嘅一幅PDF圖，zoom近啲都起晒格（見左邊截圖），想放入ArcGIS做運算分析都幾難。發展局自己都喺份文件裡面承認1,300公頃哩個數係「初步非實地調查」、「粗略估計」。試問有咩粗梳得過棕土普查未完成、面積實數都未有，其他選項嘅成本比較又無提供，就叫市民填問卷揀選項？然後仲話要決定未來三十年嘅長遠土地發展策略？
提供充足數據資料俾公眾討論，本來就係政府嘅責任。不過政府唔做自己做，我哋已經將《隔世追棕》完整報告上載，亦都將框畫出來的棕土資料庫放到網上公開地圖，俾大家睇清楚一眾研究員嘅勞動成果。報告仲分析咗棕土擴散成因同趨勢，兼做埋規劃署份工，幫佢哋搵咗好幾個違例棕土黑點出嚟做個案研究。
其實政府想棕土個數細啲，好容易啫，落力啲執法同打撃違例棕土場咪得囉～ 快啲手打撃到變返1,300公頃，我哋一定俾個叻你架！
《隔世追棕 - 新界棕土擴張軌跡與現況》報告全文上線喇：http://bit.ly/brownfieldsintime2018
【隔世追棕 - 棕土擴張地圖】：http://bit.ly/brownfields2018_map
棕土零碎好難用？《合棕連橫》幫你搵好723公頃大塊棕地：http://bit.ly/2w8GOXH
--
月捐支持本研，一齊踢爆官商謊言💪💪
💰立即捐款：https://liber-research.com/support-us/
🌏了解更多：https://liber-research.com/about-us/
太 古城 填 海 在 太古城中心一期1982年 的八卦
該處是九龍最早填海開發地。 經古地圖等引證，此古廟背靠在今大環山今觀音廟位置（但文献記載紅磡觀音廟建於1873年，極可能是觀音廟前身天后廟或譚公廟） 1880年代紅磡 ... ... <看更多>