【你不改變社會，就得改變你自己】
因為我家中有一個支持香港警察嘅藍絲母親
令我經常研究藍絲嘅思維同形成
好想知道係咩令我一個港豬母親變成警察忠粉。
好似我阿媽呢種藍絲
佢最大嘅恐懼就係改變。
佢希望自己嘅生活去到死嗰日都一成不變
所以佢唔需要呢個社會作出改變
因為佢早已經將自己捏造成呢個社會需要嘅形狀
呢個世界有兩種人：
一種人會將自己搓成社會需要嘅形態去生存
另一種人會將社會打造成適合生存嘅形態。
我唔會話藍絲廢老真係廢柴
因為大部分嘅藍絲都曾經好努力過
好努力去將自己捏造成呢個社會需要嘅模樣。
就如世上所有人類嘅演化一樣，
將自己進化成更適合生存嘅形態。
喺呢個千瘡百孔嘅香港
其實係要相當吃力先可以配合生存
要用一生去追樓價，要縮骨去住劏房
要屈身去做大財團奴隸，要啞忍自己權利被蠶蝕
仲要供養政府廢人，出錢資助大陸，扶養新移民⋯
真心，喺香港每一個人都生活得唔容易。
大部分藍絲過去都付出咗半生先可以fit in呢個社會
所以突然要改變呢個社會形態，就如同抹殺佢哋嘅努力
捱得咁辛苦先至有丁點收成嘅人，點會想改變？
《天才少女福爾摩斯》有句對白：
''Politics doesn't interest you because
you have no interest in changing a world that suits you so well''
我唔會話藍絲做人無努力過，
但我會話藍絲都係自撚私。
因為佢哋都take緊呢個社會嘅advantages
為咗保護自己嘅既得利益，而無視其他人嘅利益。
我曾經問過我媽，你有無諗過我？有無諗過你將來個孫？
有無諗過我哋將來可以點生存？點生活？
佢話：我哋依家有飯食有樓住好幸福㗎啦。
⋯⋯
講番《天才少女福爾摩斯》有一幕我睇到想喊。
女主角阿媽為咗去搞女性平權革命，而離開屋企
最後有幕佢同個女講：我離開你，並唔係因為唔愛你。
而係因為太愛你，所以我唔願意你將來活喺呢種社會。
之前提過我18歲寫過封信畀自己，封信最後一句係咁：
「我愛小朋友！記得要生仔！要搵個值得愛一世嘅男人」
我係一個如此渴望擁有小朋友嘅人
但近一年我有絕育嘅衝動，我諗過一萬次唔好生仔
因為我想像到自己會有幾愛我嘅下一代
愛到我唔願意畀佢將來生活喺一個咁樣嘅香港。
點解世界各地都有咁多年青人、大學生會走上街頭
因為呢班人仲未被社會塑形，仲未成為既得利益者
因為呢個社會從來都無善待過年輕人
唔係因為年輕而衝動，而係因為年輕所以不甘
唔想認命生存喺呢個扭曲荒謬嘅社會。
喜歡我的文字，請支持我的Patreon：
https://www.patreon.com/hkgirlfriend
**收入會將一半捐出支援被捕人士。
IG：@hkgirlfriend
FB：港女友
