我的大阪之旅part3
第四日
去左一個叫中崎町既地方，佢係由好多小店鋪組成既一個區域，大部分都係賣D手作為主，行落幾舒服，啱晒D偽文青，而係咁多商店入面，唯獨有間男士髮型店。我猶豫左好耐，應唔應該試試佢呢。基於人一世，物一世既慫恿下，係步入中年，頭髮甩光之前，就緊係咩都試下，一於剪返個蘿蔔頭。
鼓起勇氣行入去，有個留山羊鬚既大叔埋嚟招待我，講左一堆日文，然後深情咁望住我，為左令佢明白我唔識日文，我就嘗試用英文同佢溝通 "Hi, What 7 you say?" 可惜既係，原來佢都唔識英文，語言雖然不通，但都無礙我剪頭髮既決心。佢就拎左幾本髮型書畀我睇，然後用肢體語言解釋我知，我get到既意思大概係 "入面有冇邊款髮型係你條7頭想剪架呢?" 我立過D書之後，就用一個真誠,信任既目光話返畀佢知 "屌你,你決定啦" 但可惜既係，佢竟然感受唔到我目光既意思，最後都只能夠依靠偉大既google翻譯話佢知佢話事。咁大概溝通好之後，佢就開始嚟了，正常都係洗頭先，洗洗下佢又講野喇，我諗應該係循例問下有冇邊到痕呀咁，我真係想應返佢屎忽癢呀，大哥，都話唔識日文落。咁洗完，然後就剪啦，中間都冇乜特別，手法好溫柔咁囉，剪完最後都問返我滿唔滿意，我照一照鏡，所以話，靚仔既人真係剪咩頭都咁有型，係我幾滿意之際，佢問我gel唔gel埋頭，唔知點解依句我又明喎。咁就當然試埋啦，gel gel下最後gel到成個忘了愛咁，個刻我就真係連人生意義都忘了。
咁玩個頭都玩左成粒鐘，再行多陣又到左晚飯時間，一直都想試下個蕎麥麵，所以就去左間專食蕎麥麵既店鋪，人唔係好多，得2,3枱客人，我就是但搵個位坐底。叫左個炸蝦天婦羅配蕎麥麵，一嚟到，蕎麥麵,炸料整齊地放好係個便當盒入面，仲有一碗醬油咁既湯汁。咁好正常地，我就緊係將D湯汁倒入個盒D麵到食啦，點知企正係我隔離幫我落單個店員姐姐，見到此情此境就好衝忙咁阻止我，然後好心急咁解釋返我聽 "唔好意思呀，食蕎麥麵呢，係要將D麵夾去個碗D湯汁到食架，7頭，你做乜撚野倒D湯落個盒到呀" 聽到個刻我真係好想搵個窿捐入去，或者搵間寺廟出家，從此不問世事，成件事7到呢，我真係冇面目冇勇氣再留係世上。最後個店員姐姐好好人咁幫我倒過碗湯汁嚟，雖然佢表面上好nice，但我feel到佢內心強烈恥笑緊我，我就拿拿聲食完，跟住頭也不回地逃離案發現場，待續...
