讀者投稿《外傳：唔識教極品夫婦大哥大嫂篇》
勁長文，屈喺個心好多年，嗰幾年簡直地獄，兩公婆成日嘈，放學唔想返屋企，成日遊街到11,12點先返去，精神差，甚至我好怕自己情緒有問題，成日都提住自己千祈唔好有精神病。
我好羨慕呢個page有好多正常甚至好好嘅新抱/呀嫂。但係我有一個極品呀嫂，但係佢唔識尊重人，無資格要我叫佢做呀嫂。下稱「嗰個女人」。而我呀哥都唔好得幾多，我兩個都好憎。
屋企只係基層家庭住公屋，佢嫁入黎嗰時我只係中學生，大肚結婚 (本身同我哥已經一齊左成8年)。
大肚之後辭職安胎，生完之後全職湊仔。我呀爸呀媽全包洗衫煮飯打掃屋企，頭嗰半年左右嗰個女人都好似無咩野，到後期佢開始嫌自己個仔煩，成日閙佢叫佢收聲，開始成日自己玩電話，唔理個仔，叫佢搵爺爺嫲嫲。之後就演變成我呀媽辭職湊埋孫，洗衫煮飯買奶粉，但係嗰個女人就一直無業遊民，大安旨意少奶奶咁。
買左d貴少少日本士多啤梨返屋企，問都唔問開黎食，係咁食食食食食左一半，都無諗過留俾其他人。
呀媽平時有裝香佢已經唔鍾意，有次拜神燒野，佢發脾氣帶左個仔返外家，住左幾日返黎，附帶幾日無洗嘅衫，又係我呀爸呀媽善後。
夜晚12點幾一開門返屋企已經聽到兩公婆嘈，小朋友又喊，成個玻璃大水樽係我面前飛過，中左廚房門爆開左，廚房門又歪左，嘈到成家醒晒，我哥衝左落街，呀爸追左出去，呀媽過去安慰嗰個女人，嗰嗰女人竟然bam門入房。兩個老人家問我哥會唔會係產後抑鬱，我哥去睇過醫生，又唔係。
嗰個女人帶個仔去圖書館，個仔嘈得濟俾人話唔識教仔，之後就好少自己帶佢落街玩，變左我媽帶佢去玩，自己去同朋友出街。
有次小朋友好開心話同mami去海洋公園，喺屋企食d野先出門口，點知小朋友唔食扭計想快d去，佢呀媽又發脾氣留低個仔走左落街，一直到夜晚好夜先返。
有次因為個仔煩發脾氣，拖住個仔喺地下，我話您再係咁我就報警 (已經唔係第一次）。佢反鎖自己喺房，嗰小朋友係咁喊，我地行過去，小朋友避開我地，話mami唔鍾意 (WTF?)過左幾個鍾我哥返黎先開返房門。
有次兩公婆又嗌交，嗰個女人自己執野走左，留低個仔喺度。電話無人聽，無人搵到佢，我呀爸每日都有試下打俾佢，終於一個星期後佢聽電話，呀媽勸左佢返黎。
一直吵吵鬧鬧到個小朋友返k2，有日小朋友返學前喊，兩公婆又打又鬧，我返學前望下個小朋友，原來佢頸後面好多紅色點點。我話您地都唔了解下個仔咩事，一開波就打，再係咁我真係報警，之後佢兩個終於搬走，但我呀爸呀媽開始另一個工人式生活.....同一件事，原來個小朋友手捉口病，我地叫佢兩公婆打返去幼稚園同老師講，等學校清潔消毒，佢地竟然話唔駛。我嗰下躁到一個點，真係想佢兩公婆俾人打，我話人地d仔女唔係人？咁自私點做人呀爸呀媽，之後我跑左去返學，一路行一路嬲到喊左出黎，lunch打俾呀媽問佢兩個有無同學校講，呀媽話呀哥最後有打返俾學校，我諗住無就我會打俾幼稚園。
佢兩公婆根本唔係教仔（唔好同我講咩你未生過細路嗰d廢話）佢地由始至終係打佢黎發洩情緒，去到失控地步，佢地d咆哮聲，佢地面目猙獰嘅樣，根本痴___線。小朋友唔聽話，嗰個女人會拉個仔企角落頭，然後烏低身喺個小朋友耳邊不停咦依黯黯，個距離直程係差在個嘴未掂到隻耳仔，小朋友個樣係勁驚。
終於搬左，佢兩公婆搬左去附近好近我屋企，而小朋友返學間幼稚園就喺我屋企樓下。每日佢地帶個仔去屋企樓下返學，之後拎佢地屋企d衫返黎洗，dom低係我屋企地下就走，屋企有乾衣機，洗衫乾衣摺衫我呀爸呀媽一條龍服務。小朋友放學又係兩個老人家湊返屋企，煮好飯開埋枱等佢兩公婆返黎接個孫，一齊食飯，之後一家三口喺屋企沖埋涼先返佢地自己屋企。個小朋友玩完d玩具又唔執，做人呀爸呀媽自己個仔唔執玩具，你兩公婆都要識做啦，結果食完飯沖完涼拍下蘿柚就走，呢種生活過左2年。
搬走左之後我媽先敢同我地講，其實兩公婆住喺度嗰5年，每個月係一千蚊家用。（阿哥人工2萬幾）
依家佢地有宿舍搬左個距離屋企30分鐘車程嘅地方，終於都可以結束呢d生活.....希望個小朋友大個左可以有返個健康心靈，因為小朋友個樣唔知由幾時開始，成日雛住眉頭，好暴躁，成日meet我呀爸呀媽（係meet住再扭，因為佢父母都係咁meet佢），有次仲咬我呀媽眼皮咬到流血，真係唔識教唔好生，到時個小朋友大個左好似周凱亮咁就大獲....
#退一步海闊天高
#我的極品四大長老
