有個舊同事WhatsApp group本來靜咗好耐，但係近一個月再度活躍，因為大家熱烈討論一連串嘅示威遊行，其中一位每次發言都特別激動，冇計，佢淨係睇cctvb，呢個係個人選擇，何況同佢已經好疏離，我亦都唔想搭嘴留言，直至噚日佢又send咗一個message出嚟：
「個個唔信警察，日日叫黑警黑警，有事嗰陣唔好報警吖笨！」
今次路過忍唔住丟低一句：
「咁我有交稅㗎喎，我唔知你使唔使交啦，我就交緊五位數，有事報警係所有香港人嘅權利，我係納稅人，其實係我出糧畀佢哋。」
如果警察呢個行業好似啲公司咁樣有competitor，例如唔鍾意Adidas可以買Nike，唔鍾意iPhone可以買Samsung，我老早揀咗其他渠道啦！
呢位舊同事又連隨講多句：
「佢哋根本身不由己，係林鄭擺佢哋上枱，推班警察做醜人啫。」然後就send咗警察畀人咬傷手指幅圖出嚟。
我唔知呢個page嘅人有幾多個係撐警，有幾多個係唔鍾意警察，我自己並唔係因為近期事件先至投以不信任票。
好多年前喺柴灣返工，我同一位記者同事喺杏花村地鐵站見到有警察截停個後生仔查身份證，我哋兩個十分好奇，因為個後生仔難聽啲講係書蟲樣，好kai下。
之後嘅日子，我同呢位同事都分別見過無數次警察喺同一個地方截查身份證，當時大家成日講笑，睇下邊個樣衰遲早有一日比人查。有次我又同呢位同事一齊搭去杏花村出閘轉小巴，忽發奇想不如企喺度研究下，我哋發現警察只會截停嗰啲好純品好瘦弱嘅人，其中一幕更加有個唔著上身衫嘅紋身佬喺側邊行過，MK古惑仔唔使查，書獃子就查，嗰一幕真係相映成趣，係咪有咩特別case專針對呢類型嘅人？還是貪佢哋唔會反抗？
不過阿sir做嘢唔使我哋教，話唔定人哋查緊「pure少年殺人事件」呢！
仲有一次，成班記者同事收工去北角唱K，因為呢行放工好夜，唱嗰陣已經係凌晨時份，嗰間Neway卡啦OK門口有部PS4（當年應該係PS3)，其中一位同事因為悶悶地走咗出去打機，咁大家就冇理啦，點知另一位同事去廁所，過咗幾秒鐘就匆匆折返，打開門好慌張咁同我哋講：「阿邊個畀人打呀！」然後佢又跑返出去。
因為「阿邊個」平時係一位冇火嘅同事，我哋大家都唔係好信，仲講笑繼續唱K，隔咗5秒左右，我哋意識到唔對路，終於成班人出去睇下咩事，原來係有兩班黑幫開大片，由卡拉ok電梯位置打到入嚟，我哋個同事唔知做咩又畀其中一班黑幫打埋一份，總之當時我哋完全唔知咩事。
隔咗10－15分鐘左右，警察終於嚟到，嗰位同事頭破血流，之後我先了解到北角係好多福建幫，嗰陣咁啱有兩班人講數，嘈起上嚟見人就打，我同事唔好彩喺正事發地點中心。
嗰晚冇得再繼續唱k，個個都要去差館落口供，離開卡拉ok時見到成班福建仔踎喺卡拉ok樓下，由幾個警察睇實，諗住可以告班黑社會啦，點知事發後好耐都冇下文，被打嗰位同事都話中間有警察聯絡過佢幾次，最後始終不了了之。
我唔信任警察係由呢兩件事開始，唔係因為最近嘅事。
其實好多時每一件事都有前因後果，係日積月累形成，就好似一個員工平時做嘢冇交代又俹簁，其他人同埋老細先會選擇投以不信任票。
以上兩件事我冇同呢位舊同事講，佢send警察畀人咬傷手指嘅圖片出嚟，我就send返事發起因係個警察用手指挖人隻眼嗰幾張圖畀佢，然後我就quit group。
日常生活又好，工作上嘅問題又好，大家視野同高度唔同，不必互相說服，唔好淨係睇一個電視台，要發掘多啲資訊渠道，眼界同埋思維自然就有進步。
