《喺香港地真係好易「臨老唔過得世」》
大埔劍橋護老院畀人影到，職員安排院友除哂衫喺天台等沖涼。附近嘅街坊仲話幾年來都係咁，向護老院反映冇人理，直至有傳媒揭發先有人關注。
印象中，香港老人院都係無間地獄...
第一次我對香港老人院有概念，係睇蕭芳芳個套《女人四十》，喬宏飾演一個有老人痴呆症嘅老人家，由於屋企個個返工，就安排喬宏去日間護老院。後來因為蕭芳芳心力交瘁，呃喬宏去飲茶，再送佢入老人院。喬宏喺老人院畀人打抑鬱，喬宏講左句：「我想返屋企」，真係令人好心噏，最後蕭芳芳唔忍心接喬宏返屋企。
年青人可能冇睇《女人四十》，咁《桃姐》睇過啩？Deanie 姐為左唔好連累華仔，主動話想住老人院，老人家食飯會好似監獄風雲咁，畀人搶左塊肉，夜晚訓覺，間房冇天花，會聽到隔離阿婆成晚喺度叫救命。
香港老人院係唔係特別衰？
→ 睇西片，外國D 老人院起碼都鯉魚門度假村咁樣。又好似劉華個套龍鳳鬥，佢臨死前住個間護理院，一望出去就「青草地，溪水旁」。
→ 前排荷蘭會建造一個安全社區專畀老人痴呆症嘅老友記。有睇過日本將兒童日間托兒所，安排喺護老院，細路可以為護老院帶來生氣，學識尊重長者，長者又可以教細路。
－－－－－－－－－－－－－－－－－
喺香港真係好易「臨老唔過得世」...
→ 前日我聽商台在晴朗的一天出發，評論大劉個仔嘅置業論，主持講到，的確有好多人40 歲先買樓，甚至唔一定要視買樓為人生目標，可以成世租樓。問題係如果一世唔買樓，我都係頂盡做到70 歲退休，如果我有sir run run 咁長命。退休金夠唔夠我捱貴租呢？
→ 如果我一世唔買樓，我冇資產，將來想住間好D嘅老人院，都冇得賣左層樓套現入老人院住。
我發覺我「臨老唔過得世」，最後要訓街嘅機會係偏高至甚高...
→ 我問過做社工嘅堂妹，而家有政府資助嘅老人院，要大約2000蚊一個月，假設我真係唔死得，長命百歲，退休至100歲呢30年，要最少84萬先過到世。而堂妹提醒我，到我變老野個時，一定唔只2000蚊，除非住「綜援全包宴」老人院，個D有可能衰過劍橋。又其實到左個時，綜援會唔會畀新香港人陰乾哂？
→ 單靠份強姦金，仲要畀基金佬cap 水cap 左一大份，到底老左係唔係要執紙皮？
→ 又假設我有仔女，佢地仲好似丁蟹個4個仔咁孝順，但佢地都要為買樓打算，我都唔想為左住好D嘅老人院，令佢地買樓plan一拖再拖。自己買唔到樓，唔想世世代代都買唔到樓。
－－－－－－－－－－－－－－－－－
如果可以，我真係想而家排定先...
→ 香港地，乜都排餐死，出世排play group，幼稚園，小學中學。大左排公屋，老左排老人院，死左排骨位。
→ 資助老人院要排N年。真係唔可以執輸，如果而家可以排，我真係想排定先。我唔想到時冇位，要入「綜援全包宴」老人院呀。
－－－－－－－－－－－－－－－－－
我地個政府到底做過乜鬼野...
→ 關注老人福利，令老人家安享晚年，呢D真係今生今世香港政府都唔會提供到。新聞指社署過去5年，向劍橋發出15封警告信，巡查96次，從未檢控。咁多年來，完全監管不力。
→ 好福利政府唔會畀你，僅有嘅福利，政府覺得豪左畀你，「點解唔袋住先？仲要有要求？」，幾唔知足呢你地。
－－－－－－－－－－－－－－－－－
最後想提供一個舊聞畀大家重溫...
2014年8月蘋果新聞報導過一個現職老人服務嘅80 後Ivan，喺老人院住三日兩夜，體驗老人生活。Ivan試食老人院餐，食凝固粉，要姑娘幫佢沖涼，唔畀落床。體驗過後，Ivan 明白老人院嘅生活真係好難捱，要人幫佢沖涼好冇尊嚴。咁何況喺劍橋天台除哂衫呢？
不如大家反思下，點樣可以為老人家提供好D嘅生活。同一時間，又反思下，點樣可以防止自己「臨老唔過得世」。
－－－－－－－－－－－－－－－－－
PS. 搵香港老人院資料嘅時候，見到老人院網站，多數強調院舍嘅價錢。不如整返個老人院嘅openrice。畀老人家嘅親人評價返老人院嘅設施同服務，選擇老人院嘅時候，透明度都高D呀。
－－－－－－－－－－－－－－－－－
荷蘭老人痴呆症安全社區：
http://thepolysh.com/blog/2014/02/23/hogewey-nursing-home/
80 後體驗老人院生活：
http://hk.apple.nextmedia.com/news/art/20140823/18842019
