<<< 長文 >>>
如果你見到呢個post！🎉恭喜你喇！你一定係我中實嘅讀者/有追開我post嘅人😍 我愛你地呀😘😘😘
但實不相門，Facebook專頁我已經玩到灰灰地！原因係佢哋已經商業化到一個點。 只要你肯俾錢，啲post就有人睇到；你唔俾錢，啲post就變晒「佛系」，緣份一到自然會睇到🙃。 所以大家每次打開Facebook， 只會見到好多《贊助》post，係好多！ 有錢就有曝光😎
有時好俾心機寫啲食譜出嚟，發覺原來根本係冇乜人可以睇到，咁寫嚟做乜姐？陪下乖仔乖囡、撚吓狗同 #大力NicNic 玩下仲好啦😁🐶👧🏻👦🏻
5年前開「包點菲師奶」呢個專頁，真係想開心share食譜，當年呢個平台好簡單，你post就有人睇，啱睇就like..喜歡就share....好快就吸引到好多人！ 不過到咗今時今日，乜都係講錢！買like買reach，有錢就會自然有一大堆唔知咩人like，我呢啲非商業人仕（即係冇俾錢啦）啲post真係會直入黑洞，除非你有「追蹤」同「搶先看」！
不過我都好感激一直喺到支持住我嘅咁多位🙏你地係令我仲有心入嚟間唔中寫少少嘢嘅唯一動力！
所以今後，大家都隨緣吧！
呻完喇！我哋都係講返窩蛋牛肉飯啦😁，呢個窩蛋牛肉飯，我同乖仔乖囡食咗一個星期🤪！目的就係要研究到最好嘅食譜，菲師奶就是有「死唔憤氣」嘅特質！點都要整到好食為止，到最後成功嗰一日，阿囡最開心！👧🏻佢大叫：「終於唔使再食窩蛋牛肉喇😭😭😭！感覺主🙏！」
我食譜做嘅牛肉餅，係鬆、彈、滑、爽、多汁嘅！重點係打牛肉，牛肉要打到起膠，用手打可以firm埋舊byebye肉💪因為要重複打好耐😆，打牛肉期間溫度唔可以過熱，脂肪溶晒就唔滑唔juicy，所以開始及中途要雪吓佢，同加冰水都有幫助。
但假若你對牛肉嘅質地冇乜要求，就可以求其將牛肉同醃料撈埋就ok！😉
[窩蛋牛肉飯]
免治牛肉 200g
馬蹄 2粒
蔥花 少許
冰水 80ml (分兩份，每份40ml）
雞蛋 1隻
鹽 ½茶匙 ｝
梳打粉 ¼茶匙 ｝醃料A
生粉 15g ｝
水 30ml ｝
生抽 2茶匙 ｝
𧐢油 1茶匙 ｝
糖 1茶匙 ｝醃料B
胡椒粉 少許 ｝
油 2茶匙 ｝
做法：
1） 免治牛肉放冰箱雪15分。
2）把醃料A中的生粉和水混合。
3）取出牛肉放入不鏽鋼盆中，加入鹽、梳打粉及半份生粉水，用手攪拌至起膠，分兩次加入40ml冰水繼續攪拌5至8分鐘（視乎手打速度而定😝）至起膠有彈性。
4）放雪櫃冷藏2小時。
5）馬蹄去皮切碎。
6）取出牛肉，加入餘下的生粉水撈勻，再分兩次加入40ml 冰水打至起膠後落醃料B、馬蹄及蔥粒撈勻，最後加2茶匙蛋白撈勻。
⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯
🍚明火煲飯：鍋中加入洗淨的米和水，大火煮滾後把米撈散，轉細火加蓋煮約5分鐘（以兩嘜米計），放上牛肉餅，加蓋大火煮1分鐘再轉細火煮3-5分鐘（視乎肉餅厚薄而定），加蛋，熄火焗一會便可。
⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯⋯
